ށ. މިލަންދޫ ޕޮލިސް ސްޓޭޝަންގައި މަސައްކަތްކުރާ ފުލުހުންތަކެއްގެ އެކައުންޓަށް ގިނަ އަދަދެއްގެ ފައިސާ ޖަމާކުރި މައްސަލާގައި ހިމެނޭ ހަތަރު ފުލުހަކު ވަޒީފާއިން ވަކިކުުރަން ނިންމައި، އެ ފުލުހުން ސަސްޕެންޑުކޮށްފި އެވެ. 
ތަފްސީލް - އެ ފުލުހުންގެ އެކައުންޓަށް ގިނަ އަދަދެއްގެ ފައިސާ ޖަމާކޮށްފައިވާ މައްސަލަ ފުލުހުންގެ ޕްރޮފެޝަނަލް ސްޓޭންޑަޑްސް ކޮމާންޑުން ތަހުގީގު ކުރަން ފެށީ، މިދިޔަ ޖުލައި މަސްތެރެ އެވެ. އެ މައްސަލައިގެ ތަހުގީގަށް އެ ފުލުހުން މާލެ ގެނެސްފައިވަނީ 8 ޖުލައިގަ އެވެ.
ބުނީ ކީކޭ؟ - ފުލުހުން މިއަދު 'ދައުރު' އަށް ބުނިގޮތުގައި އެ ފުލުހުން ވަކިކުރަން ނިންމީ، ފުލުހުންގެ ޕްރޮފެޝަނަލް ސްޓޭންޑަޑްސް ކޮމާންޑުން ބެލުމަށްފަހު ޑިސިޕްލިނަރީ ބޯޑަށް ހުށަހެޅުމުންނެވެ.
އެގޮތުން އެ ބޯޑުން ނިންމީ:
ހަތަރު ފުލުހަކު ވަޒީފާއިން ވަކިކުރަން
އިސްތިއުނާފީ މަރުހަލާ ނިމެންދެން ވަޒީފާއިން ސަސްޕެންޑުކުރަން
މި މައްސަލައާގުޅޭ އިތުރު ތަފްސީލެއް ފުލުހުން އަދިވެސް ހާމައެއް ނުކުރެ އެވެ. އެ ފުލުހުންގެ އެކައުންޓުތަކަށް ޖަމާވެފައިވާ ފައިސާގެ އަދަދުތަކެއް ވެސް ހާމައެެއް ނުކުރެ އެވެ.