މިދިޔަ ސަރުކާރުގެ ގެދޮރުވެރިޔާ ސްކީމުން ގޯތިދިނުމަށް ނިންމައި، އާންމުކުރި ލިސްޓުގައި ހިމެނޭ މީހުންގެ ފޯމުތައް އިވެލުއޭޓް ކުރުމުގައި މާލެ ސިޓީ ކައުންސިލް ބައިވެރި ނުކުރާތީ، ގަލޮޅު އުތުރު ދާއިރާގެ ކައުންސިލަރު މުޙައްމަދު ސައިފް ފާތިހު ކަންބޮޑުވުން ފާޅުކުރައްވައިފިއެވެ. މާލޭގެ ރައްޔިތުންނަށް ފްލެޓު ދިނުމުގައި، އެ ރައްޔިތުންގެ ފަރާތުން ހޮވާފައި ތިބި ކައުންސިލަރުންގެ ބައިވެރިވުން އޮންނަން ޖެހޭނެ ކަމަށް ރައީސް ޑރ. މުހައްމަދު މުއިއްޒު މީގެ ކުރިން އޮތީ ވިދާޅުވެފައެވެ. އަދި އެ މަސައްކަތުގައި ހައުސިން މިނިސްޓްރީއާއެކު މަސައްކަތް ކުރުމަށް މާލެ ސިޓީ ކައުންސިލްގެ ކޮމިޓީއެއް އެކުލަވައިލަން ވެސް އެ މަނިކުފާނު ނިންމަވާފައިވެއެވެ. https://www.sun.mv/195356 ގެދޮރުވެރިޔާ ސްކީމަށް ކުރިމަތިލީ 20،000 މީހުންގެ ފޯމުތަކުގެ ބަދަލުގައި މިދިޔަ ސަރުކާރުން އިއުލާނުކުރި 4000 މީހުންގެ ފުލެޓު ލިސްޓު އެކަނި ވެރިފައިކުރުމުގެ މަސައްކަތް ކުރަން ނިންމިކަން ސަރުކާރުން އިއުލާންކުރީ އިއްޔެވެ. އެހެން ނަމަވެސް އެއީ މާލެ ސިޓީ ކައުންސިލްގެ ބައިވެރިވުމެއް ނެތިއެވެ. މާލެ ސިޓީ ކައުންސިލުން މިއަދު ބޭއްވި ޖަލްސާގައި، ސަރުކާރުގެ މި ނިންމުމާ ގުޅިގެން ސައިފްވަނީ ބައެއް ކަންކަން ފާހަގަ ކުރައްވާފައެވެ. ރައީސް ވިދާޅުވި ގޮތަށް، ކައުންސިލަރުންގެ ކޮމިޓީއަށް ފޯމު އިވެލުއޭޓް ކުރުމުގެ މަސައްކަތުގައި ބައިވެރިވުމުގެ ފުރުސަތު ނުދީ އޮތުމުން، އޭނާވަނީ އެ ކަމާ ކަންބޮޑުވުން ފާޅު ކުރައްވައިފައެވެ. އޭނާ ވިދާޅުވި ގޮތުގައި އިވެލުއޭޝަން މަރުހަލާގެ ސައްހަކަން ކަށަވަރު ކުރުމަށް ޓަކައި ކައުންސިލަރުންގެ ކޮމީޓީ އެ މަސައްކަތުގައި ބައިވެރި ކުރުވުމަށް ހައުސިން މިނިސްޓްރީން ދަނީ ދެކޮޅު ހަދަމުންނެވެ. އަލުން އިވެލުއޭޓް ކުރަނީ 4،000 ފޯމު އެކަނި ކަމަށް ސަރުކާރުން ބުނުމަކީ ދެކޮޅުޖެހޭ ކަމެއް ނޫން ކަމަށް ވެސް ސައިފް ވަނީ ވިދާޅުވެފައެވެ. އެއީ އިވެލުއޭޝަން މަރުހަލާގައި އެޕްލިކަންޓެއްގެ ޝަރުތު ހަމަނުވާ ހާލަތުގައި، އޭނާގެ ބަދަލުގައި ދެން ފްލެޓު ލިބޭނެ ފަރާތެއް ކަނޑައެޅެން އޮންނާނީ، ބާކީ ހުރި ހުރިހާ ފޯމެއް އަލުން ބަލައިގެންކަން ސައިފް ފާހަގަ ކުރެއްވިއެވެ. "އަލުން ބަލާއިރު އެއިން އެޕްލިކަންޓަކު ޝަރުތު ހަމަނުވާކަމަށް ފެނިއްޖެ ޙާލަތުގައި، އޭނާގެ ބަދަލުގައި ދެން ފްލެޓް ލިބޭނެ ފަރާތެއް ބަކީ ހުރި ހުރިހާ ފޯމެއް އަލުން ނުބަލާ ކަނޑައެޅޭނެކަމަކަށް ނުފެނޭ" ސައިފް ވިދާޅުވިއެވެ. https://www.sun.mv/201371 ގެދޮރުވެރިޔާ ސްކީމްގެ ދަށުން ފުލެޓު ލިބޭ މީހުންގެ ލިސްޓު ކުރިން އާންމުކުރި ނަމަވެސް، އެ ލިސްޓުގައި ބޮޑެތި ގޯސްތަކެއް އުޅޭ ކަމަށް ބުނެ، އެންޓި ކޮރަޕްޝަން ކޮމިޝަން (އޭސީސީ)ން ކުރިން އެކަން ހުއްޓުވިއެވެ. އެހެންވެ، މި ސަރުކާރުން ލިސްޓު ރީއިވޭލުއޭޓްކުރަން ނިންމައިފައިވެއެވެ. ގެދޮރުވެރިޔާ ސްކީމުން ފުލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވި 15،000 އަށްވުރެ ގިނަ މީހުންނަށް ފުލެޓު ދިނުމަށް އެމްޑީޕީ ސަރުކާރުން އޮތީ ނިންމައިފައެވެ. ފްލެޓު ލިބޭނެ ކަމަށް ކަނޑައަޅައި، އެ ސަރުކާރުން ގެޒެޓުކުރި ލިސްޓުގައި ހިމެނޭ އެންމެނަށް ފްލެޓާއި ގޯތި ދިނުމަކީ ރައީސް މުއިއްޒުގެ ވައުދުފުޅެކެވެ.