ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ޚާއްޞަ މަންދޫބެއްގެ ގޮތުން، ‏‏ކުރީގެ ރައީސް އަލްއުސްތާޛު މައުމޫން ޢަބްދުލްޤައްޔޫމް، ސިންގަޕޫރަށް ވަޑައިގެން، ‏ސިންގަޕޫރުގެ ‏‏ކުރީގެ ބޮޑުވަޒީރު، ލީ ކުއަން ޔޫއަށް އެންމެފަހުގެ އިޙްތިރާމް އަދާކުރައްވައިފިއެވެ. ‏
ރައީސް އޮފީހުން ވިދާޅުވީ، ކުރީގެ ބޮޑުވަޒީރު ލީ ކުއަން ޔޫގެ ހަށިކޮޅު ބާއްވާފައިވާ ޕާލަމަންޓް ހައުސްއަށް ‏‏ރައީސް މައުމޫން ވަޑައިގެން، ‏ބޮޑުވަޒީރު ލީ ކުއަން ޔޫ‏ އަވަހާރަވުމާ ގުޅިގެން ހުޅުއްވާފައިވާ ‏‏ތަޢުޒިޔާގެ ދަފުތަރުގައި ސޮއިކުރެއްވި ކަމަށެވެ.
"ތަޢުޒިޔާގެ ދަފްތަރުގައި އެމަނިކުފާނު ލިޔުއްވި ބަޔާނުގައި ‏‏ސިންގަޕޫރުގެ ސަރުކާރަށާއި، ބޮޑުވަޒީރު ލީ ކުއަން ޔޫގެ ޢާއިލާއަށާއި، ސިންގަޕޫރުގެ ‏‏‏ރައްޔިތުންނަށް އިޚްލާޞްތެރިކަމާއެކު ތަޢުޒިޔާ ފޮނުއްވާފައިވެއެވެ. މީގެއިތުރަށް، ބޮޑުވަޒީރު ލީ ‏‏ކުއަން ޔޫއަކީ، ސިންގަޕޫރަށް ޒަމާނީ ތަރައްޤީ ގެންނެވުމުގެ ވަރުގަދަ ޢަޒުމުގައި ‏‏މަސައްކަތްކުރެއްވި، އަދި އެމަސައްކަތް ވަރަށް ފުރިހަމައަށް ކާމިޔާބު ކުރެއްވި ބޭފުޅެއްކަމުގައި ‏‏ލިޔުއްވާފައިވެއެވެ" ރައީސް އޮފީހުން ވިދާޅުވިއެވެ.
ރައީސް މައުމޫނުގެ އަރިހުގައި، މިނިސްޓަރ އޮފް ‏‏ފޮރިން އެފެއާޒް ދުންޔާ ‏‏މައުމޫނާއި، ސިންގަޕޫރަށް ‏‏ދިވެހިރާއްޖެއިން ކަނޑައަޅާފައިވާ ނޮން-ރެސިޑެންޓް ސަފީރު ފާޠިމަތު ‏‏ޢިނާޔާ ބައިވެރިވެވަޑައިގެންނެވިއެވެ.‏