ރާއްޖެ މިނިވަންވިތާ އަންނަ އަހަރު 50 އަހަރު ފުރޭއިރު މިނިވަން ދުވަސް ކުލަގަދަކޮށް ފާހަގަކުރާނެ ކަމަށް ހޯމް މިނިސްޓަރު އުމަރު ނަސީރު މިރޭ ވިދާޅުވެއްޖެ އެވެ. މިނިވަން ކަމަށް 50 އަހަރު ފުރޭ މުނާސަބަތާ ގުޅިގެން ކުރިއަށް ގެންދާނެ ކަންތައްތަކާ ބެހޭ ގޮތުން ދަރުބާރުގޭގައި ބޭއްވި ފޯރަމް ޝަރަފްވެރިކޮށް ދެއްވައި ވާހަކަ ދައްކަވަމުން އުމަރު ވިދާޅުވީ މިނިވަން ކަމަށް 25 އަހަރު ފުރުނު މުނާސަބަތު ވެސް ފާހަގަކޮށްފައިވަނީ ކުލަ ގަދަކޮށް ކަމަށެވެ. އެހެންވެ މިނިވަން ކަމަށް 50 އަހަރު ފުރޭ މުނާސަބަތު ފާހަގަކުރާނީ އެއަށް ވުރެ ކުލަ ގަދަކޮށް ކަމަށް ވިދާޅުވި އެވެ. "އަޅުގަނޑުމެންގެ އުއްމީދަކީ އަންނަ އަހަރު މިނިވަން ކަމަށް 50 އަހަރު ފުރޭއިރު ހިންގޭ އެކިއެކި ހަރަކާތްތަކަކީ ރާއްޖޭގައި މީގެ ކުރިން ދުވަހަކު ވެސް ނުހިންގޭ ވަރުގެ ފުރިހަމަ، ކުލަގަދަ އަދި އަލިގަދަ ހަރަކާތްތަކަކަށް ހެދުން. ހަނދުމަފުޅު ހުންނާނެ މިނިވަން 25 ގެ ހަރަކާތްތައް ވެސް ވަރަށް ކުލަ ގަދަކޮށް ގެންދިޔަ،" އުމަރު ވިދާޅުވި އެވެ. މިނިސްޓަރު ވިދާޅުވީ އެ މުނާސަބަތާ ގުޅިގެން އަމިއްލަ ފަރާތްތަކުން ހުށަހަޅާ އައިޓަމްތަކުގެ ތެރެއިން އެންމެ ރަނގަޅު ހަތް އައިޓަމެއް ނެގުމަށް ފަހު، އެ އައިޓަމްތައް ހުށަހެޅުމަށް ސަރުކާރުން ފަންޑު ދޭނެ ކަމަށެވެ. ނަމަވެސް ސަރުކާރުގެ މުއައްސަސާތަކުން ހުށަހަޅާ އައިޓަމްތައް އޭގެ ތެރޭގައި ނުހިމެނޭނެ ކަމަށާއި އެ އައިޓަމްތައް ކުރީ ބައިގައި ވެސް އޮންނާނީ ކޮލިފައި ވެފައި ކަމަށް އުމަރު ވިދާޅުވި އެވެ. މިރޭގެ އެ ފޯރަމްގައި ކުރިއަށް ގެންދިޔައީ އަމިއްލަ ފަރާތްތަކުންނާއި އެކިއެކި މުއައްސަސާތަކުން އެ މުނާސަބަތާ ގުޅިގެން ކުރިއަށް ގެންދިއުމަށް ހުށަހަޅާ ކަންކަމާބެހޭ ޕްރެޒެންޓޭޝަންތައް ހުށަހެޅުމެވެ.