ގައުމު އާ މިސްރަބާކަށް ބަދަލުކުރަން ވަރަށް ގިނަ ރައްޔިތުން ތިބީ އޭނާއާއެކު "ހުދު ވަލުގައި" ހިފަހައްޓައިގެން ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
އިލެކްޝަންސް ކޮމިޝަން (އީސީ) އިން ވަނީ ރިޔާސީ އިންތިހާބަށް ކުރިމަތިލާން ފޯމު ހުށަހަޅަންވާނީ މަދުވެގެން 1،500 މީހުންގެ ސޮޔާއެކު ކަމަށް ކަނޑައަޅައިފައެވެ. އަދި ފޯމު ހުށަހަޅާ އިރު، 100،000 ރުފިޔާގެ ފީއެއް ވެސް އީސީއަށް ދައްކަން ޖެހޭނެ ކަމަށް ބުނެފައެވެ.
އުމަރު މިއަދު ކުރެއްވި ފޭސްބުކް ލައިވްއެއްގައި ވިދާޅުވީ އީސީން ކަނޑައަޅައިފައިވާ އަދަދަށްވުރެ ގިނަ މީހުންގެ ސޮއި އޭނާއަށް ލިބިވަޑައިގެންފައިވާ ކަމަށެވެ. އަދި ބައެއް ގޭގެ މީހުން މިހާރުވެސް އޭނާގެ ކެންޑިޑަސީ ފޯމުގައި ސޮއިކުރަން ބޭނުންވާތީ ގުޅަމުންދާ ކަމަށެވެ.
"އިރާދަކުރެއްވިޔާ މި ކެމްޕޭން އަޅުގަނޑުމެން ކާމިޔާބުކުރާނަން. މިއީ އާންމުންގެ ކެމްޕޭނެއް. މިހާ ހިސާބަށް އަޅުގަނޑަށް ފާހަގަކުރެވުނީ މީ ކެމްޕޭނަކަށްވުރެ ބޮޑަށް ހަރަކާތެކޭ އިނގޭތޯ. މިއީ މޫވްމެންޓަކަށް ބަދަލުވެއްޖެ، ވަރަށް ގިނަ އަދަދެއްގެ އާންމުން މީގަ ބައިވެރިވެ، މި ހުދު ވަލުގައި ވަރަށް ގިނަ އަދަދެއްގެ ބަޔަކު ހިފައިފި މިހާރު،" އުމަރު ވިދާޅުވިއެވެ.
އުމަރު ވިދާޅުވީ އޭނާ ކުރިއަށްގެންދާ ކެމްޕޭނަކީ ރައީސުލްޖުމްހޫރިއްޔާ ބަދަލުކުރަން ކުރާ ކެމްޕޭނެއް ނޫން ކަމަށާއި އެ ކެމްޕޭނަކީ މި ގައުމު އާ މިސްރާބަކަށް ބަދަލުކުރުމަށް ކުރިއަށްގެންދާ ކެމްޕޭނަށް ކަމަށެވެ. އަދި އޭނާއަށް ތާއީދުކުރާ ބައެއް ފަރާތްތަކަށް ކެމްޕޭނުގައި މަސައްކަތް ނުކުރެވޭނީ ވަޒީފާގެ ބިރު އޮތުމުން ކަމަށް އުމަރު ވިދާޅުވިއެވެ.
އުމަރު އޭނާގެ ރިޔާސީ ކެމްޕޭން ލޯންޗުކުރެއްވީ މިއަހަރުގެ ފެބްރުއަރީ މަހުގެ ހަތަރުވަނަ ދުވަހުގެ ރޭ ސަލްޓަން ޕާކުގައި ބޭއްވި ޖަލްސާއެއްގައެވެ. އެ ޖަލްސާގައި ވާހަކަދައްކަވަމުން އުމަރު ވިދާޅުވެފައިވަނީ ރައްޔިތުން ވަނީ އެންމެ ބޮޑު ދެ ޕާޓީއަށް ފުރުސަތު ދީފައި ކަމަށާއި ނަމަވެސް ރައްޔިތުންނަށް އެކަމުން ފައިދާއެއް ނުވެ، އެ ޕާޓީތައް ފެއިލްވެފައިވާ ކަމަށެވެ. އަދި ވިދާޅުވީ އޭނާ ރިޔާސީ އިންތިހާބުގައި ވާދަކުރައްވަން ނިންމެވީ ރައްޔިތުން އާ މިސްރާބަކަށް ގެންދިއުމަށްޓަކައި ކަމަށެވެ.
އުމަރު ވިދާޅުވީ އެ މިސްރާބަކީ 2045 ވަނަ އަހަރު އަންނަ އިރު، ރާއްޖެއަކީ ތަރައްގީވެފައިވާ ގައުމަކަށް ބަދަލުކުރުން ކަމަށެވެ. ވެރިކަމުގައި އޭނާގެ ޒިންމާއަކީ އިޖުތިމާއީ އަދި އިގުތިސޯދީ މައްސަލަތައް ހައްލުކޮށްދެއްވައި އިގުތިސޯދު ޑައިވާސިފައިކުރައްވައި، ދިގު މުއްދަތުގެ ތަރައްގީގެ މަޝްރޫއުތައް ފެށޭނެ އިންތިޒާމު ހަމަޖައްސައިދެއްވުން ކަމަށެވެ.
ސިންގަޕޫރާއި ރާއްޖެއަށް މިނިވަންކަން ލިބުނީ ދާދި އެއް ދުވަސްވަރެއްގައި ކަމަށާއި އެއިރު ރާއްޖެ އޮތީ އިގުތިސޯދީ ގޮތުން މާކުރީގައި ކަމަށެވެ. ނަމަވެސް މިހާރު ރާއްޖެ މިވަނީ ފަހަތަށް ސޮއްސާލާފައި ކަމަށްވެސް އުމަރު ވިދާޅުވިއެވެ.
"އަޅުގަނޑުމެންނަށް އަރައިގެން ނުދެވުނީ ކީއްވެގެންތޯ ކުޑަކޮށް ބައްލަވާ. ފުރަތަމަ ކަމަކީ ސިންގަޕޫރުގައި ގާނޫނު ތަންފީޒު ކުރާނެ. ގާނޫނުތަކާ ދޭތެރޭގައި ކުޅޭކުޅޭއެއް ނޯންނާނެ. ދެވަނަ ކަމަކީ ކޮރަޕްޝަން ފުނޑުފުނޑު ކޮށްލާނެ ދައުލަތުގެ ވެރިންނަށް ކޮރަޕްޓެއް ނުވެވޭނެ. ތިންވަނަ ކަމަކީ ދައުލަތުން ހަރަދުކުރާނެ އިންސާނީ ވަސީލަތްތައް ތަރައްގީކުރަން ހަރަދުކުރަމުން ގެންދާނެ،" އުމަރު ވިދާޅުވިއެވެ.
ރާއްޖެއިން ހަރަދުތައް ކުރަމުން ގެންދިޔައީ ސިޔާސީ ގޮތުން ވޯޓު ހޯދަން ކަމަށާއި ރަށްރަށުގެ ބިން ހިއްކާ އިރު، އެ ބިމުގައި 20 އަހަރުވާ އިރުވެސް މަސައްކަތެއް ނުފެށޭ ކަމަށް އުމަރު ވިދާޅުވިއެވެ.