އިންޑިއާގައި މިހާރު ކުރިއަށްދާ ސާފް 19 އަހަރުން ދަށުގެ ފުޓްބޯޅަ މުބާރާތުގެ ގުރޫޕް އޭގެ ފަހު މެޗުގައި މިއަދު ހަވީރު ދިވެހިރާއްޖެ އާއި ބޫޓާނާ ވާދަކުރި މެޗު 2-2 އިން އެެއްވަރުކޮށް، 2019 ވަނަ އަހަރުގެ ފަހުން ސާފްގެ އުމުރުފުރާ މުބާރާތެއްގެ ސެމީފައިނަލުން ފުރަތަމަ ފަހަރަށް ދިވެހި ޓީމު ޖާގަހޯދައިފިއެވެ.
މުބާރާތުގެ ގުރޫޕް ސްޓޭޖުގައި ދިވެހި ޓީމު ކުޅުނު ފުރަތަމަ މެޗުގައި ބަންގްލަދޭޝާއި ވާދަކޮށް 2-2 ގެ ނަތީޖާއަކުން ދެޓީމު އެއްވަރުވެފައިވާއިރު، ބޫޓާން ގުރޫޕް ސްޓޭޖުގައި ކުޅުނު ފުރަތަމަ މެޗުގައި ބަންގްލަދޭޝް އަތުން 3-0 ގެ ނަތީޖާއަކުން އެޓީމު ވަނީ ބަލިވެފައެވެ.
އިންޑިޔާގެ އަރުނާޗަލް ޕްރަދޭޝްގެ ގޯލްޑަން ޖޫބިލީ ސްޓޭޑިއަމްގައި ކުޅުނު މިމެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ބޫޓާން އިންނެވެ. މިލަނޑު ފުރަތަމަ ހާފުގެ 45 ވަނަ މިނެޓުގައި ކާމިޔާބުކޮށްދިނީ އެޓީމުގެ ފޯވާޑް ލަމް ޓެންޒިން އެވެ .
Advertisement
މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުން ކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ބޫޓާން ކުރީގައި އޮވެގެންނެވެ.
މެޗުގެ ދެވަނަ ހާފުގައި ބޫޓާނުން އެޓީމުގެ އެޓޭކުތައް އިތުރަށް ވަރުގަދަކުރިއިރު މިހާފުގައި ރާއްޖެ ޓީމުގެ ކީޕަރު ޒަހުރާން ހަސަން ޒިޔާދު ފަރާތުން ވަނީ ތަފާތު މޮޅު ކުޅުމެއް ފެނިގެންގޮސްފައެވެ. އަދި ރާއްޖެ ޓީމުން މެޗުގެ ނަތީޖާ އެއްވަރުކުރި ލަނޑު ފަހުހާފުގެ 76 ވަނަ މިނެޓުގައި ކާމިޔާބުކޮށްދިނީ އައިދު މުހައްމަދު ޖަވީޒު އެވެ.
މިއީ ދެވަނަ ހާފުގެ 75 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެންނިކުތް އަޝްހަމް އިބްރާހިމް މުހައްމަދު ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.
މީގެ އިތުރުން މެޗުގެ އިތުރު ވަގުތުގެ ގޮތުގައި ދެއްކި ހަ މިނެޓުގެ ތެރެއިން ތިންވަނަ މިނެޓުގައި ރާއްޖެ ޓީމު ވަނީ އިތުރު ލަނޑެއް ކާމިޔާބުކޮށް މެޗުގެ ލީޑު ވެސް ހޯދާފައެވެ. މިލަނޑު ދިވެހި ޓީމަށް ކާމިޔާބުކޮށްދިނީ ވެސް ފަހުހާފުގައި ކުޅެންނުކުމެ މިމެޗުގައި މޮޅު ކުޅުމެއްދެއްކި އަޝްހަމް އިބްރާހިމް މުހައްމަދު އެވެ.
ނަމަވެސްް އިތުރު ވަގުތުގެ އެންމެ ފަހު މިނެޓުގައި ބޫޓާންގެ ޗޮގްޔެލް ޝެރާބް ވަނީ ލަނޑެއް ކާމިޔާބުކޮށް އެޓީމަށް މެޗުގެ ނަތީޖާ އެއްވަރުކޮށްދީފައެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.
މިނަތީޖާއެކު ގުރޫޕް ސްޓޭޖުގައި ކުޅުނު ދެމެޗުން ހޯދި ދެ ޕޮއިންޓާއެކު ގުރޫޕްްގެ ދެވަނަ ޓީމުގެ ގޮތުގައި ދިވެހި ޓީމު ސެމީފައިނަލުން ޖާގަހޯދީއިރު، މިމެޗުން ލިބުނު އެއްޕޮއިންޓާއެކު ބޫޓާނުން މުބާރާތް ނިންމާލި ގުރޫޕްގެ ފުލުގައި އޮވެއެވެ.
ސެމީ ފައިނަލުގައި ރާއްޖެއާ ދެކޮޅަށް ކުޅޭނެ ޓީމެއް އެނގޭނީ ގުރޫޕް ބީގައި އިންޑިޔާއި ނޭޕާލް ވާދަކުރާ މެޗުގެ ނަތީޖާއަށް ފަހުއެވެ. އަދި މީގެ އިތުރުން މިއީ، 2019 ވަނަ އަހަރު، ސާފް 18 އަހަރުން ދަށުގެ މުބާރާތުގެ ސެމީ ފައިނަލުގައި ކުޅުނު ފަހުން، ސާފްގެ އުމުރުފުރާ މުބާރާތެއްގެ ސެމީ ފައިނަލުން ރާއްޖެ ޖާގަހޯދި ފުރަތަމަ ފަހަރެވެ.