ބިންވެރިޔާ ސްކީމްގެ ދަށުން، ހުޅުމާލެ ތިން ވަނަ ފިޔަވަހިން ދޫކުރާ ގޯތިތައް ހަވާލުކުރުމުގެ މަސައްކަތް މިއަދު ފަށައިފި އެވެ.
ވީ ކިހިނެއް؟ - ހުޅުމާލެ ތިންވަނަ ފިޔަވަހީގެ ލޭންޑް ޔޫސް ޕްލޭންއަށް ބަދަލު ގެނެސް، އާ ލޭންޑް ޔޫސް ޕްލޭނެއް ތައްޔާރުކޮށްފައިވާތީ، އެތަނުން ގޯތި ލިބިފައިވާ މީހުންގެ ގޯތީގެ ސަރަހައްދަށް ބަދަލުތަކެއް ވަނީ އައިސްފަ އެވެ.
އެ ބަދަލާ ގުޅިގެން އެ ސަރަހައްދުން މީގެ ކުރިން ގޯތި ހަވާލުކޮށްފައިވާ ފަރާތްތަކަށް އާ ލޮޓް ނަންބަރުތަކެއް ދީ، ގޯތި ލިބޭނެ ސަރަހައްދުތައް އަލުން ކަނޑައަޅަން ގުރުއަތުލާފައިވަނީ މިދިޔަ ޑިސެމްބަރު ތެރޭގަ އެވެ. 
ތަފްސީލް - ހައުސިން މިނިސްޓްރީން މިރޭ 'ދައުރު'އަށް ބުނީ އެ ސަރަހައްދުން ގޯތި ލިބުނު މީހުންގެ ތެރެއިން 337 މީހަކާ އެކު މިހާތަނަށް އެއްބަސްވުމުގައި ސޮއިކޮށްފައިވާ ކަމަށެވެ. އޭގެ ތެރެއިން އިން ވަކިކޮށް، މިއަދު ގޯތި ހަވާލުކުރީ 15 މީހަކަށް ކަމަށް މިނިސްޓްރީން ބުންޏެވެ.
މިނިސްޓްރީން ބުނިގޮތުގައި އެއްބަސްވުންތަކުގައި ސޮއިކުރެވޭ މިންވަރަކުން ގޯތިތައް ހަވާލުކުރަމުންދާނެ އެވެ.
ހުޅުމާލެ ތިންވަނަ ފިޔަވަހީން، ޖުމްލަ 698 ގޯތި ދޫކުރާނެ އެވެ. އެއީ:
1650 އަކަފޫޓުގެ 181 ގޯތި 
2050 އަކަފޫޓުގެ 242 ގޯތި 
2450 އަކަފޫޓުގެ 132 ގޯތި 
2850 އަކަފޫޓުގެ 62 ގޯތި 
3250 އަކަފޫޓުގެ 41 ގޯތި 
3650 އަކަފޫޓުގެ 16 ގޯތި 
4000 އަކަފޫޓު 24 ގޯތި