"ރަމަޟާންމަސް ނިމުމުން ތިބާއަށް ކުރެވުނު ހެޔޮ އަމަލުތައް މަދުކަމާއިމެދު ހިތާމަކުރިޔަސް ވަގުތު ފާއިތުވެދާނެއެވެ، ދުނިޔެއަށް ނޭވާލަންޏާ އަދިވެސް ވަގުތު އެބައޮތެވެ. ބާކީއޮތް އަގުހުރި ދުވަސްކޮޅު ސޯޝަލް މީޑިއާއާއި ދުރުހެލިވެ އަޅުކަންކުރުމާއިގެން މަޝްޣޫލުވާށެވެ. ތައުބާވެ ހެޔޮ އަމަލުތައް ގިނައިންކޮށް ހެއްދެވި ފަރާތުގެ ރުހިވޮޑިގަތުން ހޯދަން މަސައްކަތްކުރަންވާނެއެވެ. " *** ކޮޓަރީގައި އެހެން މީހަކު ނެތުމުން މަޚުރަޖުން ރީތި ރާގަކަށް ގުރުއާން ކިޔަވަން އިނދެވުނީ ކިހާ އިރެއްވާންދެން ކަމެއްވެސް ނޭގުނެވެ. ހޭވެރިކަންވީ ދޮރު ހުޅުވާލާފައި އެހެން މީހަކު ވަނުމުންނެވެ. މިއަދަކީ އޭނަ ގެއަށް ފޮނުވަން ޑޮކްޓަރ ނިންމާފައިވާ ދުވަހެވެ. ކޮންމެވެސް ސަބަބަކާއިހުރެ އޭނަގެ ހިތް އެދެމުން ދިޔައީ އިތުރު ދުވަސްކޮޅަކަށް މަޑުކޮށްލުމަށެވެ. ބަލިމީހެއްގެ ގޮތުގައެވެ.ހަޔާއަށް ނޭގުނީ އޭނަގެ ހިތުގެ އެދުން އެހެންގޮތަކަށް ހާސިލުވާން އުޅޭކަމެވެ. ބޭނުންވާގޮތަކަށް ނޫނެވެ. ދިރިއުޅުމުގެ އެހެން ބާބެއްގެ ދޮރު ހުޅުވެނީއެވެ. ދޮރުމަތީގައި ހުރި މީހާ ފެނުމުން ހަޔާގެ މުޅި ވުޖޫދު ފުޑުުފުޑުވެން ފައިބައިގަތްފަދައެވެ. ލިބުނު ސިހުމާއެކު ގުރުއާން މޭގައި ޖައްސާ ބޮނޑިކޮށްލެވުނުއިރު ލިބުނު ސިހުމާއި ބިރުވެރިކަމުން ހިތް ހަފުސްވާގޮތްވިއެވެ. މާސްކު އަޅައިގެން ހުއްޓަސް އެ ބުމައާއި ތޫނު ލޯ އޮޅުވައެއް ނުލެވޭނެއެވެ. ހަޔާފަދައިންނެވެ. އޭނަގެ އައިނު ނެތިއްޔާ އެ ލޯ އަޔާޝް ދެނެގަންނާނެއެވެ. "ހަޔާ؟" އަޔާޝްގެ މޫނުމަތިންވެސް ފެނުނީ ސިހުމާއި ހައިރާންކަމެވެ. ހަޔާގެ އެސްފިޔަތައް ތިރިވިއެވެ. އަޔާޝްގެ ހިޔަނި ދެވަނަފަހަރަށް ދިރިއުޅުމަށް އެޅިދާނެކަމަށް އޭނަ އުއްމީދެއްނުކުރިއެވެ. މިއީ އިމްތިހާނެކެވެ. އަޔާޝް ވަގުތުން ރުޅިވެރިކަމުގެ މަތިގަނޑު އެޅިއެވެ. "މިއޮތް ގިނަ ހޮސްޕިޓަލް ތެރެއިން އަހަރެންގެ ތަނެއް ނޫނީ ނުފެނުނީތަ؟ މިތަނަށް ތިއައީ؟ ކީއްކުރަން މަގޭ ފަހަތުން ނުނެއްޓިގެން ކަލޭމެން ތިއުޅެނީ؟"އަޔާޝްގެ އަޑު އެއްވަރަކަށް ހިފެހެއްޓިފައިވިއެވެ. "އަމިއްލައަށް އައިތަނެއްނޫން..." "އޯ...ނިދަން އޮވެފައި ހޭލެވުނުއިރު މިތާގައި....ފިލްމުތަކުގައިވާހެން؟" "އެހެނެއްނޫޫން...އެކްސިޑެންޓްވެފައި ފެއިންޓްވީ..."ހަޔާ ގެ ނަޒަރު ހުއްޓުނީ ގުރުއާނުގެ އާޔަތަކަށެވެ. "އަހަންނަކީ މިތާގެ ސީއީއޯ...." އަޔާޝް އިތުރަށް ބުނެދިނެވެ. ހަޔާ ވަކި ބުނަންވީީ ކީކޭހެއްޔެވެ؟ މަގާމު އަންގައިގެން އޭނަ އިތުރަށް ދެރަކޮށްލަންކަމަށް ވަންޏާ އެއީ ކުށްހީއެކެވެ. އޭނަ ބޭނުންވީ އޭނަދެކެ ލޯބިވާނެ ތެދުވެރި ބައިވެރިއެކެވެ. މިއީ އެފަދަފިރިހެނެއް ނޫންކަން ސާބިތުކޮށްދީފައިވަނިކޮށް އަޔާޝްގެ ފަރާތުން އޭނަ އެހެން އެއްވެސް ކަމަކަށް އުއްމީދެއް ނުކުރެއެވެ. "މިނާހްުއަކީ މަގޭ ކޮއްކޮ...." އެޖުމްލައާއެކު ހަޔާގެ ހިތުގެ ކޮންމެވެސް ދިމާލަކުން ބިއްލޫރި ނާޒުކް އެއްޗެއް ތެޅިގެން ދިޔަފަދަ އިހުސާސެއްކުރެވުނެވެ. ހަތަރެސްފައި ފިނިވިއެވެ. ބިރުވެރި ހުވަފެނެއް ހެއްޔެވެ؟ދިގުު އިސްކޮޅެއް ފިޔަވާ މިނާހްއާއި އަޔާޝް ވައްތަރެއްވެސް ނޫނެވެ.ފަހަރެއްގައި މިނާހްއަކީ އަޔާޝްގެ މައިންބަފައިން ބަލާބޮޑުކުރި ދަރިއަކަށް ވެދާނެއެވެ. އެ ޖުމްލައިން އަސަރު ނުކުރާކަމަށް ހެދުނަސް އޭނައަށް ހީވީ ހިތުގައި ނޭގި އުފެދުނު އުއްމީދުގެ ހުޅުކޮޅު އަޔާޝް ފައިން އަރާ ނިވާލިހެންނެވެ. "އެއީ އަހަރެންގެ ޑޮކްޓަރ..." "މިނާހް މިތަނަށް މާ ގިނައިން ވަންނަ ސަބަބެއް ބަލަން މިއައީ...." "ސާޖަރީ ހެދިއިރު ހީ ވޯޒް ދެއަ..."އޭނަ ނަޒަރު ހުރީ އާޔަތަށް ހުއްޓިފައެވެ. ބަގަރާ ސޫރަތުގެ 153 ވަނަ އާޔަތުގައި ﷲ ތައާލާ ވަހީ ކުރައްވާފައިވަނީ إِنَّ اللَّهَ مَعَ الصَّابِرِينَ މާނައަކީ ހަމަކަށަވަރުން ﷲ ވޮޑިގެންވަނީ ކެތްތެރިންނާއެކުގައެވެ." އަޔާޝްއައި ވަގުތު ކެތްކުރުމުގައި މި އާޔަތް ޔަގީނުންވެސް އެހީތެރިވެއްޖެއެވެ. އޭނަ ކެތްތެރިވާނެއެވެ. އަޔާޝް އޭނަ ރޮއްވާލާފައި ހަޔާތުން ދިޔަ ދުަވަސްކޮޅު އޭނަ ދުނިޔެއިން މޮޔަނުވީ ކިރިޔާއެވެ. އީމާންތެރިކަމުގެ ހުޅުކޮޅު ހިތުގައި ދިއްލުނުގޮތަށް އަލިވި މަގުން ކުރިއަށް އާދެވުނުކަމީ ރަހުމަތެކެވެ. "ހަޔާ...ރިމެމްބާ...ޕާސްޓް އޮތީ ވަޅުލާފައި..އެނބުރި ބެލުމެއްނެތް....މިއީ ބީރައްޓެއްސެއް...އެއްވެސް ގުޅުމެއް ހުރި މީހެއްނޫން.....މިތާ ސީއީއޯ...ފައިން. އެއީ މައްސަލައެއްނޫން..." "ހަޔާ ދެކެނީ ޑޮކްޓަރެއްގެ ހައިސިއްޔަތުން ކަމަށް ވަންޏާ ފައިން..."ޢަޔާޝްގެ ރާގުގައި ހުރީ އިންޒާރުދޭފަދަ ގޮތެކެވެ. އެޖުމްލައިން އޭނަގެ ސަމާލުކަން އަތުލިއެވެ. އޭނައަކީ ޅަ ކުއްޖެއްނޫނެވެ. އެބުނީ ކީކޭކަން ދެނެގަންނަހާ ތެތްކަން ސިކުނޑީގައިވިއެވެ. އަޔާޝްގެ ކޮއްކޮއަކާއި ދޭތެރޭ އެހެން ނަޒަރަކުން ދުށުންވާނީ އަމިއްލަ ހިތުގައި ޖެހޭ ތަފާލަކަށެވެ. "އެކަން ހަނދާން ނައްތާނުލާތި....ހީޒް މައި ލިޓްލް ބްރަދަ..." ދެމީހުންނަށް ގާތްގަނޑަކަށް އެކީގައި އެކޮޓަރިއަށް ވަދެވުމަކީ އިއްތިފާގެކެވެ. ކޮޓަރީގެ ދޮރުން އެތެރެއަށް ވަން މިނާހް ފެނުމާއެކު އޭނައަށް އިހުސާސްކުރެވުނީ ހާސްކަމެވެ.މިއޮތް ފިނި ކޮޓަރީގައިވެސް ނިތްކުރިން ދާ ހިއްލާލައިފިއެވެ. ދެބެން އެއްތަނަކުން ފެނުމަކީ ތަގުދީރުގެ ސަމާސާއެކެވެ. މިނާހްވެސް އަޔާޝް އެތާހުއްޓާ ފެނުމުން ސުވާލުގެ ނަޒަރަކުން ބަލައިލިއެވެ. ނަމަވެސް ސުވާލެއްނުކުރިއެވެ. "މިނާހް...އެކަނި ޕޭޝަންޓަށް ވިޒިޓްކުރަނީ؟ ފްރެންޑެއްތަ؟" "ނޫން....މިއަދު ގެއަށް ފޮނުވައިލާ ވާހަކަ ބުނަންވެގެން އައީ.....ވަރަށް ފުން ޒަޚަމެއް ހުއްޓާ އަހަރެމެން މަސްގަނޑު ރިޕެއާކޮށް ހީލްވަމުން ދަނީ....ދެން އޮތީ ރެސްޓްކުރުމާއި ފިޒިއޯ..."މިނާހްއަށް އަޔާޝް އައި ސަބަބެއް ނޭގި ހައިރާންވިއެވެ. އަނެއްކާ އަޔާޝްއާއި ހަޔާގެ ގުޅުމެއް އޮތީ ހެއްޔެވެ؟ އެކަމަކު އެދޭތެރޭގައިވި ނުތަނަވަސްކަމާއި ހަޔާގެ މޫނުމަތީގައިވި ޝުއޫރުތައް އެކަން ދޮގުކުރިއެވެ. "ހޫމް....މި ހޮސްޕިޓަލަށް އަންނަ ކޮންމެ މެހުމާނަކަށް އެންމެ ރަގަޅު ކެއާ ދޭންޖްހޭނެ..އޭރުން ދެވަނަފަހަރަށް އަދި ތިންވަނަފަހަރަށްވެސް އަހަރެމެން ގާތަށް އަންނާނީ..ރަގަޅަށް ކެއާކުރިން ދޯ..." "އާނ....ޝީޒް މައި ޕޭޝަންޓް.." "އޮފްކޯޒް ޝީއިޒް..."އަޔާޝް ހިނިގަނޑެއްޖަހައިލިއެވެ. "ވައި އާ ޔޫ ހިއަ؟ ހަޔާ އެނގެނީތަ؟" މިނާހް އޮޅުން ފިލުވަން ބޭނުންވިއެވެ. "އައިމް ނޮޓް ހިއާ ފޯ ހަ....އަހަރެން މިތަނަށް އައީ މަގޭ އަމިއްލަ ތަނަކަށްވީމަ............."އަޔާޝްގެ ތޫނު ރާގުން މިނާހްއަށް ނެގުނީ އެހެން މާނައެކެވެ. އަޔާޝް ޒާތީވީފަދައެވެ. އެހާ ރުޅިއަންނަވަރުގެ ޖުމްލައެއް ނުބުނެވޭ ނޫންހެއްޔެވެ؟ މިނާހްއަށް އާއްމުކޮށް ނުފެންނަ މަންޒަރަކަށް ވުމުން އަހައިލެވުނީއެވެ. އަޔާޝް ކޮޓަރިތަކުން ފެނުމަކީ ނާދިރުކަމެކެވެ. އަދި ޚާއްސަކޮށް މިފަދަ އާލަމީ ވަބާއެއްގެ ތެރޭގައި އަމިއްލަ ނަފުސާއިމެދު ފަރުވާތެރިވާނެކަން ޔަގީނެވެ. އޭނަގެ ހިތް ބުނަނީ ސަބަބެއް އޮތްކަމުގައެވެ. އެވަގުތު ނަރުސްކުދިން އަންނަތަން ފެނުމުން އަޔާޝް ނުކުމެގެން ދާން ހިނގައިގަތެވެ. ހަޔާ އޮތީ ހިމޭނުންނެވެ. ބުނަންވީ އެއްޗެއް ނޭގިފައެވެ. "ހުރިހާ ކަމެއް ރަގަޅު؟"މިނާހްއަށް އަހައިލެވުނެވެ. އެ ޖުމްލައިން ހަޔާގެ ހިތް ރޯލިއެވެ. އާދައިގެ ސުވާލެކެވެ. ނަމަވެސް މިނާހްގެ އެ ޖުމްލައިގާ ވީ ކޮންފަދަ އޯގާތެރިކަމެއްހެއްޔެވެ؟ އަޅާލާކަމުގެ އިހުސާސެވެ. ހިތާމައެއްގައި އޮތްވާ މީހަކު ހަމްދަރުދީގެ އެންމެ ލަފުޒެއް ބުނެލިޔަސް ކަރުނަތައް ފައިބައިގަންނާނެއެވެ. އޭނައަށް އިހުސާސްވީ އެފަދަ ގޮތެކެވެ. ނަމަވެސް ކަރުނަތައް ދިރުވައިލުމުގައި ކާމިޔާބުކުރިއެވެ.ލޯ ފެންކަޅިވިޔަސް ކަރުނައެއް ނައެވެ. "އާޔަތެއް ފެނުނީމަ...މާބޮޑަށް އިމޯޝަނަލް ވެވުނީ....."ހަޔާ ހިނިތުންވެލިއެވެ. މިނާހްއަކީ ޑޮކްޓަރެކެވެ. އެދޭތެރޭގައި އޮތީ ބަލިމީހަކާއި ޑޮކްޓަރެއްގެ ގުޅުމެވެ. ދުވަހަކުވެސް އެނޫން ގުޅުމެއް ނުވާނެއެވެ. ނަސީބަކުން މިއީ އެ ގުޅުންވެސް ނިމުމަކަށް އަންނާނެ ދުވަހެވެ. ހަޔާތުގެ އެ ބާބުވެސް ނިމުނީއެވެ. މިނާހްވެސް އެ ބާބު ފަޅުފިލުވައިދިންކަމަށްޓަކާ ޝުކުރުވެރިވިއެވެ. ދެމީހުންގެ ސިފައާއި އެއްވަރަށް އުޅުމުގައިވެސް ތަފާތުހުރިކަންވެސް ދަސްކޮށްދީފިއެވެ. މިނާހްއަށް ހިތް ލެނބެން އުޅުނަސް އަޔާޝްއާއި އޮތް ގުޅުން އެނގުމާއެކު ޚިޔާރުކުރަން ޖެހުނީ އެހެން ރާސްތާއެކެވެ. އަޔާޝްގެ ކޮއްކޮއާއި އެ އާއިލާއާއި ދުރަށް މާ ދުރަށް އަވަހަށް ދެވޭނެނަމައެވެ. އެންމެ ހިނދުކޮޅަކަށްވެސް މިމީހުންނާއި ކައިރީގައި އުޅެން އޭނަގެ ހިތް ދެކޮޅުހެދިއެވެ. ނަރުސް ކުއްޖާ އޭނަގެ ޓެމްޕްރޭޗަރ ބަލައިލުމަށްފަހު ކަންބޮޑުވެފައިވާގޮތަކަށް ބަލައިލިއެވެ. "ހުން އެބަހުރި.." "ވަޓް؟"މިނާހްގެ ސަމާލުކަން ވަގުތުން ލިބުނެވެ."ކިހާވަރަކަށް؟" ނުނިމޭ