"ހެނދުނު އޮފީހަށް ދާން ނުކުތީއްސުރެ އަންހެންކުދިން ދައްކާ ވާހަކައަކީ ގާސިމްގެ ވާހަކަ އެވެ."
ކޮން އޮފީހެއް ހެއްޔެވެ؟ ގާސިމް އިބްރާހިމްގެ އަނބިކަނބަލުން ރާބިއާ ހުސެއިން ވަޒީފާ އަދާކުރެއްވި ލޭންޑް ރެޖިސްޓްރޭޝަން އޮފީހެވެ.
ގާސިމްގެ ބައޮގްރަފީ ބުނާ ގޮތުން އޭނާއަކީ މާލޭގެ ޒުވާން އަންހެނުންގެ ތެރޭގައި އެންމެ މަޝްހޫރު އެކެކެވެ. އޭރު އޭނާ ވަޒީފާ އަދާކުރެއްވީ އެމްޖީބީއެސް (އެސްޓީއޯގެ ނަމަށް ބަދަލުކުރުމުގެ ކުރިން ސަރުކާރުގެ ވިޔަފާރި ކުންފުނި)ގެ ތިން ނަންބަރު ފިހާރައިގަ އެވެ. އެއީ އެ ފިހާރައިގެ މެނޭޖަރެވެ.
ފޮތުގައި ލިއެފައި އޮތް ގޮތުން ނަމަ އޭނާ މަޝްހޫރުވަނީ ފިހާރައަށް ވަޑައިގަންނަވާ އިރު ޖައްސަވާ ސެންޓުގެ މީރު ވަހާއި ހެދުން އަޅުއްވާލެއް ރީތިކަމުންނެވެ.
"ގާސިމް އޮފީހަށް ދާން ނުކުތީމާ، މުޅި އޯކިޑް މަގުގައި ހުންނަނީ އޭނާ ޖަހާފައި ހުންނަ މީރު ވަސްދުވާ ސެންޓަކުން އެއްވަސްވެފަ އެވެ،" ފޮތުގައި ލިއުނެވެ.
"ހެދުން އަޅުއްވާ ގޮތާ މެދު ވެސް އަންހެން ކުދިން ވާހަކަ ދައްކަ އެވެ. ވަރަށް ނަލަކޮށް ހެދުން އަޅުއްވައިގެން އަބަދުވެސް ހުންނަވަނީ ވަރަށް ތާޒާކޮށެވެ."
އެކަމަކު ގާސިމްގެ އެ ނަލަކަން ގެެނެސްދޭ ގަމީހާއި ފަޓުލޫނަކީ މުޅިން އޭނާ ބައްލަވައިގަންނަވާ އެއްޗިއްސެއް ވެސް ނޫނެވެ. އެއީ އޭރު ސަރުކާރުގެ އިސް ވެރިއެއް ކަމަށްވާ އަދި ގާސިމްގެ އަމިއްލަ ގެ ހެއްދެވުމުގެ ކުރިން އެކި ފަހަރު މަތިން އުޅުއްވި އެންދެރިމާގޭގެ އެންމެ މަޝްހޫރު ޝަހުސިއްޔަތު އިލްޔާސް އިބްރާހިމް، ގާސިމް ވިދާޅުވާ ގޮތުން ނަމަ 'އިލްޔާސްބެ' ބޭނުންކުރެއްވި ގަމީހާއި ފަޓުލޫނެވެ.
ފޮތުގައި ލިއުނެވެ: އިލްޔާސް ލައްވާފައި ވަރަށް އާކޮށް ހުންނަ، ރީތި ގަމީހާއި ފަޓުލޫނު އިލްޔާސްގެ އަނބިކަނބަލުން ކޮލިގޭ ނާސިރާ ގާސިމަށް ދެއްވަ އެވެ. ގާސިމް ހެނދުނު ހެދުމެއް، މެންދުރުފަހު ވަކި ހެދުމެއް އަނެއްކާ ހަވީރަށް ވެސް ވަކި ހެދުމެއް ލައިގެން ހުންނަވާ ވާހަކަ އާއި އަންހެން ކުދިންނަށް އޭނާ ރީތިވެގެން ވާހަކަ ދައްކާއިރު، އޭނާ ދަންނަ ފިރިހެނުން ދިމާކުރަންވެގެން، ހިތުން އިލްޔާސް ހެދިގެން އުޅެނީއޭ ކިޔަ އެވެ.
ރާބިއާގެ އޮފީހާއި ގާސިމްގެ ފިހާރަ ހުންނަނީ މާ ދުރަކު ނޫނެވެ. ގާސިމަށް ރާބިއާ ފެނިވަޑައިގަންނަވަނީ އޮފީހަށް ވަޑައިގަންނަވާއިރު މަގުމަތިންނެވެ. ރާބިއާއަށް ބަލަހައްޓަވައިގެން ހުންނަވަ އެވެ. ބައެއް ދުވަސްދުވަހު ބައިސްކަލްގައި 'ރާބިއާގެ ފަހަތުން އަޅުވާލައްވަ އެވެ." 
އޭރު ގާސިމް ހުންނެވީ ތިން ކައިވެންޏެއް ކުރެއްވިޔަސް ޒަވާޖީ ހަޔާތުގައި ނާކާމިޔާބުވެވަޑައިގެންފަ އެވެ. ތިންވަނަ ކައިވެނި ރޫޅުމުން ގާސިމް ކަނޑައެޅުއްވި އަޒުމެއް އޮތެވެ.
"ދެން ކައިވެންޏެއް ކުރެއްވިޔަސް ކުރައްވާނީ ހަޔާތަށްޓަކަ އެވެ. ދިރިއުޅުމެއް ހޯއްދަވާށެވެ."
އެ ދިރިއުޅުމަށް ފެތޭ އަންހެނަކަށް ގާސިމަށް ފެނިވަޑައިގަތީ ރާބިއާ އެވެ. ދެ ބޭފުޅުން ކައިވެނިކުރެއްވީ 1974ގަ އެވެ. އެކައިވެންޏަށް ނިމުމެއް ނުގެންނަވަ އެވެ. އޭގެ ފަހުން އެއްފަހަރާ ހަތަރު އަނބިކަނބަލުން ގެންގުޅުއްވާ އިރު ވެސް ގާސިމްގެ ލޯބިން ރާބިއާ ވަތްކެއްނުކުރައްވަ އެވެ. މާފަންނު ވިލާ ހިއްކަވައިގެން ގާސިމްގެ އަމިއްލަ ގެކޮޅު ބިނާކުރައްވައި އެގެއަށް ރާބިއާގެ ދިރިއުޅުން ބަދަލުކުރެއްވި ގޮތަށް އެއީ އެކަމަނާ އާއި ގާސިމްގެ ކައިވެނީގެ ހާއްސަ ރަމްޒެވެ.
އެކަމަކު ގާސިމަކީ އޭނާގެ ހިތްކިޔައިފި ނަމަ އެ އަންހެނަކު ހޯއްދެވުމުގެ އަޒުމް ވަރުގަދަ 'ލޯބިވެރިއެއް' ނޫނޭ ބުނެވޭކަށް ނެތެވެ. އަތްމަތި ތަނަވަސްވުމާ އެކު އޭނާ ގެންދެވީ ފަހަަރަކު ކައިވެންޏެއް ކުރައްވަމުންނެވެ. ރާބިއާގެ ނުގަބޫލުގައި ދެ އަންބަށް މީހަކާ އިނެވެ. އެ ކައިވެނި މާ ގިނަ ދުވަހެއް ނުވެ ރޫޅުނީ އެވެ.
އޭގެ ފަހުން ދެން ގާސިމް ހިޔާރުކުރެވީ ޖަލީލާ ފަރުޒާނާ އެވެ.
ލޯބިވެރިންގެ ހިތް އަތުލައްވަން ގާސިމް އެކި ފަހަރު ކުރައްވަނީ އެކި ކަންކަމެވެ.
ރާބިއާއާ ރައްޓެހިވާންވެގެން، ވިއްސާރަ ދުވަހެއްގައި ގޮސް، ވެންނެވީ ރާބިއާގެ ގެއަށެވެ. އެއީ އަމިއްލައަށް ތައާރަފުވުމުގެ އިސްނެންގެވުމެކެވެ. އެކަމަކު ރާބިއާއަށް އެ ލޯތްބަށް އެއްބަސްވެވުނީ އަދި ތަންކޮޅެއް ފަހުންނެވެ.
ޖަލީލާއަށް ގާސިމްގެ ހުށައެޅުން ދިޔައީ އެހެން ސިފައެއްގަ އެވެ.
އެއް ދުވަހަކު އެނދުގައި އޮށޯއްނަވަންވެގެން ބާލިސް ރަނގަޅުކޮށްލެއްވި ވަގުތު ބާލީސް ދަށުން ޖަލީލާއަށް ފެނިވަޑައިގަތީ ސިޓީއެކެވެ: އޭގައި ގާސިމް އެނދިވަޑައިގެންފައި އޮތީ ކައިވެންޏަށެވެ. އެކަމަކު ސްކޫލް ހިންގުމުގެ ދާއިރާއިން ސްކޮޓްލެންޑްގައި ކިޔަވާވިދާޅުވެގެން ހުންނެވި ޖަލީލާއަށް ފެނިވަޑައިގަތީ ގާސިމްގެ ހުރި އުނި ސިފައެކެވެ: މާ ގިނައިން މީހުންނާ ކައިވެނިކުރެއްވުމެވެ. އޭނާ ގަބޫލުކުރެއްވި ގޮތުގައި އެއީ ގާސިމްގެ 'ހަރުދަނާކަމެއް ނެތުމެ'ވެ.
ނަމަވެސް އަހަރެއް ފަހުން ގާސިމްއާ ދެ އަންބަަށް ކައިވެނި ބައްލަވައިގަތެވެ.
އޭރުގެ އަމިއްލަ އެންމެ ބޮޑު އެއް ސްކޫލް އެމްއީއެސްގައި ތައުލީމު ހާސިލްކުރައްވަމުން ގެންދެވި އަސްމާ އެންމެ ފުރަތަމަ ގާސިމަށް ފެނިވަޑައިގަންނަވަނީ މާފަންނު ފެން ތާނގިން ގެޔަށް ފެން ގެންދަވަނިކޮށެވެ. އޭނާގެ ކޮއްކޮ ވެސް ކައިރީގައި ހުއްޓެވެ. ގާސިމް އިންނެވީ ކާރުގައި، އެހެން ރައްޓެއްސަކާ އެކުގަ އެވެ. (ކިއުންތެރިންގެ މައުލޫމާތަށް: މާލޭގެ ގޭގެއަށް 1995ގައި ފެން ހޮޅި ނުގުޅާ އިރު ގިނަ ގޭގެއަށް ތާޒާ ފެން ގެންދާނީ މާލޭގެ އެކި ހިސާބުތަކުގައި ހުންނަ ވާރޭފެން ތާނގީތަކުންނެވެ. ފެން އުފުލުމަކީ އަންހެންވެރިންގެ ކަމަކަށް އޮންނަނީ ވެފަ އެވެ.)
ދެ ކުދިންގެ ކައިރިން މަޑުމަޑުން ކާރު ދުއްވާފައި ދަމުން 'ހަލޯ'އޭ ގާސިމް ވިދާޅުވި އެވެ. އެކަމަކު އެ 'ހަލޯ'އަށް އަސްމާ އައީ ރުޅި އެވެ.
އޭގެ ފަހުން ގާސިމް ބައްދަލުކުރެއްވީ އަސްމާގެ ބައްޕަ އާއި މަންމައާ އެވެ. ގާސިމް ބޭނުންފުޅުވީ އެ ޒުވާން އަންހެން ކުއްޖާއާ ކައިވެނިކުރައްވާށެވެ. އެކަމަށް ދެމަފިރިން ރުހިގަބޫލުވި އެވެ.
ގްރޭޑް ހަތެއްގައި ކިޔަވަމުން ދަނިކޮށް ސްކޫލުން ކެނޑިގެން ޒަވާޖީ ހަޔާތެއް ފައްޓަވަން ޖެހިވަޑައިގަތުމަކީ އަސްމާއަށް މައްސަލައެކެވެ. އެކަމަކު އެއީ ރާއްޖޭގެ ގިނަ އަންހެން ކުދިންނަށް އެ ޒަމާނުގައި މަޖުބޫރުވި އިހުތިޔާރެކެވެ. ރަނގަޅު ފިރިހެނަކު ދަރިފުޅުގެ ކައިވެންޏަށް އެދުމާ އެކު ގިނަ މައިންބަފައިން އަވަހަށް އެކަމަށް އެއްބަސްވެ، ދަރިން ކިޔެވުމާ ވެސް ދުރުކުރެ އެވެ.
އުމުރުން 16 އަހަރުގެ އަސްމާގެ ކައިވެންޏަށް އެދިވަޑައިގެންފައި އެވަނީ އާދައިގެ ބޭފުޅެއް ނޫނެވެ. އެހެންކަމުން ގާސިމްގެ ތިން ވަނަ އަންބަކަށް އޭނާ އެންމެ ފަހުން ވެވަޑައިގަތެވެ.
މިއީ މުޅިން ވެސް 1980ގެ އަހަރުތަކުގައި ގާސިމްގެ ލޯބީގެ ދުނިޔެއަށް ބެބުޅުން ގެނެސްދިން ކައިވެނިތަކެވެ.
ގާސިމްގެ ފޮތުގައި އޮތް ގޮތުން ނަމަ މީގެ ތެރެއިން އަސްމާގެ ޝަކުވާތައް ބޮޑުވި އެވެ. ގާސިމްގެ ނަޒަރުގައި އެހެން ދިމާވީ ވަރަށް ޒުވާން އުމުރު ދެ ކުދިންނާ އެކު އެކަނި އުޅުއްވަން ޖެހިވަޑައިގަތުމުގެ ބުރައާ ހެދި އެވެ.
އާންމުންނަށް ހީވެދާނެ އެވެ: މުއްސަނދިންނަށް ގިނަ އަނބިން ގެންގުޅުމަކީ ނުލާހިކު ފަސޭހަ ކަމެކެވެ. ދިރިއުޅުމުގެ ކަންކަން ހަމަޖެހިފައި ހުންނާތީ އަނބިން ތިބޭނީ އުފަލުން އަދި އެހާމެ ހިތްހަމަޖެހިފައި ކަމެވެ.
ނަމަވެސް މިއީ ހަގީގީ ދުނިޔޭގައި ކައިވެނީގެ ގުޅުންތަކާއި ސުލްހަ ބިނާވެފައި އޮންނަ އުސޫލެއް ނޫނެވެ. ކޮންމެ އަންބަކު ވެސް (ހަމަ އެގޮތަށް ކޮންމެ ފިރިއަކު ވެސް) ބޭނުންވާނީ އެމީހެއްގެ ކައިރީގައި ބައިވެރިޔާ އަބަދުވެސް ހުންނާށެވެ. އެހީތެރިވުމާއި ހިޔާލު ބަދަލުކުރުމާއި ކޮންމެ ދުވަހަކު ވެސް އެކުގައި އުޅޭށެވެ.
އަސްމާއާ ކައިވެނި ބައްލަވައިގަން އިރު ގާސިމްގެ ވިޔަފާރި، ތެލުން، ގޭހުން، ސިމެންތިން، ޓިނުން، ލަކުޑިން އަދި ޝިޕިންގެ ދާއިރާގައި ފުޅާވަމުން ގޮސް ޓޫރިޒަމަށް ވެސް ވަދެއްޖެ އެވެ.
ތިން އަނބިންގެ އިތުރުން ހަ ކުދިންނެވެ. އެއިން އެއްވެސް ބޭފުޅަކަށް ގާސިމް އެންމެ ބޭނުންފުޅުވާ ގޮތަށް ވަގުތެއް ނުދެއްވެ އެވެ. އޭނާ އެކަން ގަބޫލުފުޅުކުރައްވަ އެވެ.
"މަސައްކަތުގައި އުޅުއްވާފައި ވަރުބަލިފުޅުވެގެން ހުންނަވައި ގެއަށް ވަޑައިގަންނަވާ ތަނުން އަސްމާގެ ޝަކުވާތަކާ ކުރިމަތިލައްވަން ޖެހިވަޑައިގަނެ އެވެ. އެކީގައި އުޅުއްވަން ވަގުތު ނުދެއްވެންޏާ އޭނާ ބޭނުންވީ ވަކިވާށެވެ،" ފޮތުގައި ލިއުނެވެ.
ވިސްނައިދޭން ގާސިމްކުރެއްވި މަސައްކަތް ވީ ނާކާމިޔާބީ އެވެ. އެކަމަކު ވަރިއަށް ފަހު ވެސް ދެ ދަރިން ގެންގުޅުއްވީ އަސްމާ އެވެ.
"އަސްމާއަކީ އަންބެއްގެ ގޮތުގައި ވަަރަށް އިހުލާސްތެރި، ހެޔޮ، އަދި ކުދިން ދެކެ ވަރަށް ބޮޑަށް ލޯބިވާ ހިތްވަރުދަ އަންހެން ބޭފުޅެކެވެ،" ތައުރީފް ކުރައްވައި، ގާސިމް ވިދާޅުވި އެވެ.
ތިންވަނަ އަންބެއް ގާސިމް ދެން ހޯއްދެވީ 1990ގެ އަހަރުތަކުގެ ކުރީކޮޅު އެވެ. އޭނާގެ ފޮތުގައި އޮތް ގޮތުން ނަމަ ފާތުމަތު ނަޝީދާ ފުރަތަމަ ފެނިވަޑައިގަންނަވަނީ ސިންގަޕޫރުން ރާއްޖެ ވަޑައިގެން ރައްޓެއްސަކާ އެކު ގާސިމް އެއާޕޯޓްގައި ހުންނަވަނިކޮށެވެ.
"ފަހަތުން އަންނަ ދެ އަންހެން ކުއްޖަކު ގާސިމަށް ވަރަށް އެބަ ބަލައޭ"، އެ ރަހުމަތްތެރިޔާ ބުނުމުން އޭނާ ވެސް ބައްލަވައިލެއްވީ އެވެ. ދެ ބޭފުޅުންގެ ހަތަރު ކަޅި ހަމަވި އެވެ. އެކަމަކު ނަޝީދާއާ ފުރަތަމަ ފަހަރަށް ބައްދަލުކުރެއްވުނީ އޭނާގެ އޭރުގެ ފިރިކަލުން މަޝްހޫރު ފުޓްބޯޅަ ރެފްރީ މައްލާ ޅަތުއްތުއާ އެކު ގާސިމްގެ އޮފީހަށް ވަޑައިގަތުމުންނެވެ. (ކިއުންތެރިންގެ މައުލޫމާތަށްޓަކައި: މިދިއަ އަހަރު އަވަހާރަވި މައްލާ ޅަތުއްތުގެ ނަމެއް ފޮތުގައި ނުހިމެނެ އެވެ. ފޮތުގައި އޮތް ގޮތުން ނަމަ އޭރު ނަޝީދާ ވަރިކޮށްފައި ހުންނަވާތާ ވެސް އަހަރެއް ވެއްޖެ އެވެ. އެކަމަކު ވަރި ސާބިތުނުކޮށް އޮތީ އެވެ.)
އެ ބައްދަލުވުމުގެ ބޭނުމަކީ ނަޝީދާގެ ގެ ހަދަން ގާސިމްގެ އެހީ ހޯއްދެވުމެވެ. އެކަމަކު ގާސިމަކީ ދިގު މުއްދަތަށް ގެދޮރު ހެއްދެވުމުގެ މަސައްކަތްކުރެއްވި ބޭފުޅެއް ނޫނެވެ. އެހެންކަމުން އެ ދުވަހުގެ ޖަވާބަކީ 'އެގޮތަށް ވަރަށް ގޭގެ ހަދައިނޫޅެމޭ' އެވެ. އެކަމަކު 'ކުޑަކޮށް ވިސްނާލަމޭ' ވިދާޅުވި އެވެ.
އޭގެ ފަހުން ނަޝީދާއި ގާސިމާ ދެމެދު ގުޅުން އުފެދުނެވެ. ފޮތުގައި އޮތް ގޮތުން ނަމަ ގެ ހެދުމުގެ ކަންކަމުގައި ފޯނުން ވާހަކަ ވެސް ދެކެވެ އެވެ. އެ ގުޅުން ގޮސް ނިމުނީ ނަޝީދާގެ ވަރި ކޯޓުން ސާބިތުކޮށް، ކައިވެންޏާ ހަމައިންނެވެ.
ދެ ބޭފުޅުންގެ ކައިވެންޏަށް ފިރިހެން ދެ ދަރިކަލުން ލިބިވަޑައިގަތެވެ.
ގާސިމަކީ ގިނަ އަނބިން ތިއްބެވި ބޭފުޅެއްކަން އާންމުކޮށް އެންމެންނަށް ވެސް އެނގެ އެވެ. ނަމަވެސް 2005ގައި ޕެރަޑައިސް އައިލެންޑް ރިސޯޓްގައި އޮތް ރަސްމިއްޔާތެއްގައި ކައިވެނި ބައްލަވައިގެންނެވި އައިޝަތު ނަހުލާ، އާންމު ނަމުން ނަމަ އައިޝާ ފަދައިން މަޝްހޫރުވި އަނބިކަނބަލަކު އަދި ނެތެވެ.
އައިޝާ އާއި ގާސިމް ދިމާވުމުގެ ފަހަތުގައި އޮތީ އައިޝާގެ ދޮންބައްޕައަށް ކުރިމަތިވި ސިއްހީ ބޮޑު ނުރައްކަލެވެ. ރާއްޖެއިން ބޭރުން އޮޕަރޭޝަންކުރަން ޖެހުމުން އެކަމަށް ގާސިމްގެ އެހީތެރިކަން ހޯއްދަވަން ބައްދަލުކުރެއްވި އެވެ.
އެ އެހީގައި ދޮންބައްޕަ ގޮވައިގެން އިންޑިއާއަށް ވަޑައިގަތީ ވެސް އައިޝާ އެވެ. އޭރު އޭނާ ހުންނެވީ، ގާސިމްގެ ބައޮގްރަފީގައި އޮތް ގޮތުން ނަމަ، ސްރީ ލަންކާގައި މާކެޓިން ދާއިރާއިން ފުރަތަމަ ޑިގްރީ ހައްދަވައިގެންނެވެ.
ދޮންބައްޕައާ އެކު އިންޑިއާއަށް ވަޑައިގަތުމާ އެކު ގާސިމް އޭނާއަށް ގުޅުއްވި އެވެ.
"ހާލު އައްސަވާފައި ވިދާޅުވީ އައިޝާ ވަރަށް ކަމުގޮސްފި ކަމަށެވެ. ކައިވެނިކުރައްވަން ބޭނުންފުޅުވާ ކަމަށް ވެސް ވިދާޅުވި އެވެ،" ފޮތުގައި ލިއުނެވެ.
އެއީ 2004 އެވެ. އައިޝާ އޭރު އުޅުއްވަނީ އެހެން މީހަކާ ރައްޓެހިވެގެންނެވެ. ނަމަވެސް ގާސިމް އެގޮތަށް ކައިވެންޏަށް ހުށައެޅުއްވުމުން އައިޝާގެ ހަނދާންތައް އޭގެ އަހަރުތަކެއް ފަހަތަށް ސޮއްސާލި އެވެ. އެއީ ރާއްޖޭގައި މަޖައްލާތަކުގެ މަގުބޫލުކުރަން ވަރަށް ބޮޑު ދުވަސްވަރެކެވެ. އޭގެ ތެރެެއިން އެއް މަޖައްލާ ކަމަށްވާ 'އައްޑުވަސް'ގެ ބޭރުގަނޑުގައި ގާސިމްއާ ބެހޭ ސުރުހީއެއް ޖެހި އެވެ. ރީތި އަންހެން ކުއްޖަކާ ދިމާވެއްޖެ ނަމަ ކައިވެނިކުރެއްވިދާނެ ކަމަށް، ވިދާޅުވި ވާހަކައިގެ ސުރުހީ އެވެ.
"އެ ދުވަހު ހިތާހިތާ މީނާއާ ކައިވެނިކުރާނަމޭ ބުނެވުނެވެ،" އައިޝާއަށް ހަވާލާދީފައި، ފޮތުގައި އޮތެވެ.
"އެކަމަކު އެއީ އެއްވެސް ކަހަލަ އެ ބާވަތުގެ ހިޔާލެއް ގާސިމާ މެދު ކުރެވިގެން ހިތަށްއެރި އެއްޗެއް ނޫނެވެ."
ފޯނުން ދައްކަވަން ފެއްޓެވި ވާހަކަ، ސިލްސިލާއެއްގެ ގޮތަށް ދެމުނެވެ. ގާސިމް އައްސަވަނީ ކައިވެންޏަށެވެ. އައިޝާ ހައްދަވަނީ ދެކޮޅެވެ. ދެން ގާސިމް ޗެލެންޖްކުރައްވައި، އެ ކައިވެނިކުރައްވާނެ ކަމަށް ވިދާޅުވެ އެވެ.
ޖުމްހޫރީ މައިދާނުގައި 12-13 އޮގަސްޓް 2004ގައި އޮތް ސިޔާސީ ބޮޑު އެއްވުމާ އެކު ގާސިމް ޖަލަށްލި އެވެ. އެކަމަކު ޖަލުން މިނިވަންވެވަޑައިގަތުމާ އެކު އަނެއްކާވެސް ގާސިމް އައިޝާއާ ގުޅުއްވި އެވެ. އޭނާގެ ހުރި ހަމައެކަނި އެއްބަނޑު އެއްބަފާ ފިރިހެން ކޮއްކޮއަށް ދިމާވި ސިއްހީ މައްސަލައެއްގައި ގާސިމްގެ އެހީތެރިކަމާ އެކު އިންޑިއާއަށް ވަޑައިގަތެވެ. އޭގެ ފަހުން އެ ކޮއްކޮ ގާސިމްގެ އެހީގައި އިންޑިއާގައި ކިޔަވަން ވެސް ބެހެއްޓި އެވެ.
ދެ ބޭފުޅުންގެ ދެމެދު އުފެދުނު އެ ގުޅުން ކައިވެންޏަކާ ހަމައަށް ހެދިބޮޑުވުމުގެ ކުރިން، ދުނިޔޭގައި ފެންނަން ހުރި ލޯބީގެ އެންމެ މަޝްހޫރު ރަމްޒު، ތާޖު މަހަލްއަށް އެކުގައި ވަޑައިގަތެވެ. ފޮތުގައި އޮތް ގޮތުން ނަމަ ތާޖު މަހަލްގައި އައިޝާ އާއި ގާސިމް ވަރަށް ގިނަ ފޮޓޯތައް ވެސް ނެންގެވި އެވެ.
ފަހުން އައިޝާ ވިދާޅުވީ މަންމަ އާއި ދޮންބައްޕަ ބުނެފިއްޔާ ކައިވެނިކުރައްވަފާނެ ކަމަށެވެ. ތާޖު މަހަލްގެ ދަތުރުފުޅަށް ފަހު މާލެ ވަޑައިގެން ގާސިމް ބައްދަލުކުރެއްވީ އައިޝާގެ މަންމަ އާއި ދޮންބައްޕައާ އެވެ. އެމީހުންގެ ރުހުން ލިބުނެވެ. އޭގެ އިތުރުން އައިޝާގެ ތިމާގެ މީހުން ވެސް އެ ކައިވެންޏަށް ހިތްވަރު ދިން ކަމަށްވެ އެވެ.
ގާސިމް އާއި އައިޝާގެ އުމުރުގައި ތިރީހަކަށް އަހަރުގެ ތަފާތެއް ހުއްޓެވެ. އެހެންކަމުން ގާސިމް ވިދާޅުވި ކަމަށް ވަނީ 'ކައިވެނިކުރުމަށް ފަހު ނޫޅެވިއްޖެއްޔާ ވަކިވާނީ' އެވެ.
އެ ކައިވެނިކުރެއްވީ ޕެރަޑައިސް އައިލެންޑް ރިސޯޓްގައި 18 އޮގަސްޓް 2005ގަ އެވެ. އެއީ ރައީސް މައުމޫން އަބްދުލްގައްޔޫމްގެ ކެބިނެޓުން ފިނޭންސް މިނިސްޓަރުކަން ވެސް ލިބިވަޑައިގެންނެވި ދުވަހެވެ. ހުވާކުރެއްވުން އޮތީ މެންދުރުފަހު އެކެއް ޖެހިއިރު އެވެ. އޭގެ ފަހުން ފިނޭންސް މިނިސްޓްރީއަށް ވަޑައިގަތެވެ. އެމްއެމްއޭގެ ގަވަރުނަަރުގެ ހައިސިއްޔަތުން އެމްއެމްއޭއަށް ވެސް ވަޑައިގަތެވެ.
އޭރު ޕެރަޑައިސްގައި ކައިވެނީގެ ހަފުލާ އޮތީ ތައްޔާރުކޮށްފަ އެވެ. ހަޔާތްޕުޅުގައި ފުރަތަމަ ފަހަރަށް މިނިސްޓަރަކަށް ވެވަޑައިގެން ގާސިމް އޭނާގެ ދެވަނަ ރިސޯޓަށް އަރައިވަޑައިގަތީ އާ ލޯތްބެއް މިލްކުކުރެއްވުމުގެ އުފާވެރިކަމާ އެކު ވެސް މެ އެވެ.
"އައިޝާއާ މެދު ހިތްޕުޅުގައި ވަރަށް ބޮޑު ލޯތްބެއް އުފެދިފައިވެ އެވެ. ފުރަތަމަ ފެނިލުމުން ވެސް އެ ޝުއޫރުތައް ހިތްޕުޅުގައި ހިނގައިގަތެވެ. އަންހެން ކުއްޖަކު ހާސިލްކުރެއްވުމަށްޓަކައި، ދުވަހަކު ވެސް ނޫޅުއްވާ ވަރަށް އުޅުއްވުނެވެ،" ފޮތުގައި އޮތް 'އައިޝާގެ ކައިވެނި'ގެ ބައި ނިންމާލަމުން ލިއެފައިވެ އެވެ.
އޭގެ ހެކި ދިރިއުޅުއްވުމުން ވެސް ފެންނަން އެބަ ހުއްޓެވެ. ގާސިމަށް އެންމެ ގިނަ ދަރިން ލިބިވަޑައިގަތީ އެ ކައިވެނިފުޅުގަ އެވެ: ޖުމްލަ ހަ ބޭފުޅުންނެވެ.