ފިލްމު "ވަންސް އަޕޮން އަ ޓައިމް އިން މުމްބާއީ" އިން ބެލުންތެރިންގެ މެދުގައި ބޮޑު މަގުބޫލުކަމެއް ހޯދި އެކްޓަރު ރަންދީޕް ހޫޑާއަށް އަނެއްކާ ވެސް ހޮލީވުޑްގެ ފިލްމަކުން ފުރުސަތު ލިބިއްޖެ ކަމަށް ރިޕޯޓުތައް ބުނެފިއެވެ. މީގެކުރިން ވެސް ހޮލީވުޑްގެ ފިލްމެއްގައި މަސައްކަތް ކޮށްފައިވާ އެކްޓަރު, މިފަހަރު ސޮއިކޮށްފައިވާ ފިލްމާ ބެހޭ މައުލޫމާތު މިހާތަނަށް އެއްވެސް މީޑިއާއަކާ ހިއްސާކޮށްފައެއް ނުވެއެވެ. ނަމަވެސް ފިލްމީ ޚަބަރުތައް ބުނާގޮތުން ރަންދީޕް ވަނީ އަލަށް ސޮއިކުރި ހޮލީވުޑްގެ ޕްރޮޖެކްޓުގެ މަސައްކަތް ފެށުމަށް ހަންގޭރީއަށް ފުރާފައެވެ. މި ފިލްމުގެ މަސައްކަތް އެ ޤައުމުގެ ވެރިރަށް ބުޑަޕެސްޓުގައި ވަރަށް އަވަހަށް ފެށުމުގެ ތައްޔާރީތައް ވަމުން އަންނަ ކަމަށް ރިޕޯޓުތައް ބުނެއެވެ. ރަންދީޕް އޭނާގެ ފުރަތަމަ ހޮލީވުޑް ފިލްމު "އެކްސްޓްރެކްޝަން"ގެ މަންޒަރެއްގައި--ފޮޓޯ/ކޮއިމޮއި ރަންދީޕްގެ ފުރަތަމަ ހޮލީވުޑް ފިލްމު "އެކްސްޓްރެކްޝަން" އަކީ މަޝްހޫރު ހޮލީވުޑް އެކްޓަރު ކްރިސް ހެމްސްވޯތާއެކު މުހިއްމު ރޯލެއް ކުޅުނު ފިލްމެކެވެ. ރަންދީޕަކީ އަބަދުވެސް ވަރަށް ތަފާތު، އަދި އެހާމެ މާނަ ފުން ކެރެކްޓާ ހިމެނޭ ފިލްމުތައް ކުޅެން ޝައުގުވެރިވާ އެކްޓަރެކެވެ. މިހާތަނަށް އޭނާ ކުޅެފައިވާ ގިނަ ފިލްމުތަކަކީ މާބޮޑު ބަޖެޓަކުން އުފައްދާފައިވާ ފިލްމުތަކަށް ނުވި ނަމަވެސް ރަންދީޕްގެ އެކްޓިންގް ހުނަރަށް ވަރަށް ގިނަ ބަޔަކު އަބަދު ވެސް ތައުރީފު ކުރެއެވެ. ފިލްމު ޑައިރެކްޝަނަށް ވެސް މިހާރު ނުކުމެފައިވާ އެކްޓަރު ދެން އެންމެ އަވަހަށް ފެންނާނީ ފިލްމީ ތަރި ސަނީ ޑިއޯލް މުހިއްމު ރޯލް ކުޅޭ ފިލްމު "ޖާތު"އިންނެވެ. މި ފިލްމު މި އަހަރުތެރޭ ރިލީޒްކުރާނެކަން އިއުލާނުކޮށްފައިވީ ނަމަވެސް ސިނަމާތަކަށް ފިލްމު ގެންނާނެ ވަކި ތާރީޚެއް އަދި ނުނިންމައެވެ.