ހުރަސްކޮށް ހިންގާ ކުށްތަކާއި ސަލާމަތީ ނުރައްކާތަކާ ދެކޮޅަށް ފަށާފައިވާ ފުޅާ ހަރަކާތްތަކުގެ ދަށުން، ޕާކިސްތާނާ ގުޅޭ އިންޑިއާގެ ބޯޑަރުގެ 15 ކިލޯމީޓަރުގެ ސަރަހައްދެއްގެ ތެރޭގައި ހުރި، ގާނޫނާ ހިލާފު ކަމަށް ބެލެވޭ އިމާރާތްތައް ތަޅާލުމަށް އިންޑިއާއިން އަމުރުކޮށްފި އެވެ.
އިންޑިއާގެ ހޯމް މިނިސްޓަރު އަމިތު ޝާހް މި އެންގުން އިއުލާނު ކުރެއްވީ ޕާކިސްތާނާ ބޯޑަރު ހިއްސާކުރާ ރާޖަސްތާނަށް އިއްޔެ ކުރެއްވި ޒިޔާރަތެއްގަ އެވެ.
އިންޑިއާގެ މިނިސްޓްރީ އޮފް ހޯމް އެފެއާޒްއިން ނެރުނު ބަޔާނެއްގައިވާ ގޮތުން، ބައިނަލްއަގުވާމީ ބޯޑަރު ކައިރީގައި ހިންގާ ގާނޫނާ ހިލާފު އިމާރާތްކުރުންތަކާ ދެކޮޅަށް އެއްވެސް ދޫދިނުމެއް ނެތް ސިޔާސަތެއް ހަރުކަށިކަމާ އެކު ތަންފީޒުކުރަންޖެހޭ ކަމަށް ޝާހް ބާރުއެޅުއްވި އެވެ. އަދި ހުއްދަ ނެތް އެފަދަ ހުރިހާ އިމާރާތެއް ތަޅާލުމަށް އޭނާ ކަމާބެހޭ ފަރާތްތަކަށް އިރުޝާދު ދެއްވި އެވެ.
މީގެ އިތުރުން، ބޯޑަރު ހުރަސްކޮށް އެތެރެވުމާއި މަސްތުވާތަކެތި ގެންގުޅޭ ތަންތަން ފާސްކުރުމާއި ގަވާއިދާ ހިލާފަށް ބިންތަކަށް ވެރިވެގަތުމާއި ޓެރަރިޒަމަށް ފައިނޭންސްކުރުމާ އަދި ބޯޑަރު ހުރަސްކޮށް ހިންގާ އެހެނިހެން ކުށްތަކަށް ހައްލެއް ހޯދުމަށް ވަރުގަދަ ފިޔަވަޅުތަކެއް އެޅުމަށް ވެސް ޝާހް ގޮވާލެއްވި އެވެ.
މި ފިޔަވަޅު އަޅާފައިވަނީ، އިންޑިއާއިން ކޮންޓްރޯލްކުރާ ކަޝްމީރުގައި ދިން ހަމަލާއަކާ ގުޅިގެން މިދިޔަ އަހަރު އުފެދުނު ދެބަސްވުންތަކަށް ފަހު، އަވަށްޓެރި ދެ ގައުމުގެ ދެމެދުގައި ނުތަނަވަސްކަން ބޮޑުވެފައިވާ ދަނޑިވަޅެއްގަ އެވެ. އެ ހަމަލާގައި 26 މީހުން މަރުވިއިރު، އޭގެ ތެރޭގައި ގިނައީ ހިންދޫ ފަތުރުވެރިންނެވެ. އިންޑިއާއިން ތުހުމަތުކުރާ ގޮތުގައި އެ ހަމަލާއަށް އެހީތެރިވެދިނީ ޕާކިސްތާނުންނެވެ.
ނަމަވެސް އިސްލާމްއާބާދުން މި ތުހުމަތު ދޮގުކުރެ އެވެ. މި ކުރިމަތިލުންތައް ހަތަރު ދުވަހުގެ ހަނގުރާމައަކަށް ބަދަލުވެ، ވައިގެ ހަމަލާތަކާއި ޑްރޯން އަދި ބަޑީގެ ހަމަލާތައް ބަދަލުކޮށް، 70އަށް ވުރެ ގިނަ މީހުން މަރުވި އެވެ.
އިންޑިއާ އާއި ޕާކިސްތާނާ ދެމެދު އޮންނަ 3,300 ކިލޯމީޓަރުގެ ބޯޑަރު ސަރަހައްދާއި ދެބަސްވުން އުފެދިފައިވާ ކަޝްމީރު ސަރަހައްދުގައި، އެއް ގައުމުން އަނެއް ގައުމަށް ޕްރޮކްސީ ގުރޫޕުތަކަށާއި ބޯޑަރު ހުރަސްކޮށް ހިންގާ ހަރަކާތްތަކަށް އެހީތެރިވާކަމުގެ ތުހުމަތު އަބަދު ވެސް ކުރަމުންދެ އެވެ.