މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމަށް، ނަން ހުށަހެޅުމުގެ ފުރްޞަތު މިއަދު ހުޅުއްވައިލައްވައި، އެކަމާބެހޭ ލިޔުން، ދިވެހި ސަރުކާރުގެ ގެޒެޓްގައި މިއަދު ޝާއިޢު ކުރައްވައިފިއެވެ.
މިއިނާމާބެހޭ އިތުރު ތަފްޞީލު މަޢުލޫމާތު، ޚާއްޞަ އިނާމާބެހޭ ކޮމިޓީން ރާއްޖޭގެ ޚަބަރުފަތުރާ ވަސީލަތްތަކަށް ދެއްވީ، މިއަދު މެންދުރުކުރިން ރައީސުލްޖުމްހޫރިއްޔާގެ އޮފީހުގައި ބޭއްވެވި ޕްރެސް ކޮންފަރެންސެއްގައި، އެ ކޮމެޓީގެ ޗެއާމަން ޑރ. އަހުމަދު އަންވަރު ވިދާޅުވީ މަތީ ދަރަޖަ ހޯދާ ފަރާތްތަކަށް ދޭ އިނާމު ފަސް ކެޓަގަރީއަކަށް ބަހާލައިގެން ދޭ ގޮތަށް ހަމަޖައްސާފައިވާ ކަމަށެވެ.
އިނާމު ދިނުމަށް ކަނޑައަޅާފައިވާ ފަސް ދާއިރާއަކީ މަތީ ތައުލީމާއި ތަމްރީންގެ ކޯހަކުން އެންމެ މަތީ ވަނަ ހޯދާ ފަރާތްތަކާއި، ދިވެހިރާއްޖޭގެ ގައުމީ ސަނަދުތަކުގެ އޮނިގަނޑުގެ އެންމެ މަތީ ލެވެލްގެ ސަނަދެއް ހާސިލްކުރާ ފަރާތްތަކާއި، ބައިނަލްއަގްވާމީ މައުރަޒަކުން ނުވަތަ މުބާރާތަކުން ނުވަތަ މިނޫންވެސް ބައިނަލްއަގްވާމީ މިންކުރުމަކުން އެންމެ މަތީ ވަނަ ނުވަތަ ޝަރަފު ހޯދާ ފަރާތްތަކާއި، މަސައްކަތްތެރިކަމާއި އުފެއްދުންތެރިކަމުގެ ރޮނގުން އާދަޔާ ހިލާފު ކާމިޔާބީއެއް ހާސިލް ކުރާ ފަރާތްތަކުގެ އިތުރުން ސަރުކާރުން ކަނޑައަޅާ ފެންވަރަކަށް މަސައްކަތެއް ކުރާ ނުވަތަ އެއްޗެއް އުފައްދާ ފަރާތްތަކެވެ.
އްޖެ އަށް ރީތިނަން ހޯދައިދޭ ފަރާތްތަކަށް މީގެ ކުރިން ސަރުކާރުން ދެއްވާ ހާއްސަ އިނާމު 1985 ވަނަ އަހަރުން ފެށިގެން 2007 ވަނަ އަހަރުގެ ނިޔަލަށް ދެއްވަމުން ގޮސް އެއަށް ފަހު 2009 ވަނަ އަހަރު ރައީސް މުހައްމަދު ނަޝީދުގެ ސަރުކާރުން ނިންމެވީ އެ އިނާމު އެކަމާ ގުޅޭ ސަރުކާރުގެ އިދާރާއަކުން ދެއްވަމުން ގެންދަވާ ގޮތަށެވެ.
މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމު ދެއްވުމުގެ މަޤްޞަދަކީ، ރާއްޖެއަށް ރީތި ނަން ހޯދައިދޭ ފަރާތްތަކުގެ ކާމިޔާބީއާއި، ހިތްވަރާއި ހުނަރުން މަތީ ވަނަތައް ހޯދާ ފަރާތްތަކުގެ ކާމިޔާބީ އިޙްތިފާލު ފާހަގަކުރުމާއި، މިފަދަ ކާމިޔާބީތައް ހޯދުމަށް ހިތްވަރު ދިނުމާއި، ރާއްޖެއަށް ބޭނުންވާ ދާއިރާތަކަށް ދިވެހިންގެ އުފެއްދުންތެރިކަމާއި މަސައްކަތްތެރިކަން މިޞްރާބު ކުރުން ކަމަށް ރައީސް އޮފީހުން ބުނެ އެވެ.
މި އިނާމު ދިނުމަށް ހަމަޖެހިފައިވަނީ، ސަރުކާރުން ކަނޑައަޅާ ދާއިރާއަކުން ސަރުކާރުން ގަބޫލުކުރާ ފެންވަރަކަށް މަސައްކަތެއްކުރާ ނުވަތަ އެއްޗެއް އުފައްދާ ފަރާތްތަކަށެވެ. މި އިނާމުދޭން ކަނޑައެޅޭ މަސައްކަތްތެރިކަމާއި އުފެއްދުންތެރިކަމުގެ ދާއިރާތަކާއި، އިނާމުދެވޭ ފެންވަރު، ކޮންމެ އަހަރަކު އިޢުލާނު ކުރެވޭނެއެވެ. މި އިނާމުދޭނީ 2013 ވަނަ އަހަރުން ފެށިގެންނެވެ. މިގޮތުން، ކުރިއަށް އޮންނަ އަހަރު އިނާމު ދެވޭ ދާއިރާ ނުވަތަ ރޮނގު އިޢުލާނު ކުރާނީ، މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމު ދެއްވާ ޖަލްސާގައެވެ.
މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމު ދެއްވުމަށް ހަމަޖެހިފައިވަނީ، މިދެންނެވި ކާމިޔާބީތައް 2007 ވަނަ އަހަރު ނުވަތަ އޭގެފަހުން ޙާޞިލްކޮށްފައިވާ އަދި އެކަމަކަށް ސަރުކާރުން ދެއްވާ ޚާއްޞަ އިނާމު، ކުރިން ލިބިފައިނުވާ ފަރާތްތަކަށެވެ. އިނާމުގެ ގޮތުގައި ރައީސުލްޖުމްހޫރިއްޔާ ދެއްވާނީ މެޑެއްޔަކާއި ހަނދާނީ ލިޔުމެކެވެ.