އަންނަ އެޕްރީލް މަހު ދައްކަންޖެހޭ ސުކޫކު ދައްކަން އެއްވެސް ދަތިކަމެއް ނެތް ކަމަށާއި، މިހާރު ވެސް ދައްކަންޖެހިއްޖެ ނަމަ އެ ކަން ކުރެވޭނެ ފައީސާ އެބަހުރިކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ. ރައީސް މިހެން ވިދާޅުވީ، އެމެރިކާއާއި އިޒްރޭލުން އިސްވެ މެދުއިރުމަތީގައި ފަށާފައިވާ ހަނގުރާމައާ ގުޅިގެން ރާއްޖޭގެ އިގްތިޞާދަށް އެކި ގޮތްގޮތުން ނުރައްކާ ކުރިމަތިވެދާނެ ކަމުގެ ބިރު އޮތް ދަނޑިވަޅެއްގައެވެ. މި ހަނގުރާމައިގެ ސަބަބުން ރާއްޖޭގެ ފަތުރުވެރިކަމަށް އަސަރުކޮށް، ލިބޭ އާމްދަނީ ދަށްވެދާނެ ކަމުގެ ކަންބޮޑުވުންތައް އޮތް ނަމަވެސް، ރައީސް ވަނީ ރާއްޖޭގެ މާލީ ހާލަތާ މިހާރު އޮތީ ރަނގަޅަަށް ކަމުގެ ޔަގީންކަން ދެއްވާފައެވެ. "ކުރު ގޮތަކަށް ދަންނަވާކަމަށް ވަންޏާ، މިއަދު ސުކޫކު ޕޭކުރަން ޖެހުނަސް ޕޭކުރެވޭނެ ވަރުގެ ފައިސާ އެބަހުރި. މިއަދު މިހާރު ޕޭކުރަންޖެހުނަސް ޕޭކުރެވޭވަރަށް ފައިސާ އެބަހުރި،" ރައީސް ވިދާޅުވިއެވެ. ރައީސް ޑރ. މުއިއްޒު އިތުރަށް ވިދާޅުވީ، އަންނަ އެޕްރީލް މަހުގެ އަށްވަނަ ދުވަހު 500 މިލިއަން ޑޮލަރުގެ ސުކޫކު ދެއްކުމަށް ސަރުކާރުން މިހާރު ވާނީ ނިންމާފައި ކަމަށެވެ. އަދި އެ ސުކޫކު ދެއްކުމަށްޓަކައި ޖުމްލަ 650 މިލިއަން ޑޮލަރު ރައްކާކޮށްފައިވާ ކަމަށާއި، އެ ފައިސާ ދެއްކުމަށްފަހު ވެސް ސަރުކާރުގައި ބާކީ ފައިސާ ހުންނާނެ ކަމަށް އެމަނިކުފާނު ވިދާޅުވިއެވެ. މީގެ އިތުރުން، ދައުލަތުގެ ރިޒާވްގެ ހާލަތަށް އަލިއަޅުއްވާލައްވަމުން ރައީސް ވިދާޅުވީ، ސޮވެރިން ޑިވެލޮޕްމަންޓް ފަންޑު (އެސްޑީއެފް)ގައި މިހާރު 320 މިލިއަން ޑޮލަރަށްވުރެ ގިނަ ފައިސާ ހުރި އިރު، ޔޫސަބަލް ރިޒާވްގައި 330 މިލިއަން ޑޮލަރު އެބަހުރި ކަމަށެވެ. ރައީސް ވަނީ ރާއްޖޭގެ އިގްތިޞާދު ފުޅާވަމުން އަންނަ ކަމަށާއި، ރާއްޖޭގެ އިގްތިޞާދަށް ކުރިމަތިވެދާނެ ގޮންޖެހުންތަކަށް ސަރުކާރުން ތައްޔާރުވެފައިވާ މިންވަރު ވަނީ ހާމަވެގެން ގޮސްފައެވެ.