ދިއްދޫ ދާއިރާގެ މަޖިލިސް މެންބަރު އަބުދުއްލަތީފް މުހައްމަދު، އެކިއެކި ނަންނަމުގައި ދިއްދޫއަށް ކުރަމުންދާ ހަރަދުތަކާމެދު ކަންބޮޑުވާކަން އެމްޑީޕީގެ ހއ ދާއިރާއިން ހާމަކޮށްފިއެވެ.
އެ ދާއިރާއިން ނެރުނު ނޫސް ބަޔާނެއްގައި ބުނެފައިވަނީ ރައްޔިތުން މަޖިލީހުގެ ދިއްދޫ ދާއިރާގެ މެންބަރު މަޖިލީހަށް އިންތިހާބުވެ ވަޑައިގަތުމަށްފަހު މި ވޭތުވެދިޔަ އަހަރެއްގެ ތެރޭގައި ދިއްދޫއަށް އެކި ނަންނަމުގައި ބޮޑެތި ހަރަދުތަކެއް ކޮށްފައިވާ ކަމަށެވެ. އެގޮތުން މެންބަރުގެ އަމިއްލަ ހަރަދުގައި ކަމަށް ވިދާޅުވެ އެއް ލައްކަ ރުފިޔާގެ ޤުރުއާން މުބާރާތަކާއި އެއް ލައްކަ ރުފިޔާގެ ފުޓްބޯޅަ މުބާރާތަކާއި އޮލިމްޕިއަންސް ބޭންޑާއެކު ފަސް ލައްކަ ރުފިޔާގެ މިޔުޒިކް ޝޯވއެއް ބާއްވައި، ހއ އަތޮޅު ހޮސްޕިޓަލަށް ހަތް ލައްކަ ރުފިޔާގެ ލެބޯޓްރީ މެޝިނެއް ހަދިޔާކޮށްފައިވާ ކަމަށް އެ ބަޔާނުގައިވެއެވެ.
މީގެއިތުރުން މެންބަރުގެ އަމިއްލަ ހަރަދުގައި ކަމަށް ވިދާޅުވެ ދެ ކުއްޖަކަށް ޑޮކްޓަރުކަން ކިޔެވުމަށް ދެ މިލިއަން ރުފިޔާގެ ސްކޯލަޝިޕެއްދީ، މި ރަމަޟާން މަހު ދެ ލައްކަ ރުފިޔާގެ ޤުރުއާން މުބާރާތެއް ދިއްދޫގައި ބާއްވަމުންދާކަންވެސް އެ ބަޔާނުގައި ފާހަގަކޮށްފައިވެއެވެ.
އެ ބަޔާނުގައި ބުނެފައިވާ ގޮތުން އަބުދުއްލަތީފް މިހާތަނަށް ވަނީ ތިން މިލިއަނާއި ފަސް މިލިއަން ރުފިޔާ ދެމެދުގެ ހަރަދެއް ދިއްދޫއަށް ކޮށްފައެވެ.
މި ހަރަދުތަކަކީ ރައްޔިތުންގެ މަޖިލީހުގެ މެންބަރެއްގެ އެއް އަހަރު ދުވަހުގެ މުސާރައިން އެކަނި ކުރެވޭނެ ހަރަދުތަކެއް ކަމުގައި ނުވާނެ ކަމަށާއި އެހެންކަމުން މިކަންކަން ހިނގަމުންދަނީ ކިހިނެއް، ކޮން ގޮތަކަން ހޯދާ ފައިސާއެއްތޯ ބަލައިދިނުމަށް ކަމާބެހޭ ފަރާތްތަކަށް އެމްޑީޕީގެ ހއ ދާއިރާއިން ގޮވާލާފައެވެ.
"ރައްޔިތުންގެ މަޖިލީހުގެ ދިއްދޫ ދާއިރާގެ އިއްޒަތްތެރި މެންބަރު އަބުދުއްލަތީފް މުހައްމަދު ހޯދައްވާ ފައިސާއަކީ ރިޟްވަތާއި ކޮރަޕްޝަނުން ހޯދައްވާ ފައިސާ ކަމަށް ދިއްދޫ އެތައް ގިނަ ރައްޔިތުންނެއް ތުހުމަތުކޮށް، އެކަމުގެ ކަންބޮޑުވުން އެމްޑީޕީގެ ދިއްދޫ ދާއިރާއެކު ހިއްސާކޮށްފައިވޭ، އެހެންކަމުން ރިޟްވަތުގެ ހުތުރު އަދި ހަރާމް ފައިސާއިން ސިޔާސީ ލައްޒަތާއި ފައިދާ ހޯއްދެވުމުން ދުރުހެލިވެ ވަޑައިގަތުމަށް ދިއްދޫ ރައްޔިތުންގެ ނަމުގައި އެމްޑީޕީގެ ދިއްދޫގެ ދާއިރާއިން އެ މަނިކުފާނަށް އިލްތިމާސްކުރަން،" އެ ބަޔާނުގައިވެއެވެ.
އެ ބަޔާނުގައި ވަނީ ދާއިރާގެ ތަރައްގީއަށާއި ރައްޔިތުންނަށް ދިމާވާ ދަތިތައް ހައްލުކޮށްދިނުމަށް ސަރުކާރުގެ ތެރެއިން ކުރެވެން ހުރިކަން ކޮށްދިނުމަށް މެންބަރު އަބުދުއްލަތީފަށް އިލްތިމާސްކުރާކަމަށެވެ.
އަދި މެންބަރުގެ ފަރާތުން އެކަން ފެނިގެންނުދާ ކަމަށްވެސް އެ ބަޔާނުގައިވެއެވެ. އެގޮތުން ކަރަންޓު ބިލް ބޮޑުވުމާ ގުޅިގެން ދިއްދޫގެ ރައްޔިތުނާއި ވިޔަފާރިވެރިން މެންބަރާ ބައްދަލުކޮށް ހުށައެޅި ކަންބޮޑުވުންތަކަށް މެންބަރު އަބުދުއްލަތީފް ބީރު ކަންފަތެއް ދެއްވާފައިވާ ކަމަށް އެ ބަޔާނުގައި ވަނީ ފާހަގަކޮށްފައެވެ.
"ދިއްދޫ ދާއިރާގެ މަޖިލިސް މެންބަރަކީ އެ މަނިކުފާނުގެ މެންބަރުކަން ފިޔަވައި ސައްހަ އެހެން ގޮތަކުން އާމްދަނީއެއް ލިބިވަޑައިގަންނަވާ ބޭފުޅެއް ނޫން، އަދި އެ މަނިކުފާނުގެ ނަމުގައި ނުވަތަ އެ މަނިކުފާނު ހިއްސާވާ ވިޔަފާރީއެއްވެސް އޮންނަ ކަމަކަށް އެނގިފައެއް ނެތް،" ބަޔާނުގައިވެއެވެ.
މެންބަރު މިހާބޮޑު ހަރަދުތަކެއް އަމިއްލަ ހަރަދުތަކެއް ކަމަށް ވިދާޅުވެ ކުރައްވަމުންދާތީ މިކަންކަން އެންޓި ކޮރަޕްޝަނާއި އޮޑިޓަރ ޖެނަރަލާއި އެ ނޫންވެސް ކަމާބެހޭ ފަރާތްތަކުން ތަހުގީގުކޮށްދެއްވުމަށް އެ ދާއިރާއިން ވަނީ ގޮވާލައްވާފައެވެ.