މަސައްކަތް ހުއްޓިފައިވާ ޖަމިއްޔާތައް ހަރަކާތްތެރިވުމަށް އިތުރު ފުރުސަތެއް ދިނުމަށް ޒުވާނުން ބާރުވެރި ކުރުވުމާއި މައުލޫމާތާއި ފަންނާ ބެހޭ ވުޒާރާއިން މިއަދު ނިންމައިފިއެވެ. އެ ވުޒާރާއިން ބުނީ، 1971އިން 1991އަށް ރަޖިސްޓްރީ ކޮށްފައިވާ 55 މަދަނީ ޖަމިއްޔާއެއްގެ މަސައްކަތް މިހާރު ހުއްޓިފައިވާކަމަށެވެ. އެހެންކަމުން، ޖަމިއްޔާތަކުގެ ރަޖިސްޓްރާއަށް ހުށަހަޅަންޖެހޭ ލިޔެކިއުންތައް ގަވާއިދުން ހުށަހަޅާފައި ނުވުމުގެ ސަބަބުން މަސައްކަތް ހުއްޓިފައިވާ ޖަމިއްޔާތައް ހަރަކާތްތެރި ކުރުމަށް، ހުށަހަޅަންޖެހޭ ލިޔެކިއުންތައް ހުށަހެޅުމަށް ވަނީ ހަ މަސްދުވަހުގެ މުއްދަތެއް ދީފައެވެ. އެއީ މިއަދުން ފެށިގެން 20 ޖުލައި ވާ އާދީއްތަ ދުވަހުގެ 14:00ގެ ނިޔަލަށެވެ. ހަރަކާތްތެރިވުމަށް އިތުރު ފުރުސަތުވޭ ފުރަތަމަ 55 މަދަނީ ޖަމިއްޔާގެ ލިސްޓް އާންމުކޮށްފައިވާއިރު މި މުއްދަތު ތެރޭގައި ޖަމިއްޔާތައް ހަރަކާތްތެރި ނުވާނަމަ، އެފަދަ ޖަމްއިއްޔާތައް ޤާނޫނު ގައި ބަޔާންކުރާ ގޮތުގެމަތިން އުވާލުމުގެ މަސައްކަތް ކުރިއަށް ގެންދާނެކަމަށް އެ ވުޒާރާއިން ވަނީ ބުނެފައެވެ. އެހެންކަމުން މި ޖަމިއްޔާތަކުގެ ތެރެއިން، ހަރަކާތްތެރިވުމަށް ލިޔެކިޔުން ފުރިހަމަކުރަން ބޭނުންވާ ޖަމިއްޔާތަކުން ލިޔުންތައް އެ ވުޒާރާގެ މެއިލްއަށް އީމެއިލް ކުރެވޭނެ ކަމަށް އެ ވުޒާރާއިން ވަނީ ބުނެފައެވެ. އަދި އިތުރު މައުލޫމާތު ހޯއްދެވުމަށް ރަސްމީ ގަޑީގައި 4000488، 4000497 ނަމްބަރު ފޯނަށް ގުޅައި، އިތުރު މައުލޫމާތު ވެސް ސާފު ކުރެވޭނެއެވެ. ލިޔެކިޔުންތައް ފުރިހަމަނުވާ ޖަމިއްޔާތައް އުވާލަން ކުރި އިއުލާން، ޒުވާނުން ބާރުވެރި ކުރުވުމާއި މައުލޫމާތާއި ފަންނާ ބެހޭ ވުޒާރާއިން ވަނީ މީގެކުރިން ބާތިލުކޮށްފައެވެ. ވުޒަރާއިން އެ އިއުލާނު ބާތިލްކޮށްފައި ވަނީ، ދީނީ ހޭލުންތެރިކަން އިތުރު ކުރުމަށް މަސައްކަތްކުރާ ޖަމިއްޔާއެއް ކަމަށްވާ ސަލަފް އުވާލަން ނިންމީ އެ ވުޒާރާއިން ބަލަން ޖެހޭ ކަންކަން ރަނގަޅަން ނުބަލާ ކަމަށް ސަލަފުން ބުނެފައި ވަނިކޮށެވެ.