ޠާލިބާނުންނާއި އެމެރިކާއިން ގައިދީން ބަދަލުކުރުމަށް އެއްބަސްވެއްޖެއެވެ.
އަފްޣާނިސްތާނުގެ ޠާލިބާން ސަރުކާރުން މިއަދު ހާމަކުރި ގޮތުގައި، ގަތަރު މެދުވެރިއެއްގެ ދައުރު އަދާކޮށްގެން އެމެރިކާ އާއި އަފްޣާނިސްތާނާ ދެމެދު ގައިދީން ބަދަލުކުރުމުގެ އެއްބަސްވުމަކަށް ވަނީ އާދެވިފައެވެ.
އަފްޣާނިސްތާނުގެ ފޮރިން މިނިސްޓްރީގެ ބަޔާނެއްގައި ބުނެފައިވާ ގޮތުގައި، ކެލިފޯނިއާގައި އުމުރު ދުވަހުގެ ޖަލު ޙުކުމެއް ތަންފީޒުކުރަމުންދިޔަ ޚާން މުޙައްމަދު ވަނީ މިއެއްބަސްވުމުގެ ދަށުން މިނިވަންވެފައެވެ. މީނާ އަކީ ގާތްގަނޑަކަށް 20 އަހަރު ކުރިން ނަންގަރުހާރު އިން ހައްޔަރުކުރެވުނު އަފްޣާން ހަނގުރާމަވެރިއެކެވެ.
އެއްބަސްވުމުގެ ދަށުން ބަދަލުގައި ދޫކޮށްލެވުނު އެމެރިކާގެ ދެ ގައިދީންގެ މައުލޫމާތު ހާމަކުރަން އަފްޣާނިސްތާނުގެ ފޮރިން މިނިސްޓްރީން ވަނީ ދެކޮޅުހަދައިފައެވެ.
ޓްރަމްޕްގެ އިންތިޚާބު ކާމިޔާބަށްފަހު، އެމެރިކާއާއެކު އައު ބާބެއް ފެށުމަށް އުންމީދުކުރާކަމަށް ޠާލިބާނުން ބުނެފައިވާއިރު، ގައިދީން މިމައްސަލަ ޙައްލުކުރެވުނީ މަޝްވަރާގެ ތެރެއިންކަން ފާހަގަކޮށް، އެކަމުގައި ގަތަރުން އަދާކުރި ރޯލަށް ޝުކުރު އަދާކޮށްފައިވެއެވެ.
ޓްރަމްޕްގެ ފުރަތަމަ ދައުރުގައި ނިންމި ނިންމުމާއިއެކު 2021 ގައި އެމެރިކާގެ ސިފައިން އަފްޣާނިސްތާނުން ގެންދިޔައެވެ. އެއާއިއެކު ޠާލިބާނުން ވަނީ ޠާލިބާނުންގެ ވެރިކަން ވައްޓާލާ އެގައުމުގެ ވެރިކަމާ ހަވާލުވެފައެވެ.
ޠާލިބާނުން ވަނީ 1996 އިން 2001 އަށް އަފްޣާނިސްތާނުގެ ވެރިކަން ކޮށްފައެވެ.. އެމެރިކާ އިސްނަގައިގެން 2001 ގައި ހިންގި ހަނގުރާމައަކާ ގުޅިގެން ޠާލިބާނުން ވެރިކަމުން ދުރުކުރެވުނު ނަމަވެސް، އެމެރިކާގެ ސިފައިން 2021 ގައި އަފްޣާނިސްތާނުން ގެންދިއުމާއެކު، އަލުން ވެރިކަމާ ހަވާލުވިއެވެ. ގައުމުގެ ރަސްމީ ނަމަކަށް ޠާލިބާނުން ބޭނުންކުރަނީ "އިސްލާމިކް އެމިރޭޓްސް އޮފް އަފްޣާނިސްތާން" އެވެ.