ޖޭއެސްސީގެ މެމްބަރު ކަމަށް އާންމުންގެ ތެރެއިން ކުރިމަތި ލުމުގެ ފުރުޞަތު ރައްޔިތުންގެ މަޖިލީހުން ހުޅުވާލައިފިއެވެ. މިކަމަށް ޓަކާ ރައްޔިތުންގެ މަޖިލީހުން މިއަދު ކުރި އިޢުލާނެއްގައި ބުނީ ޖޭއެސްސީގެ މެންބަރު ކަމަށް ކުރިމަތިލާ ފަރާތް ތަކަކީ ހައްދެއް ކަނޑައަޅާފައިވާ ކުށެއް، ހިޔާނާތުގެ ކުށެއް، ނުވަތަ ރިޝްވަތުގެ ކުށެއް ކުރިކަން ޝަރީއަތަށް ސާބިތުވެފައިވާ މީހަކު ކަމުގައި ނުވުމާއި ސިޔާސީ މަގާމެއް ފުރަމުންދާ މީހަކު ކަމުގައި ނުވުމާއި ސިޔާސީ ޕާޓީއެއްގެ މެމްބަރަކަށް ނުވުމާއި ބުއްދި ސަލާމަތުން ހުރި 25 އަހަރުވެފައިވާ މީހަކަށް ވާންޖެހޭނެ ކަމަށެވެ. މިކަމަށް އެދޭ ފަރާތް ތަކުން ކުރިމަތި ލުމުގެ ފުރުޞަތު ހުޅުވާލާފައި ވަނީ މިހިނގާ ޖުލައި މަހުގެ ހަތްވަނަ އަށްވާ ހޯމަދުވަހުން ފެށިގެން، 13 ޖުލައި 2014 ވާ އާދިއްތަ ދުވަހާ ހަމަޔަށް ކަމަށް ރައްޔިތުންގެ މަޖިލީހުގެ އިދާރާއިން ވަނީ ބުނެފަ އެވެ. ޖޭއެސްސީގައި އާންމު މެމްބަރެއްގެ ގޮތުގައި މިހާރު އިންނަވަނީ އައްޝެއިހް ޝުއައިބު އަބްދުލް ރަހުމާނެވެ.