މާދަމާ ބާއްވާ ޕީޕީއެމްގެ 30 ދާއިރާއެއްގެ މަޖިލީސް ޕްރައިމަރީގެ އިތުރުން މާވަށު ދާއިރާގެ ޕްރައިމަރީ ބާއްވަން ހަމަޖައްސައިފި އެވެ.
ޕީޕީއެމްއިން ބުނީ މާދަމާ ބާއްވާ 30 ދާއިރާއެއްގެ ޕްރައިމަރީގައި 92 މީހުން ވާދަ ކުރާނެ ކަމަށެވެ. ޕީޕީއެމްއިން އާންމު ކުރި ލިސްޓުގައި މާވަށު ދާއިރާއަށް ވާދަކުރާ ފަރާތްތަކެއް ހާމައެއް ނުކުރެ އެވެ.
މާވަށް ދާއިރާގެ ޕްރައިމަރީ ބާއްވާގޮތަށް ޕީޕީއެމްއިން ނިންމާފައި މިވަނީ ޕްރައިމަރީ ނުބާއްވާ އެ ދާއިރާގެ މިހާރު މެންބަރު އަބްދުލް އަޒީޒު ޖަމާލު އަބޫބަކުރަށް ޓިކެޓް ދޭން ނިންމާފައިވާކަމަށް ބުނެ އެ ދާއިރާގެ ބައެއް ރަށްރުގައި ޕީޕީއެމް މެންބަރުން މުޒާހަރާ ކުރި ފަހުންނެވެ.
ޕީޕީއެމްއިން ބުނީ މާވަށު ދާއިރާގެ ޕީޕީއެމް މެންބަރުންގެ ތެރެއިން ޕްރައިމަރީގައި ވޯޓުލާން ބޭނުންވާ ފަރާތްތަކުން މިއަދުގެ ނިޔަލަށް ރަޖިސްޓްރީ ކުރަން ޖެހޭނެ ކަމަށެވެ. އެ ޕާޓީން މާދަމާ ޕްރައިމަރީގައި މިހާރު މަޖިލީހުގައި ތިއްބަވާ މެންބަރުން ވެސް ވާދަ ކުރައްވައެވެ. މިހާރު މަޖިލީހުގައި ތިއްބެވި މެންބަރުންގެ ތެރެއިން ޕީޕީއެމް ޕްރައިމަރީގައި ވާދަކުރައްވަނީ ފަސް މެންބަރެކެވެ.
ކުރިޔަށް އޮތް ރައްޔިތުންގެ މަޖިލީހުގެ އިންތިޚާބަށް ޕްރައިމަރީއަކާ ނުލައި ޕީޕީއެމްގެ ޓިކެޓް 13 މަޖިލީސް މެންބަރަކަށް ލިބިފައިވާއިރު އެހެން ދާއިރާތަކުން ވާދަކުރި ފަސް މީހަކަށް ވެސް ވަނީ ޕްރައިމަރީއަކާ ނުލާ ޓިކެޓް ލިބިފައެވެ.
ޕީޕީއެމްގެ ޕްރައިމަރީ ބޭއްވުމަށް ހަމަޖެހިފައިވަނީ މާދަމާ ހަވީރު 4:00 ން ރޭގަނޑު 10:00 އަށެވެ.