ޖުލައި މަސް ނިމުމުގެ ކުރިން ރ. އަތޮޅާއި ބ. އަތޮޅުގައި އާރުޓީއެލް ފެރީގެ ހިދުމަތް ފެށޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވީ ރ. އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގައި އެ އަތޮޅުގެ އުނގޫފާރު ރައްޔިތުންނާއި ބައްދަލު ކުރައްވައި ވާހަކަފުޅު ދައްކަވަމުންނެވެ. ރައީސް ވިދާޅުވީ އާރުޓީއެލް ފެރީގެ ޚިދުމަތް ދެން އެންމެ އަވަހަށް ފަށާނީ ރ. އަތޮޅުގައިކަމަށާއި އެއަށް ފަހު ބ. އަތޮޅުގައިވެސް އާރްޓީއެލް ފެރީގެ ޚިދުމަތް މިއަހަރުގެ މެދެއްހާތަނުގައި ފަށްޓަވާނެކަމަށެވެ.
އެގޮތުން ޖޫން މަސް ނިމުމުގެ ކުރިން ރ. އަތޮޅުގައި އާރުޓީއެލް ފެރީގެ ހިދުމަތް ފަށާނެކަމަށާއި ޖުލައި މަސް ނިމުމުގެ ކުރިން ބ. އަތޮޅުގައި ފަށާނެކަމަށް ވިދާޅުވިއެވެ.
މީގެ އިތުރުން ރައީސް ވިދާޅުވީ މިއަހަރު ނިމިގެންދާއިރު ހިދުމަތް ނުފަށައި ހުރި ރަށްތަކުގައި ހިދުމަތް ފަށާނެކަމަށެވެ.
އާރުޓީއެލްގެ ހިދުމަތް ރ. ބ. އަދި ނ. އަތޮޅުގައި ދިނުމަށް އެމްޓީސީސީއާ ހަވާލުކޮށްފައިވަނީ މިިދިޔަ އަހަރުގެ އޭޕްރީލް މަހުގެ 15 ވަނަ ދުވަހުގައެވެ. ނ. އަތޮޅުގައި އާރްޓީއެލް ފެރީގެ ހިދުމަތް މިދިޔަ ޖުލައި މަހު ވަނީ ފަށާފައިވެއެވެ.
އާރުޓީއެލް ފެރީގެ ހިދުމަތް ވަނީ ރާއްޖޭގެ 9 އަތޮޅެއްގެ 81 ރަށަކާއި ގުޅާލާފައެވެ.