މާދަމާ މެންދުރު ފަހު ވެލާނާ އިންޓަނޭޝަނަލް އެއާޕޯޓުގައި ބާރުބޮޑުވާނެ ކަމަށް ލަފާކޮށް، ފުރަންދާ ފަރާތްތަކުން ދުރާލާ އަވަހަށް އެއާޕޯޓަށް ދިއުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން އިލްތިމާސްކޮށްފިއެވެ.
އެމްއޭސީއެލް އިން ކުރި ޕޯސްޓެއްގައި ބުނީ މާދަމާ މެންދުރު ފަހު ރާއްޖެއިން އުމްރާއަށް ދަތުރުކުރި މީހުން އެބުރި އަންނާނެކަމަށެވެ. އަދި އެއާޕޯޓު އާންމު އޮޕަރޭޝަނާއެކު، އުމްރާއިން އަންނަ މީހުންވެސް މާދަމާ އަންނާތީ އޮޕަރޭޝަންތައް ފަސޭހަކަމާއެކު ކުރިއަށް ގެންދިއުމަށް އެއާޕޯޓަށް ދާ ފަރާތްތަކުން ވީހާވެސް އަވަހަށް ޗެކިން އަދި ސެކިއުރިޓީ ކްލިއަރެންސް ހެދުމަށް އިލްތިމާސްކޮށްފައިވެއެވެ.
އުމްރާއިން މީހުން އަންނަ ފްލައިޓުތައް ދެ ގަޑިއެއްގައި އައުމަށް ހަމަޖެހިފައިވާކަން ފާހަގަކޮށް އެމްއޭސީއެލް އިން ވަނީ މިގަޑިތަކުގެ ތަފްސީލު ހާމަކޮށްފައެވެ. އެ ގޮތުން މާދަމާ މެންދުރުފަހު 14:00 އާއި ހަވީރު 16:00 ގައި އައުމަށް ހަމަޖެހިފައިވާ އިރު އެމްއޭސީއެލް އިން ވަނީ އެކުންފުނިން ދަތުރުފަތުރުގެ ހިދުމަތްދޭ ފަރާތްތަކާ އަދި ޓެކްސީތަކުންވެސް މިގަޑިތަކުގައި އެއާޕޯޓުގެ ޓްރެފިކް ތޮަށްޖެހުން ކުޑަކުރުމަށް އެއްބާރުލުން ދިނުމަށް އެދިފައެވެ.
މީގެ އިތުރުން އެމްއޭސީއެލް އިން ބުނީ އެއްވެސް ފަރާތަކުން އެހީތެރިކަން ބޭނުންވާނަމަ އެއާޕޯޓުގެ މުވައްޒަފުން ތިބޭނެކަމަށެވެ.