ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ވެސް މެންބަރުކަން ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލްކުރަން އެދި ސުޕްރީމް ކޯޓަށް ހުށަހެޅުއްވި މައްސަލައިގައި އެ ކޯޓުން އަވަހަށް ގޮތެއް ނިންމަންޖެހޭ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން މިއަދު ވިދާޅުވެއްޖެއެވެ. ގާނޫނުއަސާސީއަށް އިސްލާހުތަކެއް ސަރުކާރުގެ ފަރާތުން ހުށަހެޅީ މިދިޔަ އަހަރުގެ ނޮވެންބަރު 20ވަނަ ދުވަހެވެ. ގާނޫނުއަސާސީއަށް ގެނައި މައިގަނޑު ތިން އިސްލާހު މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭ ގޮތް ހެދުން ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުން ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ހެދުން ހަމަ އެ ދުވަހު މި ތިން އިސްލާހު ވެސް މުޅި މަޖިލީހުގެ ކޮމިޓީން ފާސްކޮށް، ހަވީރު ތަޅުމުން ފާސްކުރިއެވެ. އިރުއްސުނު ވަގުތު ރައީސް ޑރ. މުހައްމަދު މުއިއްޒު އެ ބިލު ތަސްދީގު ވެސް ކުރެއްވިއެވެ. ކެންދޫ ދާއިރާގެ ކުރީގެ މެމްބަރު އަލީ ހުސައިން -- ފޮޓޯ/ މަޖިލިސް މިހާރު އެ ގާނޫނަށް އަމަލުކުރަމުން އަންނައިރު، މެންބަރަކު އިންތިޚާބުވި ޕާޓީން އަމިއްލައަށް ވަކިވެއްޖެ ނަމަ ގޮނޑި ގެއްލޭނެއެވެ. އަދި އެ މެންބަރަކު ނިސްބަތްވާ ޕާޓީން ވަކިކޮށްފި ނަމަވެސް ގޮނޑި ގެއްލޭނެއެވެ. މި މައްސަލައިގައި ކަންބޮޑުވުން އުފެދިފައި އޮތީ މި ހިސާބުންނެވެ. މި ކަމާ ގުޅިގެން ގާނޫނީ ދާއިރާގެ ބޭފުޅުންނާއި އިދިކޮޅު ސިޔާސީ ފިކުރުތަކަށް ނިސްބަތްވާ ބޭފުޅުންގެ މެދުގައި ކަންބޮޑުވުން އުފެދިފައި އޮއްވައި، މި ގާނޫނު ބާތިލްކުރަން ސުޕްރީމް ކޯޓަށް ހުށަހެޅުއްވީ އަލީ ހުސައިނެވެ. އޭނާ މި މައްސަލަ ސުޕްރީމް ކޯޓަށް ހުށަހެޅުއްވީ މިދިޔަ ނޮވެމްބަރު މަހުގެ 24ވަނަ ދުވަހުއެވެ. ނަމަވެސް، މިއަދާ ހަމައަށް ވެސް މި މައްސަލަ ބަލަން ފަށާފައެއް ނުވެއެވެ. މި މައްސަލައާ ގުޅޭ ގޮތުން އޭނާ މިއަދު "ސަން"އަށް ވިދާޅުވީ ކޯޓުގައި އަދި މި މައްސަލަ ނުފެށުނަސް، މިއީ ވަރަށް އަވަހަށް ބަލައި ނިންމަންޖެހޭ މައްސަލައެއް ކަމަށެވެ. "...ސުޕްރީމް ކޯޓުން މައްސަލަ ސީރިއަސްކޮށް ހިންގަވައިގެން ހަތް ފަނޑިޔާރުންގެ ބެންޗަކުން އަވަސް ފުރުސަތެއްގެ ތެރޭގައި އެ ބައްލަވާނެ ކަމަށް އުންމީދުކުރަނީ... އިހަކަށް ދުވަހު ރިސެސްއިން އެ އައީ. ޕެންޑިންގައި ވެސް ބައިވަރު މައްސަލަތައް ހުންނާނެ. އެ އޮންނަ އުސޫލުގެ ތެރެއިން ބައްލަވާނެ ކަމަށް މި ބަލަނީ" އަލީ ހުސައިން ވިދާޅުވިއެވެ. އޭނާ ވިދާޅުވި ގޮތުގައި ދައުލަތުގެ ބާރުތައް ވަކިވެފައި އޮތްއޮތުން ދެމެހެއްޓުމަށް ޓަކައި ވެސް މި މައްސަލަ ވަރަށް މުހިންމެވެ. ސުޕްރީމް ކޯޓަށް އަލީ ހުށަހެޅުއްވި މައްސަލައިގައި ވަނީ، ގާނޫނަށް ގެނައި އިސްލާހު، ގާނޫނު އަސާސީގެ ފަސް މާއްދާއަކާ ޚިލާފު ކަމަށެވެ. އެއީ ހަތަރުވަނަ މާއްދާއާއި އަށްވަނަ މާއްދާއާއި 26 ވަނަ މާއްދާއާއި 75 ވަނަ މާއްދާ އަދި 90 ވަނަ މާއްދާއެވެ. މި މައްސަލައަށް ތަދައްޚުލުވާން އިދިކޮޅު އެމްޑީޕީއާއި ދަ ޑިމޮކްރެޓްސްއިން ވެސް ވަނީ ނިންމައިފައެވެ. ގާނޫނުއަސާސީއަށް ގެނައި އިސްލާހުތަކާ ގުޅިގެން ކުރީގެ ބަންޑާރަނައިބު ފާތިމަތު ދިޔާނާ ސައީދު ވެސް މީގެ ކުރިން ވަނީ ސުޕްރީމް ކޯޓަށް މައްސަލަ ހުށަހަޅަން ގޮވާލައްވައިފައެވެ. ކުރީގެ އުއްތަމަފަނޑިޔާރު ޑރ. އަހުމަދު ޢަބްދުﷲ ދީދީ ވެސް ވަނީ މެންބަރުން ވަކިކުރެވޭނީ ރައްޔިތުންގެ ވޯޓަކުން ކަމަށް ގާނޫނުއަސާސީ ބަދަލުކުރަން ޖެހޭ ކަމަށް ވިދާޅުވެފައެވެ. އެކަމަކު، ސަރުކާރު ހިންގާ ޕީއެންސީން އަންނަނީ އެ އިސްލާހު ދިފާއުކުރަމުންނެވެ. އެ ގޮތުން، މެންބަރުން ވަކިކުރުމުގެ ބާރު ޕާޓީތަކުގެ ކޮމިޓީތަކަށް ނުދޭނެ ކަމަށާއި ޕާޓީތަކުން މެންބަރުން ވަކިކުރެވޭނެ ގޮތުގެ ގާނޫނެއް އެކުލަވައިލާނެ ކަމަށް މަޖިލީހުގެ ރައީސް އަބްދުއްރަޙީމް އަބްދުﷲ ވިދާޅުވެފައިވެއެވެ.