މޫސުން ގޯސްވެ ކަނޑުގަދަވުމުގެ ސަބަބުން ހުޅުމާލެއާއި މާލެ އާއި ދެމެދު ދަތުރު ކުރާ ފެރީ އިން ސައިކަލް ގެންދިޔުން ވަގުތީ ގޮތުން މެދުކަނޑާލައިފިއެވެ.
މޫސުން ގޯސްވެގެން ފެރީއިން ސައިކަލް ގެންދިޔުން ވަގުތީ ގޮތުން މެދުކަނޑާލާފައިވާއިރު މިއަދު އިރު އޮއްސި 6:00 އިން ފެށިގެން މާލެ އަށާއި ހުޅުމާލެއަށް މެދުކެނޑުމެއް ނެތި ވާރޭ ވެހެމުންދާ ކަން ފާހަގަކޮށްލެވެއެވެ. އަދި މާލެ އާއި ހުޅުމާލޭގެ ބައެއް މަގުތަކުގައި ވަނީ ފެން ބޮޑުވެފައެވެ.
މާލޭގައި ހުންނަ ހުޅުމާލެ ފެރީ ޓަމިނަލްގައި ކުރަމުންދާ އިއުލާނުގައި ބުނި ގޮތުގައި މޫސުން ގޯސްވުމުގެ ސަބަބުން ހުޅުމާލެ އާއި މާލެއާއި ދެމެދު ދަތުރުކުރަމުން ދިޔަ ފެރީތައް ޝެޑިއުލްގައިވާ ގޮތަށް ދަތުރުތައް ނުބޭއްވުމަކީ އެކަށީގެންވާ ކަމެއް ކަމަށެވެ.
މާލެއަށް ވާރޭ ވެހެމުންދާތީ ގިނަ ބަޔަކު ވަނީ ފެރީ ޓާމިނަލްގައި ތާށިވެފައެވެ.
ރާއްޖެއަށް ކުރަމުން މިދާ ވިއްސާރައިގައި ކުރިއަށް އޮތް 24 ގަޑިއިރު ވެސް ވިއްސާރަވާނެ ކަމުގައި މެޓް އޮފީހުން ވަނީ ބުނެފައެވެ. އަދި ކަނޑުދަތުރުކުރާ އުޅަނދުފަހަރު މޫސުމަށް ބަލައިގެން ދަތުރުކުރުމަށް މޫސުމާއި ބެހޭ ފަރާތްތަކުން ވަނީ އިލްތިމާސްކޮށްފައެވެ.