ޔޫރޮޕާ ލީގުގައި ރޭ ރޭންޖާރސް އާއި ދެކޮޅަށް މެންޗެސްޓަރ ޔުނައިޓެޑް ކުޅުނު މެޗުގެ ފަހު ވަގުތު ކެޕްޓަން ބްރޫނޯ ފެނާންޑޭޒް ޖެހި ލަނޑާއެކު 2-1 ގެ ނަތީޖާއަކުން ޔުނައިޓެޑް މޮޅުވެއްޖެ އެވެ.
މި މެޗުން ޔުނައިޓެޑް މޮޅުވުމާއެކު އެ ޓީމަށް ވަނީ ލީގުގައި މިހާތަނަށް ކުޅުނު 7 މެޗުން 15 ޕޮއިންޓާއެކު ތާވަލުގެ ހަތަރުވަނަ މަގާމް ލިބި މުބާރާތުގެ ދެވަނަ ބުރުގެ ޖާގައެއް ކަށަވަރުވެފަ އެވެ. ރޭންޖާރސް އަށް 7 މެޗުން ލިބިފައިވާ 11 ޕޮއިންޓާއެކު އެ ޓީމު އޮތީ ތާވަލުގެ 13 ވަނައިގަ އެވެ. އެހެންކަމުން އެ ޓީމަށް ޖެހޭނީ ދެވަނަ ބުރުގެ ޖާގައެއް ހޯދުމަށް ޕްލޭއޮފް ދެ މެޗު ކުޅުމަށެވެ.
މެންޗެސްޓަރ ޔުނައިޓެޑްގެ އޯލްޑް ޓްރެފަޑްގައި ކުޅުނު މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ޖެހިފައިނުވާއިރު ދެވަނަ ހާފުގެ ކުޅުން ފެށުނުތާ ހަތްވަނަ މިނިޓުގައި ރޭންޖާރސްގެ ބަޓްލޭންޑް އަތުން ބައިކޮޅަށް ވަން ލަނޑާއެކު މެންޗެސްޓަރ ޔުނައިޓެޑަށް ވަނީ ކުރި ލިބިފަ އެވެ.
ރޭންޖާރސް އިން މި މެޗުގެ ނަތީޖާ އެއްވަރުކޮށްފައިވަނީ މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައިވަނިކޮށް ސައިރިއެލް ޑެސާރސް ކާމިޔާބުކޮށްދިން ލަނޑުންނެވެ. މި ލަނޑާއެކު ރޭންޖާރސްގެ ސަޕޯޓަރުންގެ ފޯރި ގަދަވެގެން ދިޔަތަން ވަނީ ފެނިގެންގޮސްފަ އެވެ.
ނަމަވެސް މެޗުގެ ފުރިހަމަ ވަގުތުގެ ކުޅުން ނިމި އިތުރު ވަގުތުގެ ކުޅުމުގައި މެންޗެސްޓަރ ޔުނައިޓެޑްގެ ކެޕްޓަން ބްރޫނޯ ފެނާންޑޭޒް ވަނީ ލަނޑެއް ޖަހާ އެ ޓީމަށް މި މެޗުން ތިން ޕޮއިންޓް ކަށަވަރުކޮށްދީފަ އެވެ.
ރޭންޖާރސް އަތުން ޔުނައިޓެޑް މޮޅުވެ މުބާރާތުގެ ދެވަނަ ބުރުގެ ސީދާ ޖާގައެއް ލިބުމުގެ ފުރުސަތު ބޮޑުވެފައިވާއިރު މި މެޗުގައިވެސް އެ ޓީމުގެ އެންމެ މުހިންމު ކުޅުންތެރިޔާގެ ގޮތުގައި ބެލެވުނު ރަޝްފޯޑަށް ރުބެން އަމޮރިމް ބެންޗުންވެސް ފުރުސަތު ދީފައެއް ނުވެއެވެ. އަދި މިހާރު ކުރިއަށްދާ ކުޅުންތެރިން ގަނެ ވިއްކުމުގެ ބާޒާރު ނިމުމުގެ ކުރިން ވާނެ ގޮތެއް އަދި ބުނަން ނޭނގޭ ކަމަށްވެސް އަމޮރިމް ވަނީ ބުނެފަ އެވެ.