ސުޕްރީމް ކޯޓުގެ ފަނޑިޔާރު އަބްދުﷲ ދީދީ އަށް ތުހުމަތު ކުރާ މައްސަލައެއް ބަލަމުންދަނިކޮށް އެމަނިކުފާނު މިރޭ ރާއްޖެ އިން ބޭރަށް ފުރާވަޑައިގެންފި އެވެ.
ފަނޑިޔާރު އަބުދުﷲ ދީދީ ފުރާވަޑައިގެންފައިވާކަން އެމަނިކުފާނުގެ ޤާނޫނީ ވަކީލުންގެ ޓީމުން ވަނީ ކަށަވަރުކޮށްދީފައެވެ. އަބުދުﷲ ދީދީގެ ވަކީލުންގެ ޓީމުގައި ހިމެނިވަޑައިގަންނަވާ އާދަމް ޝަމީމް މިރޭ ކުރެއްވި ޓުވީޓެއްގައި ވިދާޅުވީ، ކުރިން ވެސް ހަމަޖެހިފައިވާ ދަތުރުފުޅެއްގައި ފަނޑިޔާރު އަބުދުﷲ ދީދީ މިރޭ ރާއްޖެ އިން ބޭރަށް ފުރާވަޑައިގެންފައިވާ ކަމަށެވެ. ނަމަވެސް ފަނޑިޔާރު ދީދީ ވަޑައިގެންނެވި ގައުމެއް ހާމަކޮށްފައެއް ނުވެއެވެ.
ފަނޑިޔާރު އަބުދުﷲ ދީދީގެ ވަކީލް ޝަމީމް އިތުރަށް ވިދާޅުވީ ދީދީ ބޭރަށް ވަޑައިގެންނެވީ ޖޭ.އެސް.ސީގެ ހުއްދަ އާއި އެކުގައި ކަމަށާއި، އެނބުރި ވަޑައިގަންނަވާނެ ތާރީހުވެސް ޖޭއެސްސީ އަށް އެނގޭނެ ކަމަށެވެ.