މޫސުން ގޯސްވާނެ ކަމަށް ލަފާކުރެވޭތީ ނެރެފައިވާ ހުދު ސަމާލުގެ މުއްދަތު އިތުރުކޮށްފިއެވެ.
މިއަދުވެސް ރާއްޖޭގެ ބޮޑު ބަޔަކަށް މޫސުން ގޯސްވާނެ ކަމަށް ބެލެވޭތީ ރާއްޖޭގެ މޫސުމާބެހޭ ގައުމީ އިދާރާ (މެޓް) އިން ފުރަތަމަ ސަމާލު ނެރުނީ މިއަދުގެ ހެނދުނުއެވެ. އެ ގޮތުން މެޓް އޮފީހުން ވަނީ، ށ އަތޮޅުން ފެށިގެން ފ އަތޮޅާ ހަމައަށް މޫސުން ގޯސްވާނެ ކަމަށް ބުނެފައެވެ.
މެޓް އޮފީހުން މިސަރަހަށްދުތަކަށް ފުރަތަމަ ހުދު ސަމާލު ނެރެފައިވަނީ މިއަދު ހެނދުނު 10:00 އިން ހަވީރު 04:00 އަށް، އަދި އެ މުއްދަތު ހަމަވުމާއެކު ސަމާލުގެ މުއްދަތު ވަނީ ދިގު ދަންމާލާފައެވެ. މިހާރު އޮތް ގޮތުން ނަމަ ހުދު ސަމާލު އެފެކްޓިވް ވާނީ މިރޭގެ 09:30 އާ ހަމައަށެވެ.
ސަމާލުގައި ބުނެފައިވަނީ، އެ ވަގުތުތަކުގައި އެ ސަރަހައްދުތަކަށް ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި، ކަނޑުތައް ގަދަވާނެ ކަމަށް ލަފާކުރެވޭ ކަމަށެވެ.
މީގެ އިތުރުން މިއަދު ރާއްޖޭގެ އެކި ހިސާބުތަކަށް ވިއްސާރަކޮށް ގުގުރުން އެކަށީގެން ވާނެކަމަށާ، ދެކުނުގެ ބައެއް އަތޮޅުތަކަށް ބޯކޮށް ވާރޭވެހޭނެ ކަމަށް ވެސް މެޓުން ވަނީ ލަފާކޮށްފައެވެ.
އެހެންކަމުން އުތުރާއި މެދުރާއްޖެތެރޭގެ އަތޮޅުތަކަށް ހުޅަނގާއި ހުޅަނގު އުތުރުން ގަޑިއަކު 10 މޭލާއި 20 މޭލާ ދެމެދުގެ ބާރުމިނެއްގައި ވައިޖެހޭނެ ކަމަށާ މެޓް އޮފީހުން ލަފާކުރެއެވެ.
އަދި ދެކުނުގެ އަތޮޅުތަކަށް ހުޅަނގު ދެކުނުނާއި ހުށަނގުން ގަޑިއަކު 8 މޭލާއި 20 މޭލާ ދެމެދުގެ ބާރުމިނެއްގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު 40 މޭލުގެ ބާރުމިނަށް ވައިގަދަވުން އެކަށީގެންވާ ކަމަށް ވެސް މެޓް އޮފީހުން ވަނީ ލަފާކޮށްފައެވެ.
މީގެ އިތުރުން ރާއްޖެތެރޭ ކަނޑުތައް އާދައިގެ ވަރަކަށް ގަދަވެފައި، ވިލާގަނޑުގައި ގަދަވާނެ ކަމަށް ލަފާކޮށްފަވާއިރު، ރާޅުގެ އުސްމިން ހުންނާނީ 3 ފޫޓާއި 6 ފޫޓާ ދެމެދުގައި ކަމަށް ވެސް މެޓް އޮފީހުން ބުނެއެވެ.
މިހާރު ރާއްޖެއަށް ކުރަމުން އަންނަނީ ދެ މޫސުން ބެދޭ ވިއްސާރަ ވިއްސާރައެވެ.
މެޓުން ލަފާކުރަނީ ކުރިއަށް އޮތް ދެ ދުވަހު ރާއްޖޭގެ އެކި ހިސާބުތަކަށް، ބައެއް ފަހަރަށް، ގުގުރުމާއެކު ވިއްސާރަ ކުރާނެ ކަމަށެވެ.
އެހެންކަމުން ހުރިހާ ފަރާތްތަކުންވެސް މޫސުމަށް ސަމާލުވުމަށް އެ އޮފީހުން އެދިފައިވެއެވެ.