އދ. އަތޮޅުގައި އޮންނަ ހިމާޔަތްކޮށްފައިވާ 'ސައުތުއަރި މެރިން ޕްރޮޓެކްޓެޑް އޭރިއާ' (ސަމްޕާ) ސަރަހައްދުގައި، މޫދު ކުޅިވަރުގައި ބޭނުން ކުރާ އިންޖީނުލީ އުޅަނދު ދުއްވުން މަނާކޮށްފި އެވެ.
ވީ ކިހިނެއް؟ - މީގެ 17 އަހަރު ކުރިން، 2009ގައި ހިމާޔަތްކުރި ސަމްޕާ ސަރަހައްދުގެ ގޮތުގައި ހިމެނެނީ އދ. ރަންގަލި ފަރުގެ ހުޅަނގު އުތުރުން ފެށިގެން އެ އަތޮޅު ދިގުރަށުގެ އުތުރު ކަނާ ދެމެދު ހުރި ރަށްރަށުގެ ފަރުގެ ބޭރު ތޮށިން ފެށިގެން 1 ކިލޯމީޓަރުގެ ސަރަހައްދެކެވެ. މިއީ ރާއްޖޭގައި އެންމެ ގިނަ އަދަދަކަށް ފެހުރިހި އުޅޭ ސަރަހައްދެވެ.
ސަމްޕާ ސަރަހައްދު، ރައްކާތެރިކޮށް ދެމެހެއްޓުމާ ބެހޭ މެނޭޖްމަންޓް ޕްލޭން މިދިޔަ އަހަރުގެ ފެބުރުއަރީ މަހުގެ ތެރޭގައި ޝާއިއުކޮށްފައިވާއިރު މިއަދު ވަނީ އެ ޕްލޭނަށް ބައެއް އިސްލާހުތައް ގެނެސްފަ އެވެ.
އޭގެ ތެރެއިން ފާހަގަކޮށްލެވެނީ، އެ ސަރަހައްދުގައި މޫދު ކުޅިވަރުގައި ބޭނުން ކުރާ އިންޖީނުލީ އުޅަނދުފަހަރު ދުއްވުން މަނާކުރުމެވެ.
ތަފްސީލް - އިސްލާހުގައި ބުނެފައިވާ ގޮތުގައި، އިންޖީނުލީ އުޅަނދުފަހަރުގެ ގޮތުގައި މާނަކޮށްފައިވަނީ:
ޖެޓްސްކީ
ޖެޓް ކާރު ފަދަ އުޅަނދު
މި ސަރަހައްދުގައި ދުއްވާ ސްނޯކަލް އަދި ޑައިވް ދޯނިފަހަރާއި ލޯންޗުތައް އަދި އެހެން އުޅަނދުތަކުގެ ބުރަފަތީގައި ޕްރޮޕެލާ ގާޑު ހަރުކުރުމަކީ މަޖުބޫރު ކަމެކެވެ. މީގެ ކުރިން ބުރަފަތީގައި ޖެހިގެން އިންސާނުންނާއި ފެހުރިއްސަށް ވެސް އަނިޔާވެފައިވެ އެވެ.
އާ އިސްލާހުގައި ވަނީ ޕްރޮޕެލާ ގާޑު ހަރުކުރުމަށް އެންމެ ފަހުގެ މުއްދަތެއް ދީފަ އެވެ. އޭގައި ބުނެފައިވާ ގޮތުގައި، އަންނަ ޖޫން މަހުގެ 30ގެ ކުރިން ގާޑު ހަރުކުރަން ޖެހޭއިރު، އޭގެ ފަހުން އެ ސަރަހައްދުގައި ހަރަކާތްތެރިވެވޭނީ ޕްރޮޕެލާ ގާޑު ހަރުކޮށްފައިވާ ނުވަތަ ޖެޓް އިންޖީނުލީ އުޅަނދުތަކަށެވެ.
މީގެ އިތުރުން ގެނެސްފައިވާ ބައެއް އިސްލާހުތަކަށް ބަލާއިރު:
އެ ސަރަހައްދުގައި ދުއްވާ ސްނޯކަލް އަދި ޑައިވިން ދޯނިފަހަރު، ކޮންޓެކްޓް ޒޯނުގައި ހަރަކާތްތެރިވާއިރު ދިދައެއް ނަގަން ޖެހޭއިރު، ދިދަ ދޫކުރާނީ ކަމާ ގުޅޭ އިދާރާއިން؛ އެގޮތުން ދޫކުރާނީ ކޮންމެ ރިސޯޓަކަށް، ކޮންމެ ޑައިވް ސެންޓަރަކަށް، ކޮންމެ ސަފާރީއަކަށް އެއް ދިދަ ސެޓް
ސެޓްގައި ހިމެނޭނީ ޑައިވް ކުރުމަށް ބޭނުން ކުރާނެ ދިދަ އާއި ސްނޯކަލް ކުރާއިރު ބޭނުން ކުރާނެ ދިދަ
ސަމްޕާގައި ކޮންމެ ބަޔަކަށް ވެސް ސްނޯކަލް ކުރުމަށް ނުވަތަ ޑައިވް ކުރުމަށް އެންމެ ގިނަވެގެން ހޭދަކުރެވޭނީ 15 މިނިޓް ކަމަށް ކުރިން ކަނޑައަޅާފައި އޮތް ނަމަވެސް، މިހާރު އޮތް ގޮތުން ކިޔޫގައި އެހެން ބަޔަކު ނެތް ނަމަ އެއަށް ވުރެ ގިނައިރު ހޭދަކުރެވޭނެ