ޑައިމޯފިން ބޭނުންކުރި މީހަކު ދެ އަހަރާ 11 މަހަށް ޖަލަށްލާން ކްރިމިނަލް ކޯޓުން ހުކުމްކޮށްފިއެވެ. މިދިޔަ ހޯމަދުވަހު އެ ކޯޓުން މި މައްސަލައިގައި ހުކުމްކުރީ މާލޭ މއ. އާދިއްޕަރު، އަހްމަދު ތޯރިގުގެ މައްޗަށެވެ. އޭނާގެ މައްޗަށް ކުރި ދައުވާގައި ވަނީ 2023ވަނަ އަހަރުގެ އޭޕްރީލް 28ވަނަ ދުވަހު، މއ. ވޭވްސައިޑުގެ އެޕާޓްމެންޓެއްގައި އޭނާ ހުއްޓައި، މަސްތުވާތަކެތި ގެންގުޅެ، އެ ތަކެތި ބޭނުންކުރާ ކަމަށް ތުހުމަތު ކުރެވިގެން ފުލުހުން އޭނާއަ ސުވާލުކުރިއިރު، އޭނާ އެ ކަމަށް އިއުތިރާފުވެފައިވާ ކަމަށެވެ. އެ ގޮތުން އޭނާއަކީ 1996ވަނަ އަހަރުން ފެށިގެން ޑައިމޯފިން ބޭނުންކުރާ މީހެއް ކަމަށް އިއުތިރާފުވެފައިވެއެވެ. މަސްތުވާތަކެއްޗާބެހޭ ގާނޫނުގެ ދަށުން ޑައިމޯފިން ބޭނުން ކުރުމުގެ ކުށަށް ކަނޑައަޅާފައި އޮންނަ އަދަބަކީ ތިން އަހަރަށް ޖަލަށްލުމެވެ. މި މައްސަލައިގެ ހުކުމް ކުރުމާ ހަމަޔަށް އޭނާ 15 ދުވަހާއި 10 ގަޑިއިރާ 36 މިނެޓު ބަންދުގައި ހޭދަކޮށްފައިވާތީ، އެ ބައި ހުކުމުން އުނި ކުރުމަށްފަހު ކޯޓުން ކަނޑައެޅީ ދެ އަހަރާ 11 މަހާއި 14 ދުވަހުގެ ޖަލު އަދަބެކެވެ. މަސްތުވަ ތަކެތީގެ މައްސަލައަކީ ރާއްޖޭގައި އެންމެ ބޮޑަށް ބޮޑުވެފައިވާ އެއް މައްސަލައެވެ. މި އަހަރު ފެށިގެން ދެ ހަފުތާއެއްހައި ދުވަސްވީއިރު، މަސްތުވާތަކެތީގެ 27 މައްސަލައެއް ފުލުހަށް ރިޕޯޓު ކޮށްފައިވެއެވެ. މިދިޔަ އަހަރު މަސްތުވާތަކެތީގެ 1،671 މައްސަލައެއް ރިޕޯޓު ކޮށްފައިވެއެވެ.