އެމެރިކާގެ އަސްކަރީ އިދާރާ ޕެންޓަގަންއާއި އަދި އެޑިއުކޭޝަން ޑިޕާޓްމަންޓްގެ ޚަރަދުތައް މުރާޖަޢާކޮށް ކުޑަކުރުމަށް އީލޮން މަސްކް އަށް އަންގާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ހުކުރު ދުވަހު ވައިޓް ހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ މަސްކް އާއި އޭނާގެ ކުޑަ އިންޖިނިއަރުންގެ ޓީމުން މި ޑިޕާޓްމަންޓްތަކުގެ "ހުރިހާ އެއްޗެއް ހެން" ބަލާނެ ކަމަށެވެ.
"އަޅުގަނޑުމެން ވަރަށް ވިސްނުންތެރި މީހުން ވައްދަނީ. އެހެންވީމާ އަޅުގަނޑު އޭނާއަށް އަންގާފައިވާނީ އެޑިއުކޭޝަނަށާއި މިލިޓަރީއަށް ވެސް ވަންނަން، އަޅުގަނޑުމެން ކުރިއަށްދާއިރު އެހެން ކަންކަކަން ވެސް ބަލާނަން. އެމީހުން ވަރަށް ގިނަ އޮޅުވާލުންތަކާއި، ނަހަމަ ބޭނުންކުރުންތަކާއި، އިސްރާފުތައް ކުރާތަން ފެންނަމުންދޭ. އެކަމަކު އަޅުގަނޑު ޓާގެޓެއް ކަނޑައަޅާފައި ބުނާނަން އެކަންކަން ހާސިލް ކުރަން. އަޅުގަނޑުމެން ނުވަންނާނެ ދާއިރާތަކެއްވެސް ހުރެދާނެ. އެކަމަކު އަޅުގަނޑަށް ހީވަނީ ހުރިހާ އެއްޗެއްވެސް ބޭނުންތެރިވާނެހެން،" އޭނާ ވިދާޅުވިއެވެ.
ގިނަބަޔަކު ބުނާގޮތުގައި ޓްރަމްޕް އައްޔަންކުރެއްވި ކޮމިޝަނެއްކަމަށްވާ މަސްކްގެ ޑިޕާޓްމަންޓް އޮފް ގަވަރންމަންޓް އެފިޝެންސީން ވަނީ އެމެރިކާގެ ބައިނަލްއަޤްވާމީ އެހީ އަދި ތަރައްޤީގެ އޭޖެންސީ ހަލާކުކޮށްލާފައެވެ. މިގޮތުން، ކޮރަޕްޝަނާއި ފްރޯޑްގެ ސާބިތުނުވާ ތުހުމަތުތަކެއްގެ ދަށުން އެ އޭޖެންސީގެ 10،000 އާ ގާތްކުރާ މުވައްޒަފުން ޗުއްޓީއަށް ފޮނުވާލާފައިވެއެވެ.
ޓްރަމްޕް އަދި އޭނާގެ އިސް އޮފިޝަލުންނާއި އެހީތެރިން، އޭގެ ތެރޭގައި މަސްކްވެސް ހިމެނޭގޮތަށް، ކޮންގްރެސްއިން ފަންޑުކުރާ ސަރުކާރުގެ ޕްރޮގްރާމްތަކާމެދު ހިތްހަމަނުޖެހުން ފާޅުކޮށްފައިވެއެވެ.
ޓްރަމްޕް އަދި މަސްކްގެ މި މަސައްކަތަކީ އެމެރިކާގެ ފެޑެރަލް ސަރުކާރުގެ ޚަރަދުތައް ކުޑަކުރުމަށް ކުރެވޭ މަސައްކަތެއްގެ ގޮތުގައި ބުނެވެއެވެ. ނަމަވެސް، ގިނަ ފާޑުކިޔާ ފަރާތްތަކުން ބުނަނީ މިއީ ޓްރަމްޕްގެ އިދާރާއިން އޭނާގެ ސިޔާސީ ވާދަވެރިންނާއި ދެކޮޅު ފަރާތްތަކަށް އަމާޒުކޮށްގެން ކުރާ މަސައްކަތެއް ކަމަށެވެ.
މީގެ ކުރިން މަސްކްގެ ކޮމިޝަނުން ބަލާފައިވާ އޭޖެންސީތަކުގެ ތެރޭގައި ޓްރަމްޕްގެ ސިޔާސަތުތަކާ ދެކޮޅު ގިނަ ފަރާތްތަކެއް މަސައްކަތްކުރާ ތަންތަން ހިމެނެއެވެ. މި މަސައްކަތުގެ ސަބަބުން އެމެރިކާގެ ސަރުކާރުގެ އިދާރާތަކުގެ މަސައްކަތަށް ހުރަސްތަކެއް ކުރިމަތިވެދާނެ ކަމަށް ބައެއް ފަރާތްތަކުން ބުނެއެވެ.