މެޓާ ކުންފުނިން ނެރެފައިވާ ރޭ-ބޭން ޑިސްޕލޭ އައިނަށް އަމިއްލަ އެޕްތަކުގެ އިތުރުން، އެހެން ފަރާތްތަކުން ތައްޔާރުކުރާ ތިންވަނަ ފަރާތުގެ އެޕްލިކޭޝަންތަކާއި ގޭމްތައް ބޭނުންކުރެވޭ ގޮތް ހެދުމަށް އެ ކުންފުނިން ނިންމައިފިއެވެ. މި ނިންމުމާ އެކު، އައިނުގެ ޑިސްޕްލޭ އަދި "ނިއުރަލް ބޭންޑް" ކޮންޓްރޯލާ ބޭނުންކޮށްގެން އާ ތަޖުރިބާތައް ފަރުމާކުރުމުގެ ފުރުސަތު މިހާރު ވަނީ ޑިވެލޮޕަރުންނަށް ހުޅުވާލާފައެވެ. މެޓާއިން ހާމަކުރި ގޮތުގައި، މޯބައިލް އެޕްތަކާއި ވެބް އެޕްތައް ވެސް މި އައިނާ ގުޅުވައިލެވޭނެއެވެ. މި އައިނުގެ ޑިސްޕްލޭ އަކީ މޫނުމަތީގައި މުޅިން ފެތުރިގެންދާ ވަރުގެ ބޮޑު ޑިސްޕްލޭއަކަށް ނުވިޔަސް، މިއީ މަސައްކަތެއް ކުރަމުންދާއިރު ބަލައިލަން ފަސޭހަ މަޢުލޫމާތުތައް ފެންނަން ހުންނަ "އިންފޮމޭޝަން އޯވަލޭ" ތަކަށް ވަރަށް އެކަށީގެންވާ އެއްޗެކެވެ. މީގެ ތެރޭގައި ފިލްމު ޑިވެލޮޕްކުރަން ދަސްކޮށްދޭ އެޕްތަކާއި، ކުޅިވަރުގެ ސްކޯތައް ވަގުތުން ފެންނަން ހުންނަ އެޕްތައް ހިމެނެއެވެ. އެޕްތަކުގެ އިތުރުން ޗެސް، ސްނޭކް އަދި ބްރިކް ބްރޭކާ ފަދަ ކުދި ގޭމްތައް ވެސް މި އައިނުގެ ޑިސްޕްލޭއަށް ތައާރަފްކުރުމަށް މެޓާއިން އަންނަނީ މަސައްކަތް ކުރަމުންނެވެ. މިއީ މިދިޔަ އަހަރު ނެރުނު 800 ޑޮލަރުގެ މި އައިނުގެ ބޭނުންތެރިކަން އިތުރުކުރުމަށް އެޅުނު މުހިންމު ފިޔަވަޅެކެވެ. https://x.com/boztank/status/2054999764257968306 މި އައު އެޕްތައް އާންމުންނަށް ލިބޭނެ ސީދާ ތާރީޚެއް އަދި ހާމަކޮށްފައި ނުވި ނަމަވެސް، މެޓާއިން ވަނީ މިހާރުވެސް ބައެއް އައު ފީޗާތައް އައިނު ބޭނުންކުރާ ފަރާތްތަކަށް ދޫކޮށްލާފައެވެ. އޭގެ ތެރޭގައި އިނގިލިން އަކުރުތައް ކުރަހައިގެން މެސެޖު ފޮނުވޭ "ނިއުރަލް ހޭންޑްރައިޓިން" އާއި، އައިނުގެ ޑިސްޕްލޭ ރެކޯޑްކުރެވޭ ފީޗާ ހިމެނެއެވެ. މީގެ އިތުރުން، މެސެންޖާ، ވަޓްސްއެޕް އަދި އިންސްޓަގްރާމް މެދުވެރިކޮށް ކުރާ ކޯލްތަކުގައި ވާހަކަދައްކާ އަޑު ލިޔުމުން ފެންނަ ގޮތަށް "ލައިވް ކެޕްޝަނިން" ވެސް މިހާރު ވަނީ ތައާރަފްކޮށްފައެވެ. ކުރިއަށް އޮތް މެޓާ ކަނެކްޓް އިވެންޓުގައި މި އައިނާ ގުޅޭ އިތުރު އަދާހަމަތަކާއި އައު އުފެއްދުންތައް ފެނިގެންދާނެ ކަމަށް ބެލެވެއެވެ.