ރައްޔިތުންގެ މަޖިލީހުގެ މަތިވެރީ ދާއިރާގެ މެމްބަރު ހަސަން ޒަރީރު މަރާލަން ހަމަލާ ދިން ކަމުގެ ތުހުމަތުގައި ހައްޔަރުކުރި އިބްރާހިމް އަބްދުﷲ (ގައްބަރޭ)، އާއި އެ މައްސަލާގައި ދެން ތުހުމަތުކުރެވޭ ދެމީހުން ދޫކޮށްލަން ކްރިމިނަލް ކޯޓުން ނެރުނު އަމުރު ހައިކޯޓުން މިއަދު ބާތިލުކޮށްފި އެވެ.
ކުރިއަށް އޮތް ހަތް ދުވަހުގެ ތެރޭގައި އެ މީހުން އަލުން ބަންދުކޮށްދޭން ޕްރޮސިކިއުޓާ ޖެނަރަލް (ޕީޖީ) އޮފީހުން ނުވަތަ ފުލުހުންގެ ފަރާތުން ހުށަހަޅައިފި ނަމަ އެ އަމުރު ނެރެދިނުމަށް ވެސް ހައިކޯޓުން މިއަދު އަމުރުކޮށްފައިވެ އެވެ.
ވީ ކިހިނެއް؟ - ފަސް މީހުންގެ ގްރޫޕަކުން ޒަރީރަށް ހަމަލާދީފައި ވަނީ، މިދިޔަ 1 މެއިގެ ފަތިހު ރައްޓެހިންތަކަކާ އެކު މާލޭގެ ކެފޭއެއްގެ ތެރޭގައި އިންދަ އެވެ. އޭނާއަށް ދިން އެ ހަމަލާގައި މަރުތޭލަކުން ބޮލުގައި ޖަހާފައިވާ ކަމަށް ފުލުހުން ބުނެފައިވެ އެވެ.
މީގެ ކުރިން ވެސް މާރާމާރީ އާއި މަރުގެ އަދި ފޭރުމުގެ ގިނަ މައްސަލަތަކެއްގައި ހައްޔަރުކުރި އިބްރާހިމް އަބްދުﷲއަށް މި މައްސަލާގައި ފުލުހުން ކުރާ ތުހުމަތުތަކަކީ:
ގްރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ ތުހުމަތު
މީހަކު މަރާލަން އުޅުުން
މި މައްސަލާގައި ދެން ތުހުމަތުކުރެވެނީ:
މުލާން މުހައްމަދު، ކ.މާލެ/މ. ތާޖު
އަހްމަދު އައުޝަމް، ތ. ކިނބިދޫ/ ދީފްރަމްގެ
ތަފްސީލް - އެ އެންމެން ދޫކޮށްލަން ދަށުކޯޓުން ނެރުނު އަމުރުތައް ބާތިލުކޮށް، މިއަދު ހައިކޯޓުން ނެރުނު އަމުރުގައި ބުނީ، ތަހުގީގު މަރުހަލާ އާއި ޝަރީއަތުގެ މަރުހަލާ ނިމެންދެން މި މީހުން އަލުން ބަންދުކުރަން ޕްރޮސިކިއުޓާ ޖެނަރަލް (ޕީޖީ) އޮފީހުން ނުވަތަ ފުލުހުންގެ ފަރާތުން ދަށު ކޯޓަށް ހަތް ދުވަހުގެ ތެރޭގައި ހުށަހަޅައިފި ނަމަ އެ އަމުރު ނެރެދެންޖެހޭނެ ކަމަށެވެ. ހައިކޯޓުގެ އަމުރުގައި ބުނީ، ނުރައްކާތެރި ކުށްވެރީން ކޯޓުތަކުން އަމިއްލައަށް އިސްނަގައިގެން ދޫކޮށްލުމަކީ ކޮށްގެންވާނެ ކަމެއް ނޫން ކަމަށެވެ. ތަހުގީގުގެ މަރުހަލާ ދިގުލާދިއުމުގެ ސަބަބުން، އެފަދަ މީހެއްގެ ފަރާތުން ތަހުގީގު ނިމެންދެން ދޫކޮށްލަދިނުމަށް އެދި ހުށަހެޅިޔަސް، އެފަދަ މީހަކު ދޫކޮށްލެވޭނީ ގާނޫނުގެ ތަރަހައިގެ ތެރެއިން ބަލަންޖެހޭ ބެލުންތައް ބެލުމަށް ފަހު ކަމަށް ހައިކޯޓުގެ ހުކުމުގައި ވެ އެވެ.
ފަސްމަންޒަރު - އިބްރާހިމް އަބްދުﷲ ވަނީ، 2007ގައި ތޫނު އެއްޗަކުން ހަމަލާދީ އަލީ އިޝާރު، ހ. ކުބްރާ، މަރާލުމުގައި ބައިވެރިވި ކަމަށް ފުލުހުންގެ ތަހުގީގުގައި އެއްބަސްވެފަ އެވެ. އެ މައްސަލައިގައި، އޭރު 18 އަހަރު ނުވާ އިބްރާހިމްގެ މައްޗަށް ދައުވާކުރިޔަސް ކޯޓުން އޭނާ ދޫކޮށްލީ އެކަށީގެންވާ ވަރަށް ހެކި ނެތް ކަމަށް ބުނެ އެވެ.