ހުޅުމާލެ ފޭސް3ގެ ބިން ހިއްކާ ނިމިފައިވާކަން ރައީސް މުހައްމަދު މުއިއްޒު އިއްޔެ އިއުލާނުކުރައްވައިފި އެވެ.
ވީ ކިހިނެއް؟ - ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި ފީއެންސީގެ ފަރާތުން ވާދަކުރާ ކެންޑިޑޭޓުންގެ ކެމްޕޭނު އިވެންޓެއްގައި ވާހަކަ ދައްކަވަމުން ރައީސް އިއްޔެ ވިދާޅުވީ ކުރީ ސަރުކާރުގައި ކަނޑުފަޅުން ދިން ގޯތިތައް ހިއްކާ ނިންމާ ހަވާލުކުރުމުގެ މަސައްކަތް ހަލުވި ސްޕީޑުގައި ކުރިއަމުން އަންނަ ކަމަށެވެ.
ތަފްސީލް - ރައީސް ވިދާޅުވީ ހުޅުމާލެ ފޭސް މިހާރު އޮތީ ހިއްކާ ނިމިފައިވާ ކަމަށާއި ގިރާވަރުފަޅާއި ގުޅިފަޅުން ގޯތިދީ ނިމި އެތަންތަން ހަވާލުކުރުމުގެ މަސައްކަތް ވެސް ކުރިއަށްދާ ކަމަށެވެ.
"ގިރާވަރުފަޅު ހިއްކުމުގެ މަސައްކަތް މިހާރު އެއޮތީ ހަމަ ފަށަން ތައްޔާރުވެ، ދެ ޑްރެޖަރު އެކަމަށް ތައްޔާރުވެ އެތާ ކައިރީގައި،" ރައީސް ވިދާޅުވި އެވެ.
"ކުރީގައި ދީފައި ހުރި ގޯތިތައް، އަޅުގަނޑު ވައުދުވީ ގޮތަށް ހަވާލުކުރުމުގެ މަސައްކަތް ވެސް ކުރިއަށް [އެބަ ދޭ]. ކުރީގަ ދޭން ނެރުނު ލިސްޓުގަ ފްލެޓުތައް ވެސް ހަވާލުކުރުން ވެސް ގާތްގަނޑަކަށް ނިމިއްޖެ."
ރައީސް ވިދާޅުވީ މާލެ ސަރަހައްދުން މާލޭ ރައްޔިތުންނަށް ގޯތި ދޭން އިތުރަށް ބިން ހިއްކެން އޮތީ އުތުރު ތިލަފަޅުން ކަމަށާއި އެތަން ހިއްކަން ވެސް ތައްޔާރުވެފައިވާ ކަމަށެވެ.
މީގެ އިތުރުން ރައީސް ވިދާޅުވީ ރަސްމާލެ ހިއްކުމުގެ މަސައްކަތް މިހާރު ކުރިއަށްދާ ބާރު ސްޕީޑުގައި ގޮސް، އޭޕްރީލު މަސް ތެރޭ މަސައްކަތް ނިމޭނެ ކަމަށެވެ.
"އެތަން ހިއްކާ ނިމޭއިރު އެތަނުން ގޯތިތައް ލިބޭ ފަރާތްތައް ވެސް ކަނޑައަޅާ އަޅުގަނޑުމެން އިއުލާނު ކުރާނަން ވަގުތީ ލިސްޓު،"ރައީސް ވިދާޅުވި އެވެ.
ފާހަގަ ކުރެވޭ - ހުޅުމާލެ ފޭސް3 އިން ގޯތި ދިނުމަށް 63 ހެކްޓަރުގެ ބިން ވަނީ ހިއްކައިފަ އެވެ. އެތަނުން1،351 ގޯތި ދޭނެ އެވެ.