އިންޑިއާގެ ހުޅަނގު ބެންގޯލް ސްޓޭޓުގައި ނުރައްކާތެރި ނިޕާ ވައިރަސްގެ ކޭސްތަކެއް ފެނުމާ ގުޅިގެން، ރާއްޖޭގެ ހާލަތު ވެސް މޮނިޓާކުރަމުންދާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިރޭ ބުނެފި އެވެ.
ވީކިހިނެއް؟ - އިންޑިއާގެ ވެސްޓް ބެންގޯލަކީ ދިވެހިން އާންމުކޮށް ދަތުރުކުރާ ސަރަހައްދަކަށް ވެފައި އިންޑިއާއިން ގިނަ އަދަދެއްގެ ފަތުރުވެރިން ރާއްޖެއަށް ދަތުރުކުރާތީއާ އެކު، އެޗްޕީއޭން ވަނީ ބަޔާނެއް ނެރެފަ އެވެ.
ތަފްސީލް - ވެސްޓް ބެންގޯލްއިން ނިޕާ ވައިރަހަށް މި މަހު ޕޮޒިޓިވްވި ތިން މީހުންނާ ކޮންޓެކްޓްވި 180 އަށް ވުރެ ގިނަ މީހުން ދެނެގަނެ އެ އެންމެން ވެސް ކަރަންޓީނު ކޮށްފައިވާ ކަން އެޗްޕީއޭއިން ނެރުނު ބަޔާނުގައި ފާހަގަކޮށްފައިވެ އެވެ.
އޭގެ އިތުރު ކޭސްތަކެއް ފެނިފައިނުވާއިރު، އިންޑިއާގެ އިތުރު ސަރަހައްދަކުން އަދި ދުނިޔޭގެ އެހެން ގައުމަކުން ވެސް އެ ބަލީގެ ކޭސްއެއް ރިޕޯޓްކޮށްފައި ނެތްކަން އެޗްޕީއޭއިން ފާހަގަކުރި އެވެ. އެހެންވެގެން އަދި މާ ބޮޑު ނުރައްކަލެއް ނެތް ކަމަށް އެޗްޕީއޭން ބުންޏެވެ.
"މި ވަގުތު ރާއްޖެއަށް މި ބަލީގެ ނުރައްކާ އޮތް މިންވަރު ކުޑަ ނަމަވެސް މި އެޖެންސީން ދަނީ ހާލަތު މޮނިޓާކުރަމުން،" އެޗްޕީއޭގެ ބަޔާނުގައިވެ އެވެ.
އޭގެ އިތުރުން އެޗްޕީއޭއިން ބުނީ:
މި ބަލީގެ އެއްވެސް ކޭސްއެއް އަދި ކޮންޓެކްޓްވިކަމުގެ ރިޕޯޓެއް އެޗްޕީއޭއަށް ލިބިފައެއް ނުވޭ
ނަމަވެސް ވެސްޓް ބެންގޯލްއަށް ދަތުރުކުރާ މީހުން މިކަމަށް ސަމާލުވުމަށް އިލްތިމާސްކުރާ ކަމަށް
އެނގުން މުހިންމު - ޖަނަވާރުންގެ ފަރާތުން އިންސާނުންނަށް ފެތުރޭ ނިޕާ ވައިރަހަށް ވަކި ހާއްސަ ވެކްސިނެއް ނުވަތަ ފަރުވާއެއް ހޯދިފައެއް ނުވެ އެވެ. މިއީ ބަލިޖެހޭ މީހުންގެ %40 އާއި %75އާ ދެމެދުގެ އަދަދެއްގެ މީހުން މަރުވުން އެކަށީގެންވާ ފަދަ ނުރައްކާތެރި ބައްޔެކެވެ.
މި ވައިރަސް އާންމުކޮށް ފެތުރެނީ އޫރާއި ވާ ފަދަ ޖަނަވާރުންގެ ފަރާތުންނެވެ. މީގެ އިތުރުން، ތަގައްޔަރުވެފައިވާ ކާނާގެ ޒަރީއާއިންނާއި އެކަކު އަނެކަކުގެ ގައިން ވެސް މި ބަލި ފެތުރެ އެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗުއޯ) އިން ވަނީ، ބޮޑު ވަބާއަކަށް ބަދަލުވުމުގެ ފުރުސަތު އޮތުމުން، ކޮވިޑާއި ޒިކާ ފަދަ ބަލިތަކާ އެކު ނިޕާ ވައިރަސް 'ޓޮޕް 10 ޕްރަޔޮރިޓީ' ބަލިތަކުގެ ތެރޭގައި ހިމަނާފަ އެވެ.