ހުކުރު މިސްކިތް ސަރަހައްދުގައި ކެފޭއެއް ހެދުމަކީ ދީނީގޮތުންނާއި، ތާރީޚީ ގޮތުންވެސް ހެޔޮވާނެކަމެއް ނޫންކަމަށް ކުރީގެ ރައީސް އަލްއުސްތާޒު މައުމޫން އަބުދުލްގައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މާލޭ ހުކުރު މިސްކިތު ގޯތިތެރޭގައި ހުރި ރައީސް އިބްރާހިމް ނާސިރުގެ މަގުބަރާ ހިމެނޭގޮތަށް އެ ސަރަހައްދުގައި ހުރި މަހާނަތައް ތަޅާލައިގެން ނެގުމަށްފަހު އެތަނުގައި ކެފޭއެއް ހެދުމަށް ނިންމާފައިވާކަމަށް ދެކެވޭ ވާހަކަތަކާއި ގުޅޭގޮތުން ކުރެއްވި ޓްވީޓެއްގައެވެ. ހުކުރު މިސްކިތް ހިމެނޭ ސަރަހައްދުގައި ކެފޭއެއް ހެދުމަށް ނިންމާ އެ މަސައްކަތް ކުރުމަށް ބަޔަކު ހޯދުމަށް ހައުސިން މިނިސްޓްރީން ވަނީ އިއުލާންކޮށްފައެވެ.
ރައީސް މައުމޫން ވިދާޅުވީ ހުކުރު މިސްކިތް ސަރަހައްދުގައި ކެފޭއެއް ހެދުމަކީ ދީނީގޮތުންނާއި، ތާރީޚީ ގޮތުންވެސް ހެޔޮވާނެކަމެއް ނޫންކަމަށެވެ. އަދި އެފަދަ ސަރަހައްދުތަކަކީ ދީނީ އަދި އާސާރީ ތަރިކައެއްކަމަށް ރައީސް މައުމޫން ވިދާޅުވިއެވެ.
ރައީސް މައުމޫން ވިދާޅުވީ އެފަދަ ތަންތަން ސަލާމަތްކުރުމަކި ގައުމީ ވާޖިބެއްކަމަށެވެ.
ހުކުރު މިސްކިތް ސަރަހައްދުގައި ކެފޭއެއް ހެދުމަކީ ދީނީގޮތުންނާއި، ތާރީޚީ ގޮތުންވެސް ހެޔޮވާނެކަމެއް ނޫންކަމަށް ކުރީގެ ރައީސް މައުމޫން ވިދާޅުވެފައިވާއިރު، ހުކުރު މިސްކިތުގެ ގޯތިތެރެއިން ބައެއްގައި ކެފޭއެއް ހެދުމަށް ނިންމާފައިވާކަމަށް ބުނާ ވާހަކަތަކާއިމެދު ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ.
ތާރީޚު ދިރާސާކުރާ ފަރާތްތަކާއި، އެ ދާއިރާގެ ތަޖުރިބާކާރުންވެސް ގެންދަނީ މިއީ ކުރަން ހެޔޮވާނެވަރުގެ ކަމެއްް ނޫންކަމަށް ވިދާޅުވަމުންނެވެ.
މިސަރުކާރުން ރާއްޖޭގެ ތާރީޚީ ބިނާތަކާއި، ތާރީޚީ ތަންތަން ނައްތާލަމުން ގެންދާކަމަށް ބުނެ ތާރީޚަށް ލޯބިކުރާ ފަރާތްތަކުން ގެންދަނީ ކަންބޮޑުވުން ފާޅުކުރަމުންނެވެ.