މަސްވެރިން ބާނާ މަސް ނުކިރި އެތައް ގަޑިއިރެއް ކިޔޫގައި މަޑު ކުރަން ޖެހޭތީ މަސްވެރިން ކަންބޮޑުވެއްޖެ އެވެ.
ބައެއް މަސްވެރިން މިމައްސަލާގައި ކަންބޮޑުވުން ފާޅުކޮށްފައި މިވަނީ މިފްކޯ އިން ޅ. ފެލިވަރުގައި ހިންގާ މަސް ކާރުހާނާއަށް މަސް ނުކިރުވި އެތައް އިރަކު ކިޔޫގައި ތިބޭގޮތަށް އިންތިޒާމުތަކެއް ހަމަޖައްސާފައިވާތީ ކަމަށް ބުނެ އެވެ.
ވީނިއުސްއާއި މިއަދު ވާހަކަދެއްކި މަސްވެރިޔަކު ބުނީ މަސްވެރިކަން ރަނގަޅުވަމުން އަންނަ މިދުވަސްވަރު މަސް ކިރޭނެ އިންތިޒާމެއް ނެތި އެތައް ގަޑި އިރަކު ކިޔޫގައި ޖެހިގެން ދޯނި ބާއްވަން ޖެހޭތީ ވަރަށް ބޮޑަށް ކަންބޮޑުވާ ކަމަށެވެ.
މަސްވެރިޔާ ބުނީ މަސްތައް ނުކިރި ހޭދަވާ ވަގުތުތަކަކީ ވަރަށް ބޮޑަށް ބޭކާރުވެގެންދާ ވަގުތުތަކެއް ކަމަށާއި މިހެންވުމުގެ ސަބަބުން މަސްބާނާ ދުވަސްވަރު މަސްވެރިންނަށް މަސް ލިބުމުގައި ވަރަށް ބޮޑު ދަތިތަކެއް ކުރިމަތިވެ މިފްކޯގެ ސަބަބުން އާމްދަނީ ހޯދެން އޮތް މަގަށް އިތުރު ހުރަސްތަކެއް އެޅިގެންދާ ކަމަށެވެ.
އޭނާ ބުނީ މިގޮތަށް ކިޔޫގައި މަޑުކޮށްގެން ތިބޭއިރު މަސްތައް ހަލާކު ނުވާނެ ގޮތަށް ރައްކާކުރެވޭނެ އިންތިޒާމެއް ފެލިވަރު ބަނދަރުގައި މަސްވެރިންނަށް ހަމަޖައްސާފައި ނެތް ކަމަށާއި މަސްވެރިންނަށް އައިސް ލިބުމުގެ ދަތިކަން ވެސް އިންތިހާއަށް އެބައޮތް ކަމަށެވެ.
"އަޅުގަނޑުމެން މިއަންނަނީ 15 ޓަނުން 20 ޓަނުން 25 ޓަނުން މަސް ހިފައިގެން. އަންނަ އިރު މަސްތައް ކިރޭނެ ރަނގަޅު އިންތިޒާމެއް ނޯވޭ ހަދާފަ. މަސްވެރިކަން އެއިރަކު ރަނގަޅު ހިސާބަކަށް ހުރިހާ ކަންކޮޅުތަކުން މަސްވެރިން އަންނާނީ. ދެން ބައިވަރު ދޯނި އެއްފަހަރާ މަސްކިރަން އަންނާނެ ކަން އެބަ އިނގޭ. އެހެންވީމަ މަސްކިރުމަށް މިއަށްވުރެ ހަރުދަނާ ނިޒާމެއް ގާއިމްވެފައި އޮންނަން ޖެހޭ. ދެން އެތައް ގަޑިއިރެއް ކިޔޫގައި އޮންނަން ޖެހޭއިރު މަސްތައް ހަލާކުކޮށްނުލާ ރައްކާކުރެވޭނެ ފަދަ ގޮތެއް ނޯވޭ. ކޮންމެ ދޯންޏަކަށް ދެނީ ވަރަށް ކުޑަ އައިސްކޮޅެއް. މިއައިސްކޮޅުން މަސްތައް ހަލާކުކޮށްނުލާ ނުހިފެހެއްޓޭނެ. ވަރަށް ދަތިހާލުގައި އަޅުގަނޑުމެން މަސްކިރަމުން މިދަނީ." މަސްކިރުމުގައި ހުރި ދަތިކަން ފާހަގަކުރަމުން މަސްވެރިޔާ ބުންޏެވެ.
އެހެން މަސްވެރިޔަކު ބުނީ ފެލިވަރުގައި ހަދާފައިވާ މަސް ރައްކާކުރުމަށް ބޭނުންކުރާ ކޯލްޑް ސްޓޯރޭޖް ހަލާކުވެފައި ހުންނަތާ ވެސް ހަތަރު ވަރަކަށް އަހަރުވެފައިވާ ކަމަށެވެ. އަދި މަސް ކިރަން މިފްކޯ އިން ގެންގުޅޭ ދެތިން ބޯޓެއް ފިޔަވާ ހުރިހާ ބޯޓުތައް ވެސް ވަަރަށް ބޮޑަށް ބާވެ ހަލާކުވެފައިވާކަން މަސްކިރަން ފެލިވަރަށްދާ މަސްވެރިންނަށް އެނގޭނެ ކަމަށެވެ. އަދި އެއްބޯޓަށް މަސްކިރާފައި އެ ބޯޓު ފުރުމުން އެހެން ބޯޓަކަށް އެ މަސްތައް ބަދަލު ކުރާ ކަމަށާއި އެގޮތަށް އެއްބޯޓުން އަނެއް ބޯޓަށް މަސްތައް ބަދަލުކުރަމުންދާ ވަގުތުތަކުގައިވެސް މަސްކިރުމަށް ވަރަށް ބޮޑެތި ދަތިތަކާ ކުރިމަތިލާން ޖެހި އެކަމުގައިވެސް މަސްވެރިން އެތައް އިރަކު ބަނދަރުގައި ތާށިވެފައި ތިބެންޖެހޭ ކަމަށްވެސް ބުންޏެވެ.
އެސްޓީއޯގެ ދަށަށް މިފްކޯ ބަދަލުކުރި ފަހުން މިފްކޯއަކީ ފައިދާވާ ކުންފުންޏަކަށް ހެދިފައިވާ ކަމަށް މިފްކޯގެ އިސްވެރިންނާއެކު އެސްޓީއޯގެ މެނޭޖިން ޑިރެކްޓަރު މިމަހުގެ ހަތްވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވަނީ ވިދާޅުވެފަ އެވެ. ޝަހީރު އެ ދުވަހު ވިދާޅުވީ ކުރިއަށް އޮތް މަސްވެރިކަމުގެ މޫސުމަށް މިފްކޯ އިން މިހާރު ވެސް ތައްޔާރުވެފައިވާ ކަމަށެވެ. އެގޮތުން މަސްކިރޭނެ ލުއި ފަސޭހަ ގޮތްތަކެއް މަސްވެރިންނަށް ހަމަޖައްސައިދީ މަހުގެ އަގަށްވާ ފައިސާ ވަގުތުން ދިނުމަށް ތައްޔާރުވެފައިވާ ކަމަށާއި އަދި މަސްވެރިންނަށް ބޭނުންވާ އައިސް ވެސް ފަސޭހައިން ލިބޭނެ ގޮތެއް ހަމަޖައްސާފައިވާ ކަމަށްވެސް ވިދާޅުވި އެވެ.
ޝަހީރު މިހެން ވިދާޅުވި ނަމަވެސް ވީނިއުސް އިން މިއަދު ވާހަކަ ދައްކާލި ބައެއް މަސްވެރިން ބުނީ މަސްވެރިކަން ރަނގަޅު މިދުވަސްވަރު މިފްކޯގެ ބަނދަރުތަކާއި ބޯޓުތަކުގައި މަސްކިރާނެ ރަނގަޅު އިންތިޒާމުތަކެއް ހަމަޖެހިފައި ހުރި ކަމަށް ގަބޫލުނުކުރާ ކަމަށެވެެ. ފަސޭހައިން އައިސް ލިބޭނެ އިންތިޒާމެއް ހަމަޖައްސާފައިވާ ކަމަށް ޝަހީރު ވިދާޅުވި ނަަމަވެސް މަސްވެރިން ބުނީ ފެލިވަރު ބަނދަރުން އައިސް ލިބެނީ ހަމައެކަނި ބުރާސްފަތި ދުވަހު ކަމަށާއި އެ ދުވަހުވެސް އައިސް ލިބެނީ ދޯނިތައް އެތައް އިރަކު ކިޔޫގައި ޖެހިގެން ކަމަށެވެ. މަސް ކިރާފައި ވަގުތުން ލާރި ލިބޭނެ ކަމަށް އެސްޓީއޯގެ މެނޭޖިން ޑިރެކްޓަރު ވިދާޅުވި ނަމަވެސް ފެލިވަރު ބަނދަރުން އެގޮތަށް ހުރިހާ ދުވަހު އެ އިންތިޒާމު ހަމަޖެހިފައި ނުހުންނަ ކަމަށްވެސް ވީނިއުސްއަށް މައުލޫމާތު ދިން މަސްވެރިން ބުނެ އެވެ.
"ޝަހީރު ކޮންމެ ގޮތަކަށް ވިދާޅުވި ނަމަވެސް އަދިވެސް އެބަހުރި އަޅުގަނޑުމެން ލާރި ނުލިބި. ދުވަހުން ދުވަހަށް ލާރި ލިބޭނެ ކަމަށް އެބޭފުޅުން ވިދާޅުވި ނަމަވެސް އަދިވެސް އެގޮތަށް ލާރިއެއް ނުލިބޭ. އަޅުގަނޑުމެންގެ އެންމެ ބޮޑު ކަންބޮޑުވުމަކީ ރަތްދަކަ އަވީގައި މަސްކޮޅު ބާނައިގެން ފެލިވަރަށް ދިޔައީމާ މަަސް ނުކިރި އެތަނުގައި އެތައް އިރެއް އޮވެ މަސްކޮޅު ހަލާކުވެ މަހުގެ އަގު ނުލިބުން،" ވަރަށް ބޮޑަށް ހިތްހަމަނުޖެހިފައި ހުރެ މަސްވެރިޔާ ބުންޏެވެ.
މަސްވެރިން ބުނީ ފެލިވަރު ފަޅުގައި މިހާރުވެސް ބޮޑެތި ސައިޒުގެ 20 ވަރަކަށް ދޯނި މަސްނުކިރިފައި އޮތްއިރު އެ ދޯނިތަކުގައި ޖުމްލަ 85 ޓަނުގެ މަސް ނުކިރި އެބަހުރި ކަަމަށެވެ. މަސްވެރިކަން ރަނގަޅުވަމުން އަންނަ މިފަދަ ދުވަސްވަރެއްގައި މަސް ކިރާނެ ރަނގަޅު އިންތިޒާމުތަކެއް ހަމަނުޖެހި މަސް ދޯނިތައް "ހައްޔަރުކޮށްފައި" ފެލިވަރުގައި ބޭއްވުމަކީ އެކަމުގެ ސަބަބުން މަސްވެރިންނަށާއި ރާއްޖޭގެ އިގްތިސާދަށް ވަރަށް ބޮޑެތި ގެއްލުންވާ ދުވަސްތަކެއް ކަމަށްވެސް މަސްވެރިން ވަނީ ބުނެފަ އެވެ.