މީޑިއާގެ ކަންކަން ބެލެހެއްޓުމުގެ ޒިންމާ މިހާރު އަދާކުރާ ކޮމިޝަންތަންތަކާއި މަސްލަހަތުވެރިންނާ މަޝްވަރާކުރުމެއް ނެތި އަދި ދިރާސާ ވެސް ނުކޮށް ސަރުކާރުން މީޑިއާ ކޮންޓްރޯލް ކުރާ ބިލް މަޖިލީހަށް ހުށަހެޅުމުން މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)އިން މިއަދު ކަންބޮޑުވުން ފާޅުކޮށްފި އެވެ. 
ވީ ކިހިނެއް؟ - އެ ބިލް ދިރާސާކުރާ ރައްޔިތުން މަޖިލީހުގެ މިނިވަން މުއައްސަސާތަކުގެ ކޮމިޓީގައި ބްރޯޑްކޮމްގެ ރައީސް ސަފާ ޝަފީގް ވަނީ އެ ބިލް ޑްރާފްޓްކުރުމުގެ މަރުހަލާގައި އެ ކޮމިޝަނާ މަޝްވަރާކޮށްފައި ނުވާތީ ކަންބޮޑުވުން ފާޅުކޮށްފަ އެވެ. 
ތަފްސީލް - ސަފާ ވިދާޅުވި ގޮތުގައި މިފަދަ ބިލެއް ގައުމީ ފެންވަރުގެ ދިރާސާއެއް ހެދުން މުހިންމު ކަމަށެވެ. އަދި ސަރުކާރުގެ ސިޔާސަތަކީ ވެސް ކަންކަން ނިންމުމުގެ ކުރިން ފުޅާދާއިރާއެއްގައި ދިރާސާކުރުން ކަމަށް ވެސް ސަފާ ވިދާޅުވި އެވެ. އެގޮތުން އޭނާ ވަނީ ބިލުގައި ހުރި ބައެއް ކަންބޮޑުވުންތައް ފާޅުކުރައްވައިފަ އެވެ. އޭނާ ފާހަގަކުރެއްވި ކަންބޮޑުވުންތަކަކީ: 
ނޫސްވެރިންނާއި މީޑިއާތައް ޖޫރިމަނާކުރާ އަދަދުތައް ކަނޑައަޅާފައިވަނީ ދިރާސާއެއް ނުކޮށް؛ ނޫސްވެރިންނަށް މުސާރަ ލިބޭވަރާއި މީޑިއާތަކުގެ އާމްދަނީއަށް ބަލައިގެން އެ އަދަދުތައް ކަނޑައަޅަން ޖެހޭނީ
އެހެން ގައުމުތަކުގަައި މީޑިއާ ރެގިއުލޭޓް ކުރަން އޮންނަ ގޮތް ދިރާސާކޮށް ރާއްޖެއަށް އެންމެ އެކަށޭނަ ގޮތަކީ ކޮބައިތޯ ބެލުން؛ އަދި ސެލްފް ރެގިއުލޭޓަރީ ނިޒާމަކާ ގުޅޭ ގޮތުން ވެސް ފުޅާ ދާއިރާއެއްގައި ބަހުސް ކުރަން ޖެހޭ
މީޑިއާތަކާއި އޯޓީޓީ ޕްލެޓްފޯމްތައް ވެސް ބެލެހެއްޓުން އެއްކޮމިޝަނަށް ގެންނައިރު އެއީ ވެސް އެންމެ ކުރަން ރަނގަޅު ކަމެއްތޯ ދިރާސާކުރަން ޖެހޭ ކަމަށް ވިދާޅުވި  
"އަޅުގަނޑުމެން އެދެނީ މިވަރުގެ ބިލަކަށް މަޝްވަރާކޮށް އިތުރަށް ދިރާސާކުރަން ވަގުތު ބޭނުންވާނޭ،" ސަފާ ވިދާޅުވި އެވެ. އޭނާ ވަނީ އެ ބިލާ މެދު މީގެ ކުރިން ވެސް އެ ކޮމިޝަންގެ ކަންބޮޑުވުންތައް ހުރުމުން، ތިން ސިޓީއެއް މަޖިލީހަށް ފޮނުވިކަން ވެސް ފާހަގަކުރައްވައިފަ އެވެ.
އޭނާ ވިދާޅުވި ގޮތުގައި މިހާރު ހުށަހަޅާފައިވާ ބިލްގައި ވެސް އަޅަން ހުރި ވަރަށް ގިނަ ފިޔަވަޅުތައް އަދި ކަންކަމަކީ ވެސް ބްރޯޑްކޮމްގެ ގާނޫނުގައި މިހާރު ވެސް ހިމަނާފައިވާ ކަންކަމެވެ. އެހެން ނަމަވެސް:
އެކަންކަން ތަންފީޒުނުވަނީ ބަޖެޓާއި ވަސީލަތްތައް މަދުވުމުން ކަމަށް ސަފާ ވިދާޅުވި
އާ ކޮމިޝަނެއް ހެދި ނަމަވެސް ބަޖެޓާއި ވަސީލަތްތައް ނުލިބޭ ނަމަ ގާނޫނު ތަންފީޒު ނުކުރެވޭނެކަން ވެސް އޭނާ ފާހަގަކުރެއްވި 
"ގާނޫނަކަށް ވަކި ވެގެނެއް ތަންފީޒެއް ނުއެއް ކުރެވޭނެ ކަންކަން ހުރި ގޮތުން،" ސަފާ ވިދާޅުވި އެވެ.