މާލޭގައި ހިންގާ "މައި ޓެކް" ފިހާރަ ފަލާލައި ގިނަ އަދަދެއްގެ ފައިސާއާއި ތަކެތި ވަގަށް ނަގައިފި އެވެ.
ފުލުހުން ވަނީ މިފަދަ ހާދިސާއެއް ދިމާވެގެން އުޅޭ ކަން ކަށަވަރު ކޮށްދީފަ އެވެ. އެހެންނަމަވެސް އިތުރު ތަފްސީލެއް ފުލުހުން ހާމަކޮށްފަ އެއް ނުވެ އެވެ.
ފުލުހުން ގެންދަނީ މި މައްސަލަ މިހާރު ތަހްގީގު ކުރަމުން ކަމަށްވެސް ފުލުހުން ވަނީ ބުނެފަ އެވެ.
ވީނިއުސްއަށް މައުލޫމާތު ދެމުން ފިހާރައިގެ އިސްވެރިއަކު ބުނީ ރޭ ގާތްގަނޑަށް 3:30 ހާއިރު އެ ފިހާރައިގެ މައި ދެ ދޮރުގެ ތަޅު ހަލާކުކޮށްލައިގެން ބަޔަކު ވައްކަން ކޮށްފައިވާ ކަމަށެވެ. އަދި އެ ފިހާރައިގެ ބިއްލޫރި ގަނޑުވެސް ވަރަށް ބޮޑަށް ތަޅާލާފައިވާ ކަމަށްވެސް އޭނާ ބުންޏެވެ.
އޭނާ ބުނީ 6000 އަށް ވުރެ ގިނަ ރުފިޔާ އާއި ގިނަ އަދަދެއްގެ މޯބައިލް ފޯނު ވެސް ވަގަށް ނަގާފައިވާ ކަމަށެވެ. ނަމަވެސް ވަގަށް ނެގީ ކިހާ އަދަދެއްގެ ފޯނު ކަމެއް އަދި ސާފްވާ ގޮތް ނުވާ ކަމަށްވެސް އޭނާ ބުންޏެވެ.
"އަޅުގަނޑުމެންނަކަށް އަދި ނޭނގޭ ވަގަށް ނެގީ ކިހާ އަދަދެއްގެ ފޯނު ކަމެއް. އަދި އެހެން އެއްޗިސްވެސް ގެންގޮސްފައި ހުރީ. ގާތްގަނޑަކަށް ލައްކަ އަކަށް ވުރެ ގިނަ ރުފިޔާގެ ސާމާނު ވަގަށް ގެންގޮސްފަ ވަނީ." އެ ފިހާރައިން ވާހަކަ ދެއްކި މީހާ ބުންޏެވެ.
އޭނާ އިތުރަށް ބުނީ މައި ޓެކް ފިހާރައަކީ ސީސީޓީވީ ކެމެރާ އާންމުކޮށް ހަރުކޮށްފައި ހުންނަ ތަނެއް ކަމަށާއި ކުޑަ މައްސަލައެއް ދިމާވެގެން ކެމެރާ ކަނޑާލާފައިވަނީ ރޭ އެކަނި ކަމަށެވެ. އަދި ބުނީ އެތަނުގައި ހަރުކޮށްފައި ހުރި ކެމެރާތައް ވެސް ވަގަށް ނަގާފައިވާ ކަމަށެވެ.
މާފަންނު އޭސް ހާޑްވެއާ ކައިރީގައި ހުރި ފިހާރައެއް ރޭ ފަޅާލާފައިވާއިރު މިދިޔަ ހަފްތާގެ ބުދަ ދުވަހުވެސް ވަނީ މާފަންނު އޭސް ހާޑްވެއާ ކައިރީގައި ހުންނަ އެތްލެޓިކާ ފިހާރަ ފަޅާލައި 42،000 ރުފިޔާ ވަނީ ވަގަށް ނަގާފަ އެވެ.