މެޗްގެ އިތުރު ވަގުތުގެ ތެރޭގައި އީގަލްސްގެ ޒުވާން ފޯވަޑް މުސްތަފާ އަބްދުލް ކަރީމް ކާމިޔާބުކުރި ލަނޑާ އެކު، މެޗްގައި ވިކްޓަރީ ކުރަމުންއާ އުންމީދުތަކަށް ގޮންޖަހާލުމަށް ފަހު، އީގަލްސްއަކީ ބަލިކުރެވޭ ވަރުގެ ޓީމެއް ނޫންކަން ވިކްޓަރީއަށް ދައްކާލައިފި އެވެ.
ލީގު ކާމިޔާބުކުރުމަށް ކެއްމަދުވެފައި ތިބި ވިކްޓަރީގެ އުންމީދުތަކަށް އީގަލްސްއިން ހުރަސް އެޅީ ލީގުގެ ތިން ވަނަ ބުރުގައި އިއްޔެ ހަވީރު މި ދެ ޓީމް ބައްދަލުކުރި މެޗު 2-2 އިން އެއްވަރަކުކޮށް، ވިކްޓަރީގެ މުހިންމު ދެ ޕޮއިންޓު ގެއްލުވާލުމުންނެވެ.
އިއްޔެގެ މެޗުން ވިކްޓަރީ އަށް ތިން ޕޮއިންޓް ނުލިބުމުން އެ ޓީމަށް މިހާރު އޮތް އެންމެ ބޮޑު އެއްހުރަހަކީ، ލީގުގެ އެއްވަނަގައި 38 ޕޮއިންޓާ އެކު އޮތް ވީބީގެ ފަރަގު ވިކްޓަރީ އަށް ބޮޑު ވުމެވެ. އެގޮތުން އިއްޔެ އީގަލްސް މެޗުން ލިބުނު އެއް ޕޮއިންޓާ އެކު ލީގުގެ ދެ ވަނަގައި ވިކްޓަރީ އޮތީ 32 ޕޮއިންޓާއެކުގަ އެވެ.
އިއްޔެގެ ފުރަތަމަ ލަނޑުޖަހާ ވިކްޓަރީން ކުރި ހޯދީ މެޗްގެ ފުރަތަމަ ހާފުގެ 30 ވަނަ މިނެޓުގަ އެވެ. އެގޮތުން ވިކްޓަރީން ލީޑް ނެގި ލަނޑު އެ ޓީމަށް ކާމިޔާބު ކޮށްދިނީ ވިކްޓަރީގެ ޒުވާން ފޯވަޑް އިސްމާއިލް މަމްދޫހު )މަންޑޭ( އެވެ.
މެޗްގެ ފުރަތަމަ ހާފުގެ ކުޅުން ނިމުނު އިރު، 1-0 ލަނޑުން ކުރިހޯދި ވިކްޓަރީއަށް މެޗްގެ ދެ ވަނަ ހާފުގައި ލީޑު ފުޅާކޮށްދިނީ ޑިފެންޑަރު އަލީ ޝަރީފް )އައްޔަ( ކާމިޔާބު ކޮށްދިން ލަނޑުންނެވެ. ލިބުނު ހިލޭ ޖެހުމަކުން ވިކްޓަރީގެ މުހައްމަދު ރަޝީދު )ހޮކޭ( އީގަލްސްގެ ޕެނަލްޓީ އޭރިޔާ ތެރެއަށް ހުރަސްކޮށްލި ބޯޅަ އައްޔަ ގޯލަށް އަމާޒުކޮށްލީ ބޮލުންނެވެ. އެކަމަކު ވިކްޓަރީ ލީޑު ފުޅާކުރިތާ 10 މިނިޓު ފަހުން އީގަލްސްގެ މުސްތަފާ ވަނީ އެ ޓީމުގެ އުންމީދު އާކޮށް ނަތީޖާ 2-1 ލަނޑަށް ބައްދަލުކޮށްލާ އިތުރު ހިތްވަރެއް ޓީމަށް ގެނެސްދީފަ އެވެ. އެގޮތުން އީގަލްސްއިން ކުރަމުން ބުރަމަސައްކަތުގެ ނަތީޖާއަކަށްވީ އިތުރު ވަގުތުގެ ތިން މިނިޓުގެ ތެރޭގައި މުސްތަފާ އީގަލްސް އަށް މެޗުގެ ނަތީޖާ އެއްވަރުކޮށްދިނުމެވެ. ވިކްޓަރީގެ ޕެނަލްޓީ އެރިޔާ ތެރެއިން މުސްތަފާ އަށް ފުރަތަމަ ތަނަވަސްވި ބޯޅަ ގޯލަށް ފޮނުވާލުމުން ކުރިމަތީގައި ހުރި ވިކްޓަރީގެ ޑިފެންޑަރެއް ބްލޮކްކުރި ނަމަވެސް ދެވަނަ ފަހަރަށް އޭނާ އަށް ލިބުނު ބޯޅަ ގޯލުގެ ތެރެއަށް އަމާޒުކޮށްލި އެވެ.
އިއްޔެގެ މެޗަށް ފަހު ވިކްޓަރީގެ ކޯޗު އަލީ ސުޒޭން ބުނީ ވިކްޓަރީ އަށް މެޗު ގެއްލުނީ ލަނޑުޖަހަން ލިބުނު ގިނަ ފުރުސަތުތަކުގެ ބޭނުން ނުހިފުމުން ކަމަށެވެ. އަދި މެޗުން ތިން ޕޮއިންޓު ނުލިބުމަކީ ވިކްޓަރީއަށް ކުރިމަތިވި ބޮޑު ހުރަހެއް ކަމަށް ވެސް ސުޒޫން ބުންޏެވެ.
"މެޗްގެ ކުރީ ކޮޅު ދެއްކުނު ރަނަގަޅު ކުޅުން ދެ ވަނަ ހާފުގައި ނުދެއްކެ. ހަގީގަތުގައި އެޑްވާންޓޭޖް )ވިކްޓަރީ( އަށް ލިބިފައި އޮތް މެޗެއް މިދިޔައީ. މީގައި އެންމެ ބޮޑު ސަބަބަކީ ފަހު ވަގުތު އީގަލްސް ގޯލު ޖެހުމެއް ނޫން" ސުޒޭން ބުންޏެވެ.
ސުޒޫންގެ އިތުރުން އިއްޔެގެ މެޗަށް ފަހު އީގަލްގެ ކޯޗް އަހުމަދު ނިމާދު )ނިމާ( ބުނީ ފަހަތުން އަރައި ވިކްޓަރީ ކައިރީގައި އެއްވަރުކުރެވުމަކީ އީގަލްސް ކަހަލަ ޓީމަކަށް "މެޗަކުން މޮޅުވުން ފަދަ ކަމެއް،" ކަމަށެވެ. އަދި މުޅިމެޗްގައި ވެސް އީގަލްސް ދެއްކި ކުޅުމާމެދު ހިތްހަމަ ޖެހޭ ކަމަށާއި މެޗުން މޮޅުވާން އީގަލްސްގެ ކުޅުންތެރިން ވަރަށް ހިތް ވަރު ކުރިކަމަށެވެ.
"ކުޅުމާމެދު ވަރަށް ހިތްހަމަޖެހޭ. އެއީ އެންމެ ފަހުން ސެކަންޑް ރައުންޑްގައި )ވިކްޓަރީއާ ދެކޮޅަށް( ކުޅުނު މެޗުގައި ވެސް ފަސް ލަނޑު ޖަހައިފައި އޮތީ. އެހެންވީމަ ފަހަތުން އަރައި ވިކްޓަރީ ކަހަލަ ޓީމެއް ކައިރީގައި ދެ ލަނޑު ޖަހައި ޑްރޯ ކުރެވުނީމަ ވަރަށް ރަނގަޅު. ކުޅުންތެރިން ދެއްކި ކުޅުން ވަރަށް ރަނގަޅު. މިއީ ވަރަށް ބޮޑު ކާމިޔާބެއް އީގަލްސް އަށް ލިބުނު،" ނިމާ ބުންޏެވެ.
މި މެޗު ފެށީ ހުރާގައި ގެނބިގެން މަރުވި ހިރިޔާ ސްކޫލްގެ ދަރިވަރުންނާއި ޕްރިންސިޕަލްގެ ހަނދާނުގައި ސުކޫތުގެ ވަގުތުކޮޅެއް ގެނައުމަށް ފަހު އެވެ. އަދި ހިތާމަފާޅުކުރުމުގެ ގޮތުން ދެ ޓީމްގެ ކުޅުންތެރިންނާއި ދެޓީމްގެ ބެންޗުގައި ތިބި ހުރިހާ ކުޅުންތެރިން ވަނީ އަތުގައި ކަޅު ކުލައިގެ ބޭންޑް އަޅައިފައެވެ.
ލީގުގައި މިރޭ 9:00 ޖަހާއިރު ބައްދަލުކުރާ ދެޓީމަކީ ނިއު ރޭޑިއަންޓާއި ވެލެންސިއާ އެވެ.