މެޓާ ކުންފުނިން އެންމެ ފަހުން ނެރުނު މެޓާ ރޭ-ބޭން ޑިސްޕްލޭ އައިނަށް ބޮޑެތި ބަދަލުތަކެއް ގެނެސްދޭ އާ ސޮފްޓްވެއާ އަޕްޑޭޓެއް ތަޢާރަފުކޮށްފިއެވެ. މި އަޕްޑޭޓާއެކު، އައިނު ބާޒާރަށް ނެރުނުއިރު ދައްކާލި ގިނަ ފީޗާތަކެއް މިހާރު ވަނީ އާންމު ބޭނުންކުރާ ފަރާތްތަކަށް ދޫކޮށްލާފައެވެ. އޭގެ ތެރޭގައި މެސެޖުކުރުމާއި، އެކްސެސިބިލިޓީ ވަސީލަތްތަކާއި، ވީޑިއޯ ރެކޯޑިންގެ އިތުރުން ނެވިގޭޝަންގެ ޚިދުމަތްތައް ހިމެނެއެވެ. މީގެ އިތުރުން، ތިންވަނަ ފަރާތްތަކުގެ (ތާޑްޕާޓީ) ޑިވެލޮޕަރުންނަށް މި އައިނަށް ޚާއްޞަ ވެބް އެޕްތަކާއި މޮބައިލް އެޕްތައް ފަރުމާކުރުމުގެ ފުރުޞަތު ދިނުމަށްޓަކައި ޑިވެލޮޕާ ޕްރިވިއު އެކްސެސް ވެސް މިހާރު ވަނީ ހުޅުވާލާފައެވެ. މި އަޕްޑޭޓްގެ ދަށުން އެންމެ ފާހަގަކޮށްލެވޭ އެއް ފީޗާއަކީ "ނިއުރަލް ހޭންޑްރައިޓިންގް" ހުރިހާ ޔޫޒަރުންނަށް ލިބޭގޮތް ހެދުމެވެ. އޭއައި ފީޗާތައް މަސައްކަތް ކުރާނީ ނިއުރަލް ބޭންޑާ ގުޅުވާލައިގެން --- މެޓާގެ ނިއުރަލް ބޭންޑާ ގުޅުވައިގެން މަސައްކަތްކުރާ މި ފީޗާގެ އެހީގައި، އިނގިލީގެ ޙަރަކާތްތަކުން މެސެޖުތައް ލިޔެލެވޭނެއެވެ. މިގޮތުން އިންސްޓަގްރާމް، ވަޓްސްއަޕް، މެސެންޖާ އަދި އެންޑްރޮއިޑާއި އައި.އޯ.އެސް ގެ ޑިފޯލްޓް މެސެޖު އެޕްތަކުގައިވެސް މިގޮތަށް މެސެޖު ކޮމްޕޯޒް ކުރެވޭނެއެވެ. މީގެ އިތުރުން، އައިނުގެ ޑިސްޕްލޭއިން ފެންނަ މަންޒަރުތަކާއި، ކެމެރާ ފީޑް އަދި އަޑު އެއްކޮށްލައިގެން އެއް ވީޑިއޯއެއްގެ ގޮތުގައި ރެކޯޑްކުރެވޭ "ޑިސްޕްލޭ ރެކޯޑިން" ފީޗާއެއްވެސް ވަނީ ތަޢާރަފުކޮށްފައެވެ. މީގެ އިތުރުން ވެސް އެމެރިކާގެ ހުރިހާ ހިސާބެއްގެ އިތުރުން ލަންޑަން، ޕެރިސް އަދި ރޯމް ފަދަ ބޮޑެތި ސިޓީތަކަށް ޓާން-ބައި-ޓާން ނެވިގޭޝަންގެ ޚިދުމަތް މިހާރު މި އައިނު މެދުވެރިކޮށް ލިބޭނެ ކަމަށް މެޓާއިން ބުނެއެވެ. އެކްސެސިބިލިޓީގެ ދާއިރާއިން ބަލާއިރު، ވަޓްސްއަޕް، ފޭސްބުކް މެސެންޖާ އަދި އިންސްޓަގްރާމް ޑައިރެކްޓް މެސެޖުތަކަށް "ލައިވް ކެޕްޝަންސް" ގެ ޚިދުމަތް ވަނީ ފުޅާކޮށްފައެވެ. މި ފީޗާގެ އެހީގައި ކުރިމަތިލައިގެން ތިބެ ދައްކާ ވާހަކަތަކާއި ފޯނު ކޯލްތަކުގެ އަޑު ވަގުތުން ލިޔުމަށް ބަދަލުކޮށްދޭނެއެވެ. އަދި މި އެޕްތަކުގެ ތެރެއިން ކުރާ ވޮއިސް އިންޓަރެކްޝަންތަކަށްވެސް މިއިން ސަޕޯޓްކުރާނެއެވެ. މިދިޔަ 2025 ވަނަ އަހަރުގެ ސެޕްޓެމްބަރު މަހު މި ސްމާޓް އައިނު ބާޒާރަށް ނެރުނު ފަހުން މިހާތަނަށް ހަތަރު ސޮފްޓްވެއާ އަޕްޑޭޓެއް ވަނީ ދީފައެވެ. މީގެ ކުރީގެ އަޕްޑޭޓްތަކުން ރިމައިންޑާ، މޫސުން، ސްޓޮކް އަދި ކަލަންޑަރު ވިޖެޓްތަކުގެ އިތުރުން ސްޕޮޓިފައި ޕްލޭލިސްޓްތަކާއި އިންސްޓަގްރާމް ރީލްސްއަށް ފަސޭހައިން ވަދެވޭނެ ގޮތްތައް ހަމަޖެހުނެވެ. މި ވަސީލަތްތަކަކީ ގޭމްތަކާއި، ދަތުރުފަތުރުގެ އެހީތެރިކަމާއި، ކެއްކުމުގެ ގައިޑްތަކާއި، ރެސިޕީތަކާއި، ވިޔަފާރި ލިސްޓުތަކުގެ އިތުރުން މިއުޒިކް ފަރިތަކުރުން ފަދަ ކަންކަމަށް މަގުފަހިކޮށްދޭ ވަސީލަތްތަކެކެވެ. މިހާރު ހުޅުވާލެވިފައިވާ ޑިވެލޮޕާ ޕްރިވިއު ޕްރޮގްރާމްގެ ދަށުން، ޑިވެލޮޕަރުންނަށް އެޗް.ޓީ.އެމް.އެލް، ސީ.އެސް.އެސް އަދި ޖާވާސްކްރިޕްޓް ބޭނުންކޮށްގެން އަމިއްލަ ވެބް އެޕްތައް ހަދައި ޔޫ.އާރް.އެލް އެއް މެދުވެރިކޮށް އައިނަށް ފޮނުވޭނެއެވެ. އަދި "ވެއަރަބަލްސް ޑިވައިސް އެކްސެސް ޓޫލްކިޓް" ބޭނުންކޮށްގެން މިހާރު ހުރި މޮބައިލް އެޕްތައް އައިނާ ގުޅުވާލައި، ޓެކްސްޓް، ފޮޓޯ، ލިސްޓް، ބަޓަން އަދި ވީޑިއޯ ޕްލޭބެކް ފަދަ އިންޓަފޭސް ބައިތައް އިތުރުކުރުމުގެ ފުރުޞަތު ލިބެއެވެ. މެޓާއިން އިތުރަށް ހާމަކުރި ގޮތުގައި، ކޮންމެހެން ބޭނުންކުރަންޖެހޭ ޑިވައިސްތަކަށް ޚާއްޞަކޮށްގެން އުފައްދާފައިވާ އާ އޭއައި މޮޑެލް "މިއުޒް ސްޕާކް" ކުރިއަށް އޮތް ހޫނު މޫސުމުގެ ފަހުކޮޅު މެޓާ ރޭ-ބޭން އައިނަށް ތަޢާރަފުކުރެވޭނެއެވެ. މިއާއެކު އަހަރުގެ ފަހުކޮޅު އިތުރު ސޮފްޓްވެއާ ރަނގަޅުކުރުންތަކާއި އާ އޭއައި ފީޗާތަކެއް ވެސް ތަޢާރަފުކުރުމަށް ވަނީ ރޭވިފައެވެ.