ވަޒީރު ކަމުގައި މަޖިލީހުގެ ރުހުން ލިބިވަޑައިގަންނަވާނެކަން ޔަގީން ކަމަށާއި، މަގާމުގައި ދެމިހުންނަން އެމްޑީޕީ މެންބަރުންގެ ރުހުން ކޮންމެހެން ބޭނުން ނޫން ކަމަށް ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
ވަޒީރުންނަށް ރުހުން ދިނުމުގެ މައްސަލަ ކުރިޔަށް ގެންދަން ކައިރިވެފައި ވަނިކޮށް މިނިސްޓަރު އުމަރު ވިދާޅުވީ، މަޖިލީހުގެ މެޖޯރިޓީ އޮތީ ސަރުކާރު ކޯލިޝަންގައި ކަމަށާއި، އެމްޑީޕީން ރުހުން ނުދޭނެ ކަމަށް ބުނެ އެކަން އިއުލާން ކުރުމަކީ ހައިރާންވާ ކަމެއް ނޫން ކަމަށެވެ.
"ރުހުން ލިބޭނެ. އެމްޑީޕީ މެންބަރުންގެ ވޯޓު ނުލިބިދާނެތީ އެ ޕާޓީއާއެކު ޑީލެއްވެސް ނަހަދާނެ، އަދި އެއްވެސް މަޝްވަރާއެއް ވެސް ނުކުރާނެ" އުމަރު ވިދާޅުވި އެވެ.
އުމަރު ވިދާޅުވީ މަގާމުގައި ދެމިހުރެވެން އޮތީ އެމްޑީޕީގެ ރުހުމާއެކު ކަމަށް ވާނަމަ މަގާމުގައި ދެމިހުންނަން ވެސް ބޭނުންފުޅު ނުވާ ކަމަށެވެ. އަދި ވިދާޅުވީ ސަރުކާރު ކޯލިޝަންގައި ހިމެނޭ ޕީޕީއެމް ނޫން ޕާޓީތަކުގެ ވަޒީރުންނަށް ރުހުން ނުދޭނެ ކަމަށް ބުނާބުނުމަށް އިޝާރާތް ކުރައްވާ މިނިސްޓަރު ވިދާޅުވީ ރައީސް މުހައްމަދު ނަޝީދު މަސައްކަތް ކުރައްވަނީ ކޮންމެ ކަމެއްގެ ތެރެއަށްވެސް ވަދެވަޑައިގެން އެކަމަކަށް އަތް ބާނަން ކަމަށެވެ.
ރައީސް ނަޝީދު ވިދާޅުވެފައި ވަނީ ރައްޔިތުން ވޯޓު ދިނީ ޕީޕީއެމަށް ކަމަށާއި، އެމްޑީޕީގެ މެންބަރުން ރުހުން ދޭނީ ޕީޕީއެމްގެ ވަޒީރުންނަށް އެކަނި ކަމަށެވެ.