އަބަދުވެސް ސާބިތުވެ ހުންނަވާނީ ކުރީގެ ރައީސް އަލްއުސްތާޛް މައުމޫން އަބްދުލް ޤައްޔޫމް އާއެކު ކަމަށް ރައްޔިތުންގެ މަޖިލީހުގެ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހީމް (ވައްޑޭ) ވިދާޅުވުމާއި ގުޅިގެން، މައުމޫން ވައްޑޭ އަށް ޝުކުރު ދަންނަވައިފި އެވެ.
މައުމޫން މިއަދު ކުރެއްވި ޓްވީޓެއްގައި ވިދާޅުވެފައި ވަނީ މައުމޫން ރިފޯމް މޫވްމެންޓް (އެމްއާރްއެމް)ގެ ނައިބު ރައީސް އަދި ތުލުސްދޫ ދާއިރާގެ އިއްޒަތްތެރި މެމްބަރ އޮނަރަބަލް މުހައްމަދު ވަހީދު އިބްރާހިމް އަކީ ދުވަހަކު ދެގޮތެއް ނުވާ، ޤަުމަށް އިޚްލާސްތެރި ބޭފުޅެއް ކަމަށެވެ.
MRM ge naib raees adhi Thulusdhoo dhaairaa ge izzaiytheri member Hon @Lawyer_Waddey akee dhuvahaku dhegotheh nuvaa qawmah ikhlaas theri beyfulheh. Alhugan’dah thiya koh dhevvaa varugadha thaaeedhah takaa varah bodah shukuru dhannavan. https://t.co/bPF9M5JSUQ
— Maumoon Abdul Gayoom (@maumoonagayoom) November 20, 2018
"އަޅުގަނޑަށް ތިޔަ ކޮށްދެއްވާ ވަރުގަދަ ތާއީދަށްޓަކައި ވަރަށް ބޮޑަށް ޝުކުރު ދަންނަވަން"، މައުމޫންގެ ޓްވީޓްގައި ވިދާޅުވެފައި ވެއެވެ.
މައުމޫން މިހެން ވިދާޅުވިއިރު، މިއަދު ކުރެއްވި ޓްވީޓެއްގައި ޓްވީޓްގައި ވައްޑޭ ވިދާޅުވެފައި ވަނީ ކުރީގެ ރައީސް މައުމޫން އަބްދުލް ޤައްޔޫމް އަށް ކުރިމަތިވެވަޑައިގެންނެވި ހިތްދަތި، އަދި އުފާވެރި ވަގުތުގައި ވެސް ދެގޮތެއް ނުވެ، އިޚްލާސްތެރިކަމާއި ވަފާތެރިކަމާއެކީ މިއަދާ ހަމައަށްވެސް ހުންނެވީ އެމަނިކުފާނާ އެކު ކަމަށެވެ.
އަދި ﷲ އިރާދަކުރެއްވިއްޔާ ދެންވެސް ހުންނަވާނީ ހަމަ އެގޮތުގައި ރައީސް މައުމޫން އާއެކު ކަމަށްވެސް ވައްޑޭ ވިދާޅުވި އެވެ.
ވައްޑޭ އަކީ ކުރީގެ ރައީސް އަބްދުﷲ ޔާމީން އަބްދުލް ޤައްޔޫމްގެ ވެރިކަމުގައި މައުމޫން ޖަލަށްލުމާއި ގުޅިގެން، ޔާމީންގެ ސަރުކާރަށް ވަރަށް ބޮޑަށް ފާޑުވިދާޅުވަމުން ގެންދެވި ބޭފުޅެކެވެ.