'މަކިޓާ' ބްރޭންޑުގެ ފޭކު ނުވަތަ ނަކަލު އުފެއްދުންތަކެއް ބާޒާރުގައި ދައުރުވަމުންދާތީ އެކަމަށް ސަމާލުވާން އެ ކުންފުނިން އިލްތިމާސްކޮށްފި އެވެ.
އެނގުން މުހިންމު - މަކިޓާ ބްރޭންޑުގެ ރާއްޖޭގެ އެކްސްކްލޫސިވް ޑިސްޓްރިބިއުޓަރަކީ އެސްޓީއޯ އެވެ. މަކިޓާއިން ކަނޑައަޅާފައިވާ މިންގަނޑުތަކާ އެއްގޮތަށް، އެ ބްރޭންޑުގެ ފެންވަރު ރަނގަޅު އޮރިޖިނަލް އުފެއްދުންތައް އެސްޓީއޯއިން ރާއްޖެ އެތެރެކޮށް ވިއްކަމުން އަންނަތާ ގިނަ އަހަރުތަކެއް ވަނީ ވެފަ އެވެ.
ވީ ކިހިނެއް؟ - އެސްޓީއޯއިން މިރޭ ނެރުނު ނޫސްބަޔާނެއްގައި ބުނީ އެކި ގޮތްގޮތަށް މަކިޓާ ބްރޭންޑުގެ އުފެއްދުންތައް ރާއްޖެ އެތެރެކުރާ މިންވަރު އިތުރުވެފައިވާ ކަމަށާއި ބާޒާރުގައި މަކިޓާގެ ފޭކު އުފެއްދުންތައް ދައުރުވަމުންދާކަން ފާހަގަވެފެފައިވާ ކަމަށެވެ.
އެގޮތަށް ދައުރުވަމުންދާ އަސްލު ނޫން އުފެއްދުންތަކަކީ، އެސްޓީއޯއިން ބުނި ގޮތުގައި، ކަސްޓަމަރުންނަށް އޭގެ ބޭނުން އެދެވޭ ގޮތުގައި ހިފޭނެކަމުގެ ޔަގީންކަން ނެތް، ރައްކާތެރިކަމުގެ އެއްވެސް ގެރެންޓީއެއް ނެތް އުފެއްދުންތަކެކެވެ.
އެހެންކަމުން ދިމާވެދާނެ ނުރައްކާތެރި ހާދިސާއަކުން ރައްކާތެރިވުމަށްޓަކައި އުފެއްދުންތައް ގަތުމުގެ ކުރިން އެ އުފެއްދުންތަކަކީ އޮރިޖިނަލް އުފެއްދުންތައްކަން ކަށަވަރު ކުރުމަށް ފަހު ނޫނީ ނުގަތުމަށް އެ ކުންފުނިން ވަނީ އިލްތިމާސްކޮށްފަ އެވެ.
އެސްޓީއޯއިން ބުނީ މަކިޓާގެ އޮރިޖިނަލް އުފެއްދުންތައް:
އެސްޓީއޯގެ އައުޓްލެޓުތަކާއި އެ ކުންފުނީގެ ހުއްދަ ލިބިފައިވާ ފަރާތްތައް މެދުވެރިކޮށް ލިބޭނެ ކަމަށް
އެސްޓީއޯގެ ސާވިސް ސެންޓަރުން އާފްޓަ ސޭލްސް ހިދުމަތް ލިބޭނީ ހަމައެކަނި އެ ތަންތަނުން ގަންނަ މަކިޓާ އުފެއްދުންތަކަށް
"އެހެންކަމުން މަކިޓާ ބްރޭންޑުގެ ފޭކު އުފެއްދުންތަކާ މެދު ސަމާލުވުމަށް ކަސްޓަަމަރުންނަށް އިލްތިމާސް ކުރަމެވެ،" އެސްޓީއޯގެ ބަޔާނުގައިވެ އެވެ.
އެސްޓީއޯ މަކިޓާ ޝޯރޫމަށް ދިއުމުން މަކިޓާ ބްރޭންޑުގެ އުފެއްދުންތަކުގެ އަސްލުކަން ކަށަވަރު ކުރެވޭނެ އެވެ.