ރާއްޖެއިން ބޭރަށް މަސް އެކްސްޕޯޓް ކުރުމުގައި މިފްކޯއަށް ދިމާވާ ދަތިތައް ހައްލުކުރުމަށް މަސްވެރިކަމާބެހޭ ވުޒާރާގައި މިއަދު ބައްދަލުވުމެއް ބާއްވައިފިއެވެ. މި ބައްދަލުވުމުގައި މިފްކޯގެ އިތުރުން މޯލްޑިވްސް ޕޯޓްސް ލިމިޓެޑް (އެމްޕީއެލް) އަދި މޯލްޑިވްސް ސްޓޭޓް ޝިޕިންގ (އެމްއެސްއެސް) ގެ އިސްވެރިން ބައިވެރިވެ ވަޑައިގެންނެވިއެވެ.ބައްދަލުވުމުގައި މަޝްވަރާކުރެވުނު މައިގަނޑު ކަންތައްތަކުގެ ތެރޭގައި މިފްކޯއިން އެކްސްޕޯޓް އޮޕަރޭޝަން ފުޅާކުރުމަށް ބޭނުންވާކަން ފާހަގަކުރެވުނެވެ. އަދި މިހާރު ރީފަރ ކޮންޓެއިނަރ ބެހެއްޓުމުގެ ޖާގައިގެ ދަތިކަން ހުރިކަންވެސް ފާހަގަކުރެވުނެވެ. މި ދަތިތ މި ދަތިތައް ހައްލުކުރުމަށްޓަކައި މިފްކޯގެ ބަނދަރުތަކުން މަސް އެކްސްޕޯޓްކުރެވޭނެ އިންތިޒާމު ހަމަޖެއްސުމަށް ހުށަހެޅުނެވެ. މި ހުށަހެޅުމަށް މަސްވެރިކަމާބެހޭ ވަޒީރު ތާއީދުކުރެއްވިކަން ފާހަގަކޮށްލެވެއެވެ.މިހާރު މަސް އެކްސްޕޯޓްކުރަމުން ގެންދަނީ އެމްއެސްއެސްގެ ބޯޓުތަކުގައި ކަމަށް މަޢުލޫމާތު ލިބިފައިވެއެވެ. ނަމަވެސް މި ބައްދަލުވުމުގައި ކުރެވުނު މަޝްވަރާތަކާ ގުޅިގެން މަސް އެކްސްޕޯޓްކުރުމުގެ މަސައްކަތް އިތުރަށް ހަރުދަނާވެ، ފުޅާވެގެންދާނެ ކަމަށް އުއްމީދުކުރެވެއެވެ.މަސްވެރިކަމާބެހޭ ވުޒާރާއިން މިކަމާ ގުޅޭގޮތުން ބުނެފައިވަނީ މި ބައްދަލުވުމަކީ މަސް އެކްސްޕޯޓްކުރުމުގައި ދިމާވާ ލޮޖިސްޓިކަލް ގޮންޖެހުންތައް ހައްލުކުރުމަށް ބޭއްވުނު ވަރަށް މުހިންމު ބައްދަލުވުމެއް ކަމަށެވެ. އަދި މި ބައްދަލުވުމުގެ ސަބަބުން މަސް އެކްސްޕޯޓްކުރުމުގެ މަސައްކަތް ފަސޭހަވެގެންދާނެ ކަމަށް އުއްމީދުކުރެވޭ ކަމަށެވެ.