އެމެރިކާގެ ކެލިފޯނިޔާ ސްޓޭޓްގެ ލޮސް އެންޖެލީސްއަށް ވައި ބާރުވާން ފެށުމާ އެކު، އެ ރަށުގެ ޖަންގަލިތަކާއި މީހުން ދިރިއުޅޭ ސަރަޙައްދުތަކުގައި ރޯވެފައިވާ އަލިފާންގަނޑުތައް އިތުރަށް ފެތުރިދާނެ ކަމުގެ އިންޒާރު ދީފިއެވެ. އެމެރިކާގެ މޫސުމާ ބެހޭ އިދާރާއިން ބުނީ، ކެލިފޯނިޔާގެ ސަހަރާތަކާ ދިމާލުން ވައި ބާރުވަަމުންދާ ކަމުގައެވެ. އަދި، މިއާ އެކު، އަލިފާންގަނޑުތައް އިތުރު ސަރަޙައްދުތަކަށް ފެތުރިގެން ހިނގައިދާނެ ކަމުގެ ފުރުޞަތު ބޮޑުވެފައިވާ ކަމުގައެވެ.
ލޮސް އެންޖެލީސްގެ ޖަންގަލިބޯ ދެ ސަރަޙައްދެއްގައި އަދިވެސް ބިޔަ އަލިފާންގަނޑުތަކެއް ދަނީ އަނދަމުންނެވެ. އެ އަލިފާންގަނޑުތައް ކޮންޓްރޯލް ކުރުމަށް 8,500އަށްވުރެ ގިނަ އަލިފާން ނިއްވާ މީހުން ދަނީ ޙަރަކާތްތެރިވަމުންނެވެ. އޭގެ ތެރޭގައި، އެމެރިކާގެ ހަތް ސްޓޭޓަކާއި ބޭރު ދެ ޤައުމެއްގެ އަލިފާން ނިއްވާ މީހުން ހިމެނެއެވެ. އެ މީހުން ދަނީ، އަލިފާން ނިއްވުމަށް ބޭނުން ކުރާ މަތިންދާބޯޓުތަކާއި ހެލިކޮޕްޓަރުތައް ބޭނުން ކޮށްގެން، އަލިފާންގަނޑު ކޮންޓުރޯލު ކުރަން މެދުކެނޑުމެއް ނެތި މަސައްކަތް ކުރަމުންނެވެ.
ލޮސް އެންޖެލީސްގެ ޖަންގަލިތަކުގައި ކުއްލި ގޮތަކަށް ރޯވެ، ބިޔަ އަލިފާންގަނޑުތަކެއް ޢާންމުން ދިރިއުޅޭ ސަރަޙައްދުތަކަށް ފެތުރިގެން ގޮސްފައި ވަނީ ޖަނަވަރީ 7ވަނަ ދުވަހުއެވެ. އަލިފާނުގެ ސަބަބުން މީހުން ދިރިއުޅޭ ގިނަ އަދަދެއްގެ ގެދޮރާއި އިމާރާތްތައް ވަނީ އަނދައި އަޅިއަށްވެފައެވެ. ލޮސް އެންޖެލީސަކީ ގިނަ އަދަދެއްގެ މަހުޖަނުންނާއި މުނިފޫހިފިލުވުމުގެ ދާއިރާގެ މަޝްހޫރު ތަރިންގެ ގެދޮރު ހުންނަ ސަރަޙައްދެކެވެ.
މިހާރު ވެސް ޕެލިސޭޑްސް އަދި އީޓަން ސަރަޙައްދު ދަނީ ރޯވެ، އަނދަމުންނެވެ. ލޮސް އެންޖެލީސްގެ ހުޅަނގުގައި އޮތް ޕެލިސޭޑްސްގައި ރޯވެފައިވާ އަލިފާންގަނޑުގެ ސަބަބުން 96 އަކަ ކިލޯމީޓަރުގެ ސަރަޙައްދެއް ވަނީ އަނދައި ހުލިވެފައެވެ. ކޮންޓްރޯލް ކުރެވިފައި ވަނީ އެންމެ %18އެވެ. އީޓަން ސަރަޙައްދުން ވެސް ވަނީ 57 އަކަ ކިލޯމީޓަރުގެ ސަރަޙައްދެއް އަނދާފައެވެ. އެ އަލިފާންގަނޑުގެ %53 ކޮންޓުރޯލު ކުރެވިފައިވާ ކަމުގައި އިދާރާތަކުން ބުންޏެވެ.
ކެލިފޯނިޔާގެ ސަރަޙައްދުތަކަށް އޭޕްރިލް މަހުން ފެށިގެން ވާރޭވެހިފައި ނުވާ ކަމުގައި އެމެރިކާގެ ޤައުމީ މޫސުމާ ބެހޭ އިދާރާ (އެންޑަބްލިޔުއެސު)ން ބުންޏެވެ. އަދި، ލޮން އެންޖެލީސް ސަރަޙައްދުގައި ޖަނަވަރީ 14ވަނަ ދުވަހު ވައި މަޑުވެފައިވީ ނަމަވެސް، ކުރިއަށް އޮތް ދުވަސްތަކުގައި އެ ސަރަޙައްދަށް ވައި ބާރުވާނެ ކަމުގައި ވެސް އެ އިދާރާއިން ހާމަކުރިއެވެ. މި ގޮތުން، ގަޑިއަކު 112 ކިލޯމީޓަރަށް ވައި ގަދަވާނެ ކަމަށް އެ އިދާރާއިން ލަފާ ކުރެއެވެ. މިއީ، އަލިފާން ނިއްވަން މަސައްކަތް ކުރަމުންދާ މީހުންނަށް ލިބުނު މާޔޫސްކުރުވަނިވި ޚަބަރެކެވެ.
އަލިފާންގަނޑުތައް ޢާންމުން ދިރިއުޅޭ ސަރަޙައްދުތަކަށް ފެތުރުމާ ގުޅިގެން މަރުވި މީހުންގެ އަދަދު 25އަށް އުފުލިފައިވާ ކަމުގައި ލޮސް އެންޖެލީސްގެ މެޑިކަލް އެގްޒޭމިނަރުގެ އޮފީހުން ހާމަކުރިއެވެ. އަދި، 12,000އަށްވުރެ ގިނަ ގެދޮރާއި އިމާރާތްތައް ވަނީ އަނދައި އަޅިއަށްވެފައެވެ. އަލިފާނުގެ ނުރައްކާ އޮތް ސަރަޙައްދުތަކުގައި ދިރިއުޅޭ ރައްޔިތުން ރައްކާތެރި ހިސާބުތަކަށް ބަދަލު ކުރުމަށް އަދިވެސް މަސައްކަތް ކުރަމުންދާއިރު، ރައްކާތެރި ހިސާބުތަކަށް ބަދަލުވުމަށް 84,000އަށްވުރެ ގިނަ މީހުންނަށް ވަނީ އަންގާފައެވެ.
"ޓީވީ ސްކްރީނުން މަންޒަރު ބަލައިލުމާއި، ވައިގެ ތެރެއިން މަންޒަރު ފެނުމާ ވަރަށް ތަފާތު. ލިބިފައި ވަނީ ޚިޔާލަށް ވެސް ގެންނަން ދަތި ބޮޑު، ބޮޑު ގެއްލުމެއް،" ލޮސް އެންޖެލީސްގެ މޭޔަރު ކެރެން ބޭސް ވިދާޅުވިއެވެ. މޫސުން ލަފާކުރާ އަމިއްލަ ކުންފުންޏެއް ކަމުގައިވާ އެކިޔުވެދަރއިން ބުނީ އަލިފާނުގެ ސަބަބުން ލޮސް އެންޖެލީސަށް ލިބިިފައިވާ ގެއްލުމުގެ އަގު 250އާއި 275 ބިލިޔަން އެމެރިކާ ޑޮލަރުގެ އަގަކަށް އުފުލިފައިވާ ކަމަށް އަންދާޒާ ކުރެވޭ ކަމުގައެވެ. މިއީ، 2005ވަނަ އަހަރު އެމެރިކާއަށް އެރި ނުރައްކާތެރި ތޫފާން ކެޓްރީނާއަށް ފަހު އެ ޤައުމަށް ކުރިމަތިވި އެންމެ ނުރައްކާތެރި ޤުރުދަތީ ކާރިސާ ކަމުގައި އެ ކުންފުނިން ސިފަކުރިއެވެ.