ހިއުމަން ރައިޓްސް ކޮމިޝަނުން އިންތިޒާމްކޮށްގެން، ދިވެހިރާއްޖޭގެ އަޑުގެ އެހީތެރިކަމާއެކު ކުރިޔަށްގެންދާ، އިންޓަރ ސްކޫލް ހިއުމަން ރައިޓްސް ކުއިޒް މުބާރާތް ފަށައިފިއެވެ.
މިމުބާރާތް ކުރިއަށްދާނީ މި މަހުގެ 19 އިން 25 ވަނަ ދުވަހުގެ ނިޔަލަށެވެ.
ހިއުމަން ރައިޓްސް ކޮމިޝަނުން ބުނީ، 2012 ވަނަ އަހަރުން ފެށިގެން ކުރިއަށްގެންދާ މިކުއިޒް މުބާރާތް ބޭއްވުމުގެ މަޤުސަދަކީ، ސްކޫލް ކުދިންނާއި މުޅި މުޖުތަމަޢު އިންސާނީ ހައްޤުތަކަށް އަހުލުވެރިކުރުވައި ހޭލުންތެރިކޮށް، އިންސާނީ ޙައްޤުތަކަށް އިޙްތިރާމް ކުރާ ސަޤާފަތެއް ޤާއިމްކުރުން ކަމަށެވެ.
މިއަހަރުގެ މުބާރާތުގައި ބައިވެފައިވަނީ ޖުމްލަ 12 ސްކޫލަކުން 98 ކުދިންނެވެ.
މި ސްކޫލްތަކުގެ ތެރޭގައި ހިމެނެނީ އިމާދުއްދީން ސްކޫލް، ދަރުމަވަންތަ ސްކޫލް، ތާޖުއްދީން ސްކޫލް، ކަލާފާނު ސްކޫލް، އަލް މަދަރަޞަތުލް އަރަބިއްޔަތުލް އިސްލާމިއްޔާ، ވިލުފުށީ ސްކޫލް، މުހިއްދިން ސްކޫލް، ޤާޒީ ސްކޫލް، ދ. އަތޮޅު ތައުލީމީ މަރުކަޒި، ދިއްގަރު ސްކޫލް، އަފީފުއްދީން ސްކޫލް އަދި ރެހެންދީ ސްކޫލްއެވެ.