ހުޅުމާލޭގެ ދެވަނަ ފިޔަވަހީގައި ހުރި ކަރަންޓު ޓްރާންސްފޯމަރެއްގެ ތެރެއަށް ވައްކަން ކުރަން ވަދެ އިން ފިރިހަނަކު ފުލުހުން ހައްޔަރުކޮށްފިއެވެ.
މި މައްސަލައިގައި ފުލުހުން ހައްޔަރުކޮށްފައިވަނީ ނ.މާޅެންދޫ، ފެހި އައްސޭރި، އަހްމަދު ރިސްފާން (32އ) އެވެ.
ފުލުހުން ބުނީ އަހްމަދު ރިފްޝާން ހައްޔަރުކޮށްފައިވަނީ، ރޭ ފަތިހު 5:30 ހާއިރު ހުޅުމާލެ ފޭސް2 ގެ ހިޔާ 13 ފްލެޓް ކައިރީގައި ހުރި ޓްރާންސްފޯމަރެއްގެ ތެރެއަށް ވަދެ ވައްކަން ކުރަން އުޅުނު ކަމަށް ލިބުނު ރިޕޯޓަކާއި ގުޅިގެން ކަމަށެވެ.
ފުލުހުން އިތުރަށް ބުނީ މި މައްސަލަ ތަހުގީގުކުރަމުން އަންނަކަމަށެވެ.
ފަހަކަށް އައިސް މާލެ ސަރަހައްދުގައި ޓްރާންސްފޯމަރުތަކުން ވައްކަން ކުރުމުގެ މައްސަލަތައް ފެންމަތިވަމުން އަންނައިރު މިއަހަރު މާޗް މަހުގެ ތެރޭގައި ސްޓެލްކޯގެ ސަބްސްޓޭޝަނެއްގައި ހުރި ޓްރާންސްފޯމަރުން ވައްކަން ކުރަންއުޅުނު މީހަކު ވަނީ މަރުވެފައެވެ. މީގެ ކުރުން ސްޓެލްކޯގެ އެމްޑީ ހުސެއިން ފަހުމީ ވިދާޅުވީ ހުޅުމާލެގެ ބައެއް ސަރަހައްދުތަކުން ކަރަންޓު ކެނޑެން މެދުވެރިވީ ޓްރާންސްފޯމަރުތަކުން ވައްކަން ކުރުމާއި ގުޅިގެންކަމަށާއި އަދި މިއީ މިކަން ކުރާ ފަރާތްތަކަށްވެސް ބޮޑު ނުރައްކަލެއް ކަމަށެވެ.