އިސްލާމްދީން ދަސްކޮށްދެނީ ނަފުސު ހިސާބުކުރާށެވެ. ގިނަގިނައިން ތައުބާވާށެވެ. އީމާންކަން ތާޒާކުރާށެވެ. އީމާންކަމަކީ އޭގެ ޒާތުގައި ވެސް ތާޒާކަން ބޭނުންވާ އެއްޗެކެވެ. އަޅުގަނޑުމެންގެ އާދީ ދިރިއުޅުމުގައި ހިނގާ ކޮންމެ ކަމަކީ އީމާންކަމަށް އަސަރުކުރުވާ ކަންކަމެވެ. ހެޔޮ ޢަމަލުން އީމާންކަން ތާޒާވެއެވެ. އަދި ވިޔާނުދާ ގޯސް ޢަމަލުތަކުގެ ސަބަބުން އީމާންކަން ފަނޑުވެއެވެ. މުއުމިނުންނަށް އޮތީ އީމާންކަން އައުކޮށް ތާޒާ ކުރުމަށް މަސައްކަތް ކުރުމެވެ. އީމާންކަން އިތުރުވާނެ ޢަމަލުތައްކުރުމެވެ. އަދި އެ ކަމަށް އެދި ﷲއަށް ދެންނެވުމެވެ. ނަބިއްޔާ صَلَّىٰ اللهُ عَلَيْهِ وَسَلَّم ޙަދީޘްކުރެއްވިއެވެ. «إنَّ الإيمانَ لَيَخْلَقُ في جَوْفِ أحدِكُمْ كَما يَخلَقُ الثّوبُ، فاسْألُوا اللهَ تعالَى: أنْ يُجَدِّدَ الإيمانَ في قُلوبِكمْ» މާނައީ: ހަމަކަށަވަރުން އަންނައުނު ބައުވާ ފަދައިން ތިޔަބައިމީހުންގެ ހިތްތަކުގައިވާ އީމާންކަން ވެސް ފަނޑުވެއެވެ. ފަހެ، ތިޔަބައިމީހުންގެ ހިތްތަކުގައި ވާ އީމާންކަން ތާޒާކޮށްދެއްވުން އެދި ﷲ تعالىއަށް ދަންނަވާށެވެ!" އީމާންކަން ތާޒާ ނުކުރެވެންޏާ ދެން އެ ކަން ދާނީ ފަނޑުވަމުންނެވެ. އޭގެ ސަބަބުން އަޅުކަންތަކާ ދުރަށް ދެވެއެވެ. އުރެދުމާ ކައިރިވެވެއެވެ. ނޭނގި ތިބެ ހަވާ ނަފުސުގެ ގޮވުންތަކަށް އިޖާބަދެވެއެވެ. އަޅުގަނޑުމެންގެ މިއަދުގެ ހާލަތަށް ބަލައިލަމާ ހިނގާށެވެ. ރަމަޟާންމަސް ފެށީ ވަރަށް ފޯރީގައެވެ. ފުރަތަމަ ދިހައެއް ނިމުނުއިރު މިސްކިތްތަކުގެ ހާޒިރީ މަދުވެއްޖެއެވެ. ތަރާވީސްނަމާދު ކުރަމުންދާއިރު މަގުމަތީގައި ރޭގަނޑުގެ ހަރަކާތްތައް އިތުރު ވެއްޖެއެވެ. ދަނޑުތަކާއި އެ ނޫން ތަންތަނުގައި ވެސް ކުޅިވަރުކުޅޭނެ ޖަގަހަތައް އިތުރުކުރެވިއްޖެއެވެ. މަދުވީ ހެޔޮ ޢަމަލަށް ދޭން އޮތް ވަގުތުކޮޅެވެ. އަބަދު ލައިގެން އުޅޭ ހެދުން ދޮވެ ސާފު ނުކުރަންޏާ އޭގެން ނުބައި ވަސް ދުވާނެއެވެ. ލައިގެން ހުންނަ މީހާއަށް އެ ކަން އިހުސާސްނުވެދާނެއެވެ. އެހެން މީހުން އެ ވާހަކަ ބުންޏަސް ޤަބޫލު ވެސް ނުކުރެވިދާނެއެވެ. އެ ހެދުން ނުބާލާ އަބަދު ބޭނުންކުރަންޏާ ވީދި ހަލާކުވެ ހިނގައިދާނެމެއެވެ. އޭގެ ހާލަތު ދެނެގަނެ ރަނގަޅު ނުކުރާ ނަމަ، އޭގެން އައުރަ ވެސް ނިވައިނުވާ ވަރަށް ހަސްފަސް ނެތިދާނެއެވެ. މި ބީދައިން އީމާނާ މެދު ވެސް ވިސްނައިލާށެވެ. އީމާންކަން އިތުރުވާ ޢަމަލުތައް ނުކުރަންޏާ ދެން އެ ކަން ދާނީ ދުވަހުން ދުވަހަށް ފަނޑުވަމުންނެވެ. ނޭނގުމުގެ ތެރޭ ވެސް ކުރެވޭ އެކިއެކި ކަންކަން އެއީ ގޯސް ކަންކަމަށް ވިޔަސް، އަމިއްލަ ނަފުސުން އެއީ ރަނގަޅު ކަންކަން ކަމުގައި ބަލައިގަންނަން ފަށައެވެ. އަދި އެއީ ހެޔޮ ގޮތް ކަމުގައި ދެކެވެން ވެސް ފަށައެވެ. މި އިން ކޮންމެ ޢަމަލެއް އީމާންކަމާ ދުރަށް މީހާ ގެންދެއެވެ. އީމާންކަން ތާޒާކުރަން ކުރެވިދާނެ އެންމެ ރަނގަޅު ކަމަކީ ޤުރުއާން ކިޔެވުމެވެ. އަދި ﷲ ހަނދުމަ ކުރުން ގިނަކުރުމެވެ. ނަމާދުތައް އޭގެ ވަގުތުގެ ކުރީކޮޅުގައި އަދާކުރުމަކީ ވެސް މި ކަމުގެ ވަރަށް ބޮޑު ފަރުވާއެކެވެ. އަދި ހަމައެހެންމެ ފާފަތަކަށް އަރައިގަތުމާ ދުރުހެލިވުމާއި ނުކޮށް ދޫވަމުންދާ ސުންނަތެއް ޙަޔާތުގައި އާކޮށް ދިރުވުމާއި ގިނަގިނައިން ތައުބާވެ ފާފަފުއްސެވުމަށް އެދި ދެންނެވުމަކީ ވެސް އީމާންތެރިކަން ތާޒާ ވާނެކަންކަމެވެ. އަޅުގަނޑުމެންގެ އީމާންކަށް ހެޔޮ ގޮތުގައި ދެމެހެއްޓުން އޮތީ އަޅުގަނޑުމެންގެ އަތްމަތީގައެވެ. އަންނައުނު ބައުވެ ހަލާކުވެގެން ދަހެން އީމާންކަން ފަނޑު ވެ ދިޔަނުދޭށެވެ!