ރާއްޖޭގެ ޞިއްޙީ ދާއިރާއަށް ޚިދުމަތްކުރައްވައިފައިވާ ފަރާތްތަކާއި މިހާރު ޚިދުމަތް ކުރައްވަމުން ގެންދަވާ ފަރާތްތަކުގެ އަގު ވަޒަން ކުރުމުގެ ގޮތުން ސަރުކާރުން އެވޯޑް ދިނުމަށް ނިންމައިފިއެވެ.
ސަރުކާރުގެ ފަރާތުން މިކަން އިއުލާނުކުރެއްވެވީ ރާއްޖެއިން މެލޭރިއާ ނައްތައިލެވިފައިވާތީ ޑަބްލިޔޫ އެޗްއޯއިން އެކަމުގެ ލިޔުން ރާއްޖެއާއި ހަވާލުކުރުމަށް އާދީއްތަ ދުވަހު ދަރުބާރުގޭގައި ބޭއްވި ރަސްމިއްޔާތުގައި ހެލްތް މިނިސްޓަރ އިރްތިޝާމް އާދަމް އެވެ.
އިރްތިޝާމް އާދަމް ވިދާޅުވީ ރާއްޖޭގެ ޞިއްޙީ ދާއިރާއިން ވަނީ ފާހަގަކޮށްލެވޭފަދަ ބޮޑެތި ކާމިޔާބީތަކެއް ޙާޞިލުކޮށްފައި ކަމަށާއި އެފަދަ ކާމިޔާބީތަކެއް ޙާޞިލުކުރެވިފައި މިވަނީ ޞިއްޙީ ދާއިރާގައި ޚިދުމަތް ކުރެއްވި އަދި މިހާރުވެސް ޚިދުމަތް ކުރައްވަމުން ގެންދަވާ ގިނަ އަދަދެއްގެ ޚިދުމަތްތެރިންގެ މިންނަތް މަސައްކަތުން ކަމަށެވެ.
އިރްތިޝާމް އާދަމް ވިދާޅުވީ ޞިއްޙީ ޚިދުމަތްތެރިންނަށް އެވޯޑް ދެއްވާނީ 7 އެޕްރިލްގައި ފާހަގަކުރާ ދުނިޔޭގެ ޞިއްޙަތު ދުވަހުގައި ކަމަށެވެ.