ޕީޕީއެމުން އުމަރު ނަސީރު ވަކިކުރެއްވުމުން އެމައްސަލަ އުމަރުގެ ފަރާތުން ސިވިލް ކޯޓަށް ހުށަހަޅައިފިއެވެ.
ވީނިއުސްއަށް މައުލޫމާތު ދެއްވަމުން އުމަރު ނަސީރުގެ އަރިސް ބޭފުޅެއް ކަމުގައިވާ ޕީޕީއެމްގެ ކައުންސިލް މެންބަރު މާޒް އަޙްމަދު ސަލީމް ވިދާޅުވީ އުމަރު ޕީޕީއެމުން ވަކިކުރި މައްސަލައިގައި ހައްޤު ހޯދުމަށް އެމައްސަލަ ކޯޓަށް ހުށަހެޅީ މީގެ ކުޑައިރުކޮޅެއް ކުރިން ކަމަށެވެ.
ޕީޕީއެމްގެ ކުރީގެ ޑެޕިއުޓީ ލީޑަރު އަދި އެޕާޓީ އުފެއްދުމުގައި އިސް ދައުރެއް އަދާކުރެއްވި އުމަރު ނަސީރު ޕީޕީއެމުން ވަކިކުރެއްވީ އިއްޔެގައި ވަގުތެއްގައެވެ.
އުމަރު ޕީޕީއެމުން ވަކިކުރުމަށް އެޕާޓީގެ ސުލޫކީ ކޮމިޓީން ނިންމާފައިވަނީ ކޮމިޓީގައި ނެގުނު ވޯޓެއްގައި، ވޯޓުގައި ބައިވެރިވި ހަތަރު މެންބަރުންގެ އިއްތިފާޤުން ކަމަށް ވީނިއުސްއަށް ވަނީ މައުލޫމާތު ލިބިފައެވެ.
އަދި އުމަރު ޕީޕީއެމުން ވަކިކުރުމަށް ސުލޫކީ ކޮމިޓީން ނިންމި ނިންމުމާއި މެދު އުމަރު ހިތްޕުޅުހަމަޖެހިވަޑައިނުގަންނަވާނަމަ އެމައްސަލަ ޕީޕީއެމްގެ އިސްތިއުނާފު ކޮމިޓީއަށް 15 ދުވަހުގެ ތެރޭގައި ހުށަހެޅުމަށްވެސް ޕީޕީއެމްގެ ސެކްރެޓޭރިއޭޓުން ވަނީ އުމަރަށް އަންގާފައެވެ.
ނަމަވެސް މާޒް ސަލީމް ވިދާޅުވީ އުމަރު އެމައްސަލަ އިސްތިއުނާފަށް ހުށަހަޅުއްވަން ގަސްދު ނުކުރައްވާ ކަމަށެވެ.
"ޕާޓީން ވަކިކުރެއްވުމަށްފަހު ދެން ހުށަހަޅަން ޖެހޭ ކޮމިޓީއެއް އޮންނާނެ ކަމަކަށް އުމަރު ނަސީރު ދެކެވަޑައެއް ނުގަންނަވާ. އެހެންވީމާ އެމައްސަލަ އިސްތިއުނާފެއް ނުކުރާނެ" ސަލީމް ވިދާޅުވިއެވެ.
ސަލީމް ވިދާޅުވީ އުމަރު ޕީޕީއެމްގެ މެންބަރު ކަމުން ވަކިކުރެއްވީ ޕީޕީއެމްގެ ޕްރައިމަރީގައި ބޮޑެތި އޮޅުވާލުންތަކެއް ހިންގާފައިވާ ކަމަށް ބެލެވޭތީ އެމައްސަލަ ބެލުމަށް އުމަރުގެ ސަޕޯޓަރަކު ކޯޓަށް މައްސަލަ ހުށަހަޅާފައިވަނިކޮށް އެމައްސަލައިގައި ވަކިގޮތެއް ނުނިމެނީސް ކަމަށްވާތީ ޕީޕީއެމުން އިއްޔެ ނިންމި ނިންމުމާއި ގުޅިގެން ކޯޓު ހުކުމް އަންނަ ގޮތަކުން އުމަރަށާއި އޭނާގެ ސަޕޯޓަރުންނަށް އިއާދަނުކުރެވޭ ވަރުގެ ގެއްލުންތަކެއް ލިބިގެން ހިގައިދާނެ ކަމަށެވެ.
ސަލީމް ވިދާޅުވީ ޕީޕީއެމުން އުމަރު ވަކިކުރައްވާފައިވާ ވަގުތެއްގައި އަލުން ޕްރައިމަރީއެއް ބޭއްވުމަށް ކޯޓުން ހުކުމްކޮށްފިނަމަ އެފަދަ ޕްރައިމަރީއެއްގައި ޕާޓީގެ މެންބަރެއްގެ ހައިސިއްޔަތުން އުމަރަށް މިހާރު ވާދަކުރުމުގެ ފުރުސަތުވެސް ގެއްލިގެން ގޮސްފައިވާ ކަމަށެވެ.
"އެގޮތަށް އެއަމަލުކުރީވެސް ކޯޓުން އަލުން ޕްރައިމަރީ ބޭއްވުމަށް ހުކުމްކޮށްފާނެތީވެ. މިހާރު މިވީ ގޮތުން އެފަދަ ހާލަތެއްގައި އުމަރަށް ވާދަނުކުރެވޭނެ" ސަލީމް ވިދާޅުވިއެވެ.
އުމަރު ޕީޕީއެމުން ވަކިކުރަން ނިންމުމާއި ގުޅިގެން އުމަރުގެ ސަޕޯޓަރުން ވަނީ އިއްޔެ ޕީޕީއެމްގެ އޮފީސް ކުރިމަތީގައި މުޒާހަރާކޮށްފައެވެ.
ކުރީގެ ރައީސް މުހައްމަދު ނަޝީދު، ފ. އަތޮޅާއި ދ. އަތޮޅުގެ ބައެއް ރަށްރަށަށް ކުރައްވާ ދަތުރުފުޅެއް މިއަދު ފައްޓަވައިފި އެވެ.
މިދަތުރުފުޅުގައި ރައީސް ނަޝީދު އެންމެ ފުރަތަމަ ފ. ފީއައްޔަށެވެ. ފީއަލީ އެމަނިކުފާނު ކެމްޕެއިންގެ ހަރަކާތްތައް ކުރިއަށް ގެންދަވާނެއެވެ. އަދި ފީއަލީގެ ރައްޔިތުންނާވެސް އެމަނިކުފާނު ބައްދަލުކުރައްވާނެ އެވެ. ފީއަލީގެ އިތުރުން އެމަނިކުފާނު އެ އަތޮޅު، ދަރަނބޫދޫއަށާއި ބިލެތްދޫއަށާއި މަގޫދޫއަށާއި އަދި ނިލަންދޫއަށް ވެސް ވަޑައިގަތުމަށް ވަނީ ހަމަޖެހިފައެވެ.
ދ. އަތޮޅުން އެމަނިކުފާނު އެންމެ ފުރަތަމަ ވަޑައިގަތުމަށް ހަމަޖެހިފައިވަނީ މީދޫއަށެވެ. މީގެ އިތުރުން، ހުޅުދެލި، ރިނބުދޫ، އަދި ބަނޑިދޫއަށް ރައީސް ނަޝީދު ވަޑައިގަންނަވާނެ އެވެ.