ފެނަކަގެ މެނޭޖިން ޑިރެކްޓަރުގެ މަގާމަށް މޭޖާ ރިޓަޔާޑް މުހައްމަދު ނަޖާހު މިއަދު އައްޔަންކޮށްފިއެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން އެކްސްގައި ކުރި ޕޯސްޓެއްގައި ވަނީ، ފެނަކައިގެ ޑިރެކްޓަރުންގެ ބޯޑުގެ މެންބަރުކަމަށާ، އެމްޑީ ކަމަށް ނަޖާހު އައްޔަންކޮށްފައިވާ ކަމަށެވެ. ނަޖާހު އެންމެ ފަހުން ހުންނެވީ، ހެޕީ މާކެޓުގެ އެސިސްޓެންޓް ޖެނެރަލް މެނޭޖަރުގެ މަގާމުގައެވެ.
ފެނަކައިގެ އެމްޑީގެ މަގާމު ހުސްވީ، އެ މަގާމުގައި ކުރިން ހުންނެވި މުއާޒު މުހައްމަދު ރަޝީދު މިއަދު އިސްތިއުފާ ދެއްވުމުންނެވެ.ފެނަކައިގެ އެމްޑީކަމުން އިސްތިއުފާ ދެއްވިކަން ހަމަކޮށް މުއާޒުވަނީ އޭނާގެ އިސްތިއުފާގެ ސިޓީ އެކްސްގައި ހިއްސާކޮށްފައެވެ. އެ ސިޓީގައި މުއާޒު ވިދާޅުވީ އޭނާ މަގާމާ ހަވާލުވެވަޑައިގެން ހުންނެވި އެއް އަހަރުގެ ތެރޭ ކުންފުނީގެ ހިންގަން ދިމާވި ގޮންޖެހުންތަކާއި ދަތިތަކާއެކުގައި ވެސް ރައްޔިތުންނަށް މެދުނުކެނޑި ހިދުމަތް ފޯރުކޮށްދިނުމުގައި އެދެވޭ ނަތީޖާއެއް ހާސިލްކުރެވިފައިވާ ކަމަށެވެ.
ކުންފުނިތަކަކީ ލިބޭ އާމްދަނީއިން ހިންގަންޖެހޭ ތަންތަން ކަމަށްވީ ނަމަވެސް، ފެނަކައިގެ މާލީ ހާލަތު އޮތްގޮތުން އެ ކަން އެހެން ކުރުމަކީ ނުވާނެ ކަމެއްކަމަށް މުއާޒު ވަނީ ފާހަގަކުރައްވާފައެވެ.