އިސްރާއީލުގެ ގައުމީ ސަލާމަތާބެހޭ މިނިސްޓަރު އިތަމާރު ބެން-ގްވީރު ވަނީ ޣައްޒާއަށް ފޮނުވާ އިންސާނީ އެހީ މުޅިން ހުއްޓާލުމަށް ގޮވާލައިފައެވެ. އޭނާ ބުނާ ގޮތުގައި ހަމާސްއިން މި އެހީގެ ތަކެތި އަތުލައިގަނެ އެ ޖަމާޢަތުގެ ހަރަކާތްތައް ކުރިއަށް ގެންދިއުމަށް ބޭނުންކުރެއެވެ.
އެކްސް (ކުރީގެ ޓްވިޓަރ) ގައި ކުރި ޕޯސްޓެއްގައި ބެން-ގްވީރު ވަނީ ޣައްޒާއަށް ކާބޯތަކެއްޗާއި އެހީ ފޮނުވުމަކީ ”މުޅިން ނުބައި ކަމެއް“ ކަމަށާއި، މިއީ ”ހަމާސްއަށް އޮކްސިޖަން ދިނުން“ ކަމަށް ބުނެފައެވެ. އަދި އެހީ މުޅިން ހުއްޓާލުމަށް ކެބިނެޓުގައި ވޯޓަކަށް އެހުމަށް ބާރުއަޅާނެ ކަމަށްވެސް އޭނާ ބުނެފައިވެއެވެ.
”ޣައްޒާއަށް ބޭނުންވަނީ ’އިންސާނީ‘ އެހީ ވަގުތީގޮތުން ހުއްޓާލުމެއް ނޫނެވެ. އެކަން މުޅިން ހުއްޓާލުމެވެ،“ ބެން-ގްވީރު ލިޔެފައިވެއެވެ. މީގެ އެއް މަސް ކުރިން އެހީ ފޮނުވުމާ ދެކޮޅަށް ވޯޓުދިން ހަމައެކަނި ކެބިނެޓް މެންބަރަކީ އޭނާކަމަށް ބުނެ، އޭނާގެ އިންޒާރުތަކަށް އަޅާނުލި ފަރާތްތަކަށް ފާޑުކިޔާފައިވެއެވެ. ”މިއަދު ކުރިން އެނގިފައި އޮތް ކަމެއް ސާފުވަމުން އެބަދެއެވެ: ހަމާސްއިން އެ ޖަމާޢަތް ދެމެހެއްޓުމަށް އެހީގެ ކާބޯތަކެއްޗާއި މުދާ އަތުލައިގަނެއެވެ،“ އޭނާ އިތުރުކޮށްފައިވެއެވެ. ”އެހީ ހުއްޓާލުމުން އަވަހަށް އަހަރެމެން ކާމިޔާބާ ހަމައަށް ވާސިލުވާނެއެވެ.“
ބެން-ގްވީރުގެ މި ބަޔާން އައިސްފައިވަނީ ޣައްޒާގެ 2.3 މިލިއަން ރައްޔިތުން ކާބޯތަކެތީގެ ބޮޑު ދަތިކަމަކާއި ބަނޑުހައިހޫނުކަމުގެ ނުރައްކަލާ ކުރިމަތިލަމުންދާ ދަނޑިވަޅެއްގައެވެ. އިސްރާއީލުން މާރިޗު އަދި އޭޕްރީލް މަހު މުޅިން ބްލޮކޭޑެއް ތަންފީޒުކުރި ނަމަވެސް، ބައިނަލްއަޤްވާމީ ފަރާތްތަކުގެ ޕްރެޝަރާއެކު މޭ މަހު އެހީ ފޮނުވުން ވަނީ އަލުން ފަށާފައެވެ.
އެހެންނަމަވެސް، އެކި ޖަމްޢިއްޔާތަކާއި އދ އިން ވަނީ އާންމު ރައްޔިތުންނަށް އެހީ ފޯރުކޮށްދިނުމުގައި ދަތިތަކާ ކުރިމަތިވެފައިވާ ކަމަށް ބުނެފައެވެ. މީގެ ތެރޭގައި ހަލާކުވެފައިވާ އުމްރާނީ ވަސީލަތްތަކާއި، އަސްކަރީ ޗެކްޕޮއިންޓްތަކާއި، އެއަރ ސްޓްރައިކްތަކާއި އަދި ސަރަޙައްދުގައި އޮތް ހަމަނުޖެހުން ހިމެނެއެވެ.
މީގެ އިތުރުން، ފާއިތުވި ހަފްތާތަކުގައި ކާބޯތަކެއްޗަށް ބޭނުންވެފައިވާ އާންމުން އެއްވެފައި ތިއްބައިރު ތަންތަނުގައި ބަޑި ޖަހާފައިވާ ގިނަ ހާދިސާތަކެއް ހިނގާފައިވެއެވެ. މިކަމުން އިންސާނީ އެހީގެ މަސައްކަތްތަކުގެ ރައްކާތެރިކަމާމެދު އިތުރު ބިރުވެރިކަން އުފެދިފައިވެއެވެ.
އިންސާނީ އެހީގެ ޖަމްޢިއްޔާތަކުން ވަނީ މިހާރު ހިންގަމުންދާ މަދު އެހީގެ ނިޒާމު އެކަށީގެންނުވާ އަދި ރައްކާތެރިނޫން ކަމަށް ކުށްވެރިކޮށްފައެވެ. އަދި ބައެއް ފަރާތްތަކުން ވަނީ މިނިވަން، ރައްކާތެރިކަން ލިބިފައިވާ އިންސާނީ އެހީގެ މަގުތަކެއް ޤާއިމުކުޤާއިމުކުރުމަށް ގޮވާލާފައެވެ.
 
Your email address will not be published. Required fields are marked *
ހިޔާލު *
ނަން
Δdocument.getElementById( "ak_js_1" ).setAttribute( "value", ( new Date() ).getTime() );
Email: [email protected] | Phone: +960 9770541Address: M. Golden Bones, 3rd Floor, Male‘ Maldives© Copyright 2020, Dhuvas.mv, All Rights Reserved